法拉朱璇爭影壇新人王

法拉朱璇爭影壇新人王

今日的新演員,他朝有機會成為影壇巨星。「第廿九屆香港電影金像獎」即將舉行,「最佳新演員」雖非重頭獎項,但對於一班入圍新人來說,卻是人生大事。早前眾人來一場小角力,齊齊拉票,李治廷與小童星鍾紹圖勁晒「兄弟情」,陳法拉與朱璇則親繪小紙牌,望評審多多支持!


法拉(左)與朱璇各憑處女作爭獎,早前便雙雙晒美腿拉票!

雖然戰情緊張,但陳法拉、朱璇兩位對手早前齊齊受訪,兩位靚女還親繪拉票小紙牌,希望評審多多支持。憑電影《Laughing Gor之変節》入圍今年「最佳新演員」的法拉,最初的金像獎入圍名單沒有她的份兒,但因《十月圍城》的王柏傑曾憑《九降風》奪獎而被取消資格,法拉於是以第六名入圍者身份補上,過程轉折,但法拉認為機會難得,加上獲無綫指引可行金像獎紅地氈及以廣東話上台講感受,令伊人開心不已。

至於同憑處女作入圍的朱璇,《淚王子》是她畢業後的首份工作。明明是廿一歲青春少艾,卻要演繹五十年代的兩女之母,卻竟令楊凡感動得掉下第一滴導演淚,更成功入圍「最佳新演員」。



用心演繹報答導演

身為「2008年國際華裔小姐冠軍」的朱璇,青春、甜美,但導演楊凡卻看到朱璇古典美的一面,並邀她演出電影《淚王子》中金皖平一角,朱璇說:「當時我諗如果試過唔得都可以返去讀書,所以就答應。最初擔心做得唔好會畀導演鬧,但原來佢好體貼,仲好耐心教我做每一場戲,所以我一定要演好呢個角色,如果唔係就對佢唔住!」相對朱璇有導演「教路」,被導演盛讚有潛質的法拉則為角色做好準備,她說:「鎮宇比我早開拍,所以我開工前就去探班,死跟住戲中做我哥哥嘅鎮宇,佢亦好肯教我,叫我要當佢係老竇,因為戲入面,係哥哥養大個妹嘅。」

控制情緒遇上難題

問兩女拍戲的趣事,朱璇笑言曾因對白而笑翻天:「場戲講張孝全被押走,我要同佢講最後一句說話『我愛你直到海枯石爛』,點知每次張孝全都笑到拍唔到,NG咗四、五次!」此外,朱璇爆導演在開拍前,竟要她跟張孝全約會:「戲入面我哋係夫妻,為咗有夫妻嗰種默契同真實感情,所以導演就叫我同張孝全要單獨約會,仲話食飯、睇戲嘅約會使費都由佢出,仲叫我哋玩得開心啲,好搞笑!」

法拉則表示難忘一場以死要脅吳鎮宇放過謝天華的戲份:「遠鏡拍埋去嗰段做得好好、好順利,但拍大頭情緒就唔可以一時間到位,始終經驗唔夠,唔似鎮宇做十幾次都可以去番嗰個情緒。最後導演都剪咗遠鏡,因為拍大頭戲時,鎮宇有一滴眼淚喺眼度,導演覺得好好。」

互笠高帽品評對手

今年提名新演員的,還有《十月圍城》的李宇春、《歲月神偷》的李治廷及鍾紹圖。談到奪獎的信心,擁有天時地利人和的法拉卻沒十足把握:「第一次入圍真係好難講,咁多套入圍作品,我只係睇咗《淚王子》,我覺得朱璇角色好吸引,內心世界好複雜好難演,我都好鍾意呢個角色,不過朱璇冇攞到一百分,但導演拍得佢好靚。(咁你覺得自己攞到幾多分?)我畀自己八十分。」問到朱璇可看好哪位?她笑說:「對我嚟講入圍已好開心,但真係要揀,我會揀鍾紹圖,佢好得意好可愛,大家畀個獎佢啦!其實個個都好好,如果最佳新演員獎有五個就好!」

採訪:影視組 攝影:劉智源

服裝:BCBGMAXAZRIA

髮型:Patrick So@HHLing(法拉)Chow@PRIVATE I(朱璇)

場地:馬哥孛羅香港酒店

楊凡:朱璇內心戲好出色

《淚王子》導演楊凡對朱璇的演出十分滿意,大讚她說:「朱璇喺《淚王子》嘅角色真係好難做,廿一歲女仔要演三十歲母親,係好大挑戰。我拍咁多電影,第一次睇番錄影會流眼淚,就係朱璇演繹嘅內心戲,真係好出色!至於必睇位,我會講係朱璇ending嗰場戲,佢可以將好複雜嘅心態表現出嚟。」

邱禮濤:憑直覺搵法拉

《Laughing Gor之変節》導演邱禮濤表示早已看好法拉,他說:「法拉做得非常之好,亦係我預算之內,我一有劇本喺手,我嘅直覺就話畀我知,要搵佢做呢個角色,希望佢旗開得勝啦!(法拉係咪好勤力?)係呀,不過除咗勤力之外,法拉仲跑得好快,天華同法拉逃走嗰段,天華都唔夠佢跑呀!」

李治廷鍾紹圖被迫兄弟「相殘」

羅啟銳與張婉婷「冒險」找來全無演戲經驗的李治廷與鍾紹圖合拍《歲月神偷》,結果證明兩位伯樂發現了一雙「超班馬」!年僅九歲的小紹圖月前隨大隊往柏林出席影展,對操得滿口流利德文、能唱又能彈結他的「哥哥」更是崇拜,這回於香港電影金像獎內被迫「廝殺」,問到小紹圖想誰拿「最佳新演員」獎座時,他即衝口而出:「梗係我同哥哥兩個啦!」


李治廷(左)與「弟弟」鍾紹圖「兄弟情」日深,默契十足。

小紹圖聰穎過人,李治廷談及對「弟弟」的評價時,邊打眼色邊說:「唔想畀佢知我讚佢,但佢嘅演藝潛質真係好高,記得有場戲要佢嚎哭,事前我哋估佢記得喊就應該唔記得對白,點知正式埋位佢不但喊得好犀利,仲一字不漏講晒對白。」

小紹圖接拍《歲》片,要過五關斬六將,相反李治廷卻是一次偶然,事關李父與羅啟銳原來乃校友,一次聚會後羅導往李治廷家探訪,結果發現友人之子就是心目中的「那杯茶」,李治廷亦不令羅導失望,開拍前花了很長時間,為角色特地去學跨欄。他又坦言早前柏林之行令他一世難忘,故得獎與否已算是贏了一仗!

張婉婷:佢哋交足功課

面對一眾勁敵如《十月圍城》內的李宇春,《歲》片監製張婉婷對愛將李治廷及鍾紹圖仍信心十足:「其他戲唔同嘅角色都可以互相補足,但呢套戲一家四口冇咗邊個都唔得,重要性一樣,有人做得差啲,都會影響全片效果,好彩佢哋兩兄弟都交足功課,起碼我好滿意。」張婉婷更忽發奇想謂:「如果有機會都想搵佢哋拍西域古裝片,講兩隻馬騮點樣排除萬難去學功夫,一定好好笑!」

陳德森:李宇春?我服!

導演陳德森大讚李宇春在《十月圍城》中的演出,指她由零武功根底,到正式拍攝時很快上手,看得到她付出了很多工夫和努力,她做事好認真,他說:「佢好捱得,拍到第四日同我講話打到個頭同身好似分開咗,仲爭啲起唔到身咁滯。但佢嗰種堅持令人佩服。我肯定佢日後仲有好多機會發展。」問到會否希望她奪最佳女配角,陳德森說:「呢個獎對佢嚟講係快咗啲,『最佳新演員』就好恰當。」