洪天明周家蔚互見家長拜年
周家蔚與洪天明早已是公認的一對，她不避嫌在年初一帶同男友返家與媽咪食盆菜，又承認已向「未來老爺」洪金寶拜年，看來二人大有機會明年加入派利是行列！
陸詩韻（左）與陳倩揚出席活動，宣揚環保。
港姐周家蔚、陳倩揚與陸詩韻，昨日到銅鑼灣出席環保活動，家蔚被問到情人節如何度過？她說：「嗰日我返屋企食媽咪煮嘅盆菜，又去湯盈盈屋企拜年！（同天明一齊？）佢有嚟我屋企食盆菜。（同未來老爺洪金寶拜年？）嗯……我一日只做一樣嘢。（咁有冇去洪家？）嗯……有去佢屋企拜年。（收封新抱大利是？）乜有呢啲嘢咩？（有幾大封？）未拆唔知。」
問到有否被催婚時，家蔚未有正面回答，只笑言曾出席一個五、六十人的團拜活動，想到如要派利是會幾「慘情」，當時還遭袁詠儀整蠱，家蔚說：「佢攞住封利是喺我身邊玩咗三次，問使唔使派利是畀我，我仲要逗架！」
而陳倩揚則親自煮西餐冧男友過情人節，笑言無論煮得好不好吃，男友也不敢說不好。陸詩韻則希望可快些找到好男友，又坦言今次搵的是結婚對象，不想再浪費時間。
呂慧儀考定潛水牌搞海底婚禮
呂慧儀昨日行婚紗騷時透露，已 搵到婚紗公司贊助婚紗，並考獲潛水牌構思海底婚禮，為將來結婚鋪路！
呂慧儀與莊思敏昨日分別為蒙娜麗莎及法國婚紗擔任模特兒，隔空爭妍鬥麗！呂慧儀表示與該公司已多次合作，對方已答應將來贊助婚紗及婚紗照，至於婚禮形式，她亦已想好：「我想舉行水底婚禮！（難度好高？）唔難！我已經有潛水牌，好易考！（親友唔可以觀禮？）結婚係兩個人嘅事，到時拍片畀佢哋睇，而且會擺酒招呼親友！」不過，她揚言並不恨嫁，目前以事業為重。
雪芙（左起）、李毓芬及宋紀妍在台上爭妍鬥麗。
莊思敏新年收到不少短訊，大部分都祝她早日結婚。
林莉的婚紗相當巨型，甚為搶鏡！
莊思敏被朋友催婚
另一邊廂，昨日是莊思敏農曆新年後首個工作，她笑言今年收到不少朋友恭賀，祝她早日結婚：「好似怕我嫁唔出咁！（情人節點過？）等阿Deep（吳浩康）收工，同朋友一齊飲嘢！禮物方面，有日我行街見到個手袋好靚，於是買咗，再打電話畀阿Deep話已經幫佢買咗禮物！」
另外，台模吳亞馨、瑞莎及林莉同場行婚紗騷，對於被吳亞馨搶風頭，林莉表示不介意：「佢好靚，身材好均勻，我就勝在高挑！」至於吳亞馨亦回禮說：「林莉好有禮貌，行騷有自己嘅特色！（你身材好好？）媽咪成日畀中藥我食！」昨日是瑞莎的25歲生日，緋聞男友「萬寧哥哥」沈志明亦有撐場為她拍照，瑞莎表示收到對方送的3朵玫瑰花。
