涉貪後首度公開亮相　寧進夥 o靚崑齊避志雲

寧進（右）話同周永恆、趙頌茹都識，但新娘話只係派咗帖畀寧進女友。

同陳志雲、叢培崑一齊捲入涉貪污事件嘅寧進，喺被廉署拘捕後一直未現過身，噚晚佢就去咗九龍城飲周永恆同趙頌茹餐喜酒。寧進仲好大方接受記者訪問，佢話冇同陳志雲聯絡：「要避一避，廢事俾人話夾口供。」但佢又話有搵叢培崑：「佢係我小學同學嘛。」佢仲話叢培崑應該都冇搵陳志雲。
咁 ICAC查成點呢？寧進話：「都差唔多啦，我只去過一次，我唔擔心。」單嘢有好多傳聞，寧進都一一回應，好似話佢同叢培崑一齊呃陳志雲，佢話：「我哋圈內嘅人，一定知唔係，根本冇關係。」咁話叢培崑逼走寧進，唔畀佢接近陳志雲呢？寧進就話：「唔會，之前都有影過我同陳生 keep住一齊食飯 o架。」

捲入涉嫌貪污事件嘅寧進噚晚大方接受記者嘅訪問，仲幾乎有問必答。

寧進（右）話仲有同叢培崑（左）聯絡，但同陳志雲（小圖）就冇聯絡。資料圖片

強調鍾意女人

寧進強調自己一向鍾意女人，家都有女友，至於 facebook上寫對男仔感興趣，寧進解釋：「我開戶口時以為係寫性別，睇錯咗，後來都 delete咗。」佢仲澄清埋話叢培崑都鍾意女人喎。講到 facebook有好多相流出，寧進話：「我都唔算多啦。」
家 TVB工作停止晒，咁收入點呢？寧進好老定咁話：「你哋都 check到我有好多份工啦。」之前傳係陳志雲打本畀佢做生意，寧進反問：「你信唔信嗰啲呀？我哋係朋友關係咋。」佢話涉貪事件都唔講，咁怕唔怕影響同陳志雲嘅關係？佢話：「絕對唔會，任何一個都唔會，希望個個都冇事啦。」佢又話叢培崑間公司佢冇份嘅。
另外，有傳噚晚寧進係不請自來，據新娘趙頌茹話佢有派帖畀寧進女友，但聽聞佢哋已經分手。問周永恆有冇請寧進嚟飲，佢迴避話：「我個個朋友都請。」

崔建邦探訪非洲化戾氣

受到涉嫌毆打女友官司困擾的崔建邦，日前遠赴非洲探訪力求行善洗底，面對惡劣環境路途兼崎嶇、露天「解決」，崔建邦不但沒哼半句，更稱心靈十分平靜及祥和。

崔建邦與小朋友輕輕擊拳，友誼由此而起。

崔建邦早前因涉嫌毆打女友鄺敏慧而被迫停工，日前他和黃家強跟隨佛教團體到非洲探訪，欲求洗底翻身。

繼探訪完孤兒院後，今次一行人首次深入非洲土人部落，並需要乘坐三小時車程才到達，沿途飛沙走石，馬路崎嶇不平，崔建邦和黃家強抵埗後不約而同表示：「真係『櫈』到肺都甩！」而當地衞生環境極之惡劣，早晚氣溫亦相差十多度，就連大小二便亦只能在一個簡陋的「石牆」內解決，崔建邦說：「當地人係冇廁所呢樣嘢，所謂嘅廁所都只係用幾舊石砌出嚟圍住，大家都係喺裏面解決！」

崔建邦與黃家強跟當地村民合照。

眼神笑容交流

崔建邦指當地小朋友見到他們衣着「怪誕」，不時投以奇異目光，但當他們拿出食物時，大批小朋友便一擁而上，他說：「雖然大家語言唔通，但我哋係靠眼神同笑容去感染大家，嗰個場面真係好親切！」

問崔建邦有否藉今次非洲探訪之旅減低心中戾氣？他淡然表示：「去到呢啲地方，我感到好喜悅，我哋一班人都好一致，依家覺得好平靜同祥和，可能習慣咗城市生活，去到非洲心境會有啲唔同！」

家強探訪一間孤兒院時，與小朋友合唱《AMANI》。

碌南瓜玩一餐

至於家強在探訪一間孤兒院時，有幸與一班小朋友高唱亡兄黃家駒的作品《AMANI》，藉以宣揚和平及反戰，他興奮表示：「呢班小朋友唔使教已經識唱AMANI NAKUPENDA NAKUPENDA WE WE，但第二啲部落嘅小朋友就未必識，因為佢哋唔係講呢啲話！」家強亦計劃等到囝囝十歲時帶他一同前往探訪，讓他醒悟身在福中，他說：「香港嘅小朋友太幸福，又遊戲機又電腦，呢度嘅小朋友攞個南瓜喺地下碌嚟碌去已經好開心！」