大家利是
徐子珊
紅色炸彈人人怕,紅封包就多多益善。細個流行富格林金幣,摸到硬嘢以為有金執,點知只係朱古力金幣;到你大個派利是嗰陣就知派錢幾肉赤。查實利是個餡唔重要,最緊要係嗰份祝福,正如粵語片時代謝賢胡楓喺《難兄難弟》窮到用「當票」做人情,同樣紅封包入張麥當當禮券同西餅券甚至便利店 coupon都得,畀嗰個開心收嗰個難忘。想收大利是,綜觀以下藝人寶貴經驗,三個字:問老闆!
祝大家過番個肥年!
撰文:卓寶花、何慧斯、楊潔雯、王崇穎
Q1:獲得最大銀碼利是?
Q2:預備封利是的銀碼?
Q3:最失望的一封利是?
祝願:脫穎而出 徐子珊
A1:我淨係收過屋企人嘅四位數字大利是,其他人未試過。
A2:今年預備咗五位數字封利是。
A3:冇試過有不愉快經歷喎。
祝願:生龍活虎 張可頤
張可頤
A1:收最多嗰次係屋企人畀,唔記得幾多喇。其實收利是係一個意頭,幾多都冇所謂。
A2:今年都要預幾千蚊嚟封利是,一定要封畀今年照顧過你幫過你嘅同事同朋友。
A3:我自己就冇乜唔開心經驗喎。新年都係開心嘅,收幾多都冇所謂。
祝願:中六合彩 吳卓羲
吳卓羲
A1:我收過最大封嘅利是,係新年去登台,收老闆畀三萬蚊利是。
A2:今年我都預咗兩萬蚊左右用嚟派利是,而且我封利是銀碼全部平均一樣,唔會大細超。
A3:西餅券,收利是通常以為一定係錢,點知收到西餅券。
祝願:虎虎生威 郭晉安
郭晉安
A1:早幾年試過去登台,咁請我哋嘅老闆就封咗封一千蚊利是畀我。
A2:都會預五位數字去派畀大家,最大同最細封都係 100蚊,反而我封畀我個仔就只有 20蚊。
A3:細個嘅時候試過收財神,咁嗰時生活環境唔好,初初摸到軟嘢以為好嘢啦,點知係財神。
祝願:人人笑,多錢錢 佘詩曼
佘詩曼
A1:收過一萬蚊港元利是,係媽咪畀嘅大利是。
A2:每年我都會派利是,攞個意頭。今年我都會照派開工利是,已經準備咗三萬蚊。
A3:有利是收就唔會失望,就算係收禮券又好,乜嘢都好,我都會開心,所以我未試過有失望嘅經歷。
祝願:身體健康 鄭嘉穎
鄭嘉穎
A1:早幾年媽咪封咗封三千蚊利是畀我,其實都係我嘅錢嚟。
A2:我每年都會預五位數字,最大封一千蚊,最細封都一百蚊。
A3:小朋友嘅時候當然收過紅紙寫啲吉利說話,之後媽咪話都係心意,意頭嚟嘅。
祝願:三 T Sure Win 謝天華
謝天華
A1:收過最大封嘅過年利是係金牛一千蚊,係 20幾歲時去拜年 uncle畀嘅。
A2:今年會喺拉斯維加斯過年,同太太一共預咗三至四萬蚊派利是,喺美國派美金。
A3:收硬幣都一樣開心唔會失望,反而第一年派利是就好肉赤。
祝願:龍精虎猛 陳敏之
陳敏之
A1:試過美加登台收過幾千蚊利是。
A2:今年我準備咗一萬蚊用嚟派利是,成日幫我做嘢嘅人梗係會畀大封啲。
A3:因為收利是而失望咁又冇遇過喎,其實都係攞意頭啫,有得收就開心。
祝願:情場得意!靚爆鏡! 薛家燕
薛家燕
A1:收過最大封嘅利是係十二萬八千港元支票,係一間傢俬公司老闆畀我。
A2:今年同舊年一樣預咗六萬八千蚊港元封利是,另外會準備坡紙、人民幣同馬幣。
A3:細細個時候收到五毫硬幣,因為當時全部都係收紙幣。
祝願:龍馬精神 馬德鐘
馬德鐘
A1:收到最多係一個朋友封畀我嘅,有三千蚊咁多,梗係開心啦。
A2:每年都差唔多,今年都係預幾萬蚊去封利是,都係要派畀同事同朋友。
A3:記得有一年我派畀羅蘭姐,點知佢呆咗,問我做乜派畀佢,咁之後佢都有收,利利是是。