03年港姐冠軍曹敏莉（ Mandy）形象高貴，就連家中兩隻愛犬 Honey和 Belle都是儀態萬千的貴婦狗，她為了讓愛犬得到一流照顧，不但紆尊降貴執屎，還自學寵物美容，親自做阿四服侍牠們。　撰文：比華利

俗語有云物似主人形，單看港姐曹敏莉只得 1歲的貴婦寵物犬 Belle，就是最佳證明。 Belle身形嬌滴滴，走起路來更不停扭 pat pat，十分可愛，牠是家中老么，甚得曹家上下歡心，尤其 Mandy胞妹曹蕙蘭（前名曹敏寶， Mable）更錫到牠燶，拍照當日全程照顧 Belle，不但在球場陪玩球，又餵零食，服侍周到， Mable搞笑說：「 Belle係波后，最鍾意追波波。」

Dog File　名稱： Honey　品種：貴婦狗　性別：雄性　歲數： 1歲半

放大圖片

Dog File　姓名： Belle　品種：貴婦狗　性別：雌性　歲數： 1歲

初見即心甜

Mable拍照當日全程陪狗玩波又餵零食，對愛犬服侍周到。

Honey較 Belle年長僅半歲，但身形卻大一個碼，最愛黐着 Mandy， Mandy也直認偏愛 Honey，她說：「佢係第一隻狗，我親力親為照顧佢， Honey好有人性，我最初見佢心都甜晒，索性幫佢改名 Honey。點知佢越大性格越活躍，媽咪話早知改佢個名做威威，夠晒威風喎。」Mandy為了加強「親狗關係」，不惜親自動手替愛犬做足全套美容服務， Honey和 Belle的髮型全是其傑作。自言無師自通的 Mandy說：「我睇書學，基本一個月幫佢哋剪一次毛，但有時梳毛見邊度長咗，我又修吓，兩隻狗冲凉都係我同 Mable夾手夾腳做，好少帶佢哋去寵物美容院。」Mandy明知 Honey喜歡周身郁，初時每次見牠由美容院回來均周身損傷，令她十分心疼，遂激起自學寵物美容的念頭，實行隨時隨地貼身侍候寶貝狗。綜觀 Honey和 Belle除打扮精緻外，也十分健康活潑，難怪 Mandy得戚地說：「我將來照顧 BB都冇問題。」

聽歌頭擰擰

Mandy除自學寵物美容照顧愛犬外，閒來更喜歡為寵物留影。

Mandy和 Mable兩姊妹是照顧愛犬的最佳拍檔，二人分工合作極具默契， Mandy指熱愛唱歌的妹妹早前離開有線，稍後會簽約新公司闖樂壇，兩頭小狗則是 Mable的頭號 fans，她說：「 Mable喺屋企唱歌， Honey同 Belle都坐定定，邊聽邊搖頭，聽到好投入。」

Honey包拗頸吞 SIM卡落肚

Honey是 Mandy所養的第一隻狗，小時候毛茸茸的十分可愛。

曹敏莉的愛犬 Honey性格活潑好動，幼時更喜歡亂咬家中東西， Mandy家中木製家具幾乎無一倖免，幸好 Honey越大越聽話。

隔日隨大便排出

Honey最愛黐在 Mandy身邊， Mandy也坦承比較偏愛 Honey。

現年 1歲半的 Honey，對任何事物均十分好奇，而且有點包拗頸，手邊的東西如果主人要搶回，牠偏愛作對吞下肚。Mandy妹妹 Mable便大爆 Honey瘀事，她說：「有次爹哋跌咗張手提電話 SIM卡落地， Honey快手快腳吞咗落肚，好搞笑，大家當時仲同佢講笑話要打電話畀佢，真係好好笑。」問到可有即時帶 Honey睇獸醫時， Mandy氣定神閒地說：「唔使驚，我哋可能見慣佢亂吞嘢，見怪不怪，第二日我哋就喺佢啲便便入面發現番張 SIM卡。」

曹敏莉和胞妹曹蕙蘭（左）是照顧愛犬的最佳拍檔，分工合作極具默契。　攝影：仇志德