以「矮」掛帥的王祖藍，由早年的串星榮升主角，無論歌、影、視都有他的蹤影，可謂瓣數多多。

祖藍天生靠把口搵食，用盡其三寸不爛之舌成功上位，最近他於英皇娛樂集團10周年演唱會，與天后容祖兒打頭陣演出，5呎3吋半的他，站在5呎7吋「多啲啲」的祖兒身旁，二人反串舞步笑爆全場。祖藍雖然個子矮小，但卻擁有遮不盡的才華，這個「另類」小巨人不容忽視！

撰文：劉安妮
攝影：張宏福

祖藍雖然個子不高，可說有點卡通孩童感覺，但上天看似特別眷顧他，總是安排大批美女於他身邊團團轉，單看第一個緋聞女友是蔡少芬，便知他天生艷福不淺，懶管這是否真桃花。遠在茄喱啡時候，祖藍已經在電視城開班授徒，教導陳敏之、陳法拉等一眾花旦演戲心得，他自嘲說：「我在劇集捧啤酒，他們已經做緊主角。」

祖藍自爆中學時人際關係很差，同學形容他不可一世，甚至小六的成績表，老師評語是：「具領導才能，但宜謙卑。」今時今日的祖藍，謙卑而不自卑，這一切是否來得要感謝神？

不能練精學懶

祖藍早前拍畢的賀歲片，令他遇上了一次信心危機，他說：「獎門人好嚴肅，佢唔畀我做好多老板斧，例如禁我做浮誇表情、獨腳戲，一定要同對手有交流，初頭都懷疑咁得唔得，但出嚟效果真係好笑啲。」祖藍自言對住張學友、袁詠儀這些影帝影后級人馬，無形壓力即成推動力，他說：「學友令到後生仔唔敢偷懶，佢一坐低就讀對白，而且佢有職業病，聽到音樂就自然吸埋去，聽你個Beat（音調）啱唔啱，有得同佢對唱好High（高漲），歌神嚟喎！」問到可有無形壓力？他說：「我最叻係練精學懶，但喺前輩面前有冇做功課佢一睇就知，冇辦法唔做好啲。」

拍咀戲硬晒軚

祖藍於片中被安排與高他一個頭的鍾嘉欣發展成情侶，高矮對白達到搞笑效果，問到女拍檔會否高了點？祖藍說：「任何我人對我嚟講，都高㗎喇，我哋有場激吻戲，對佢嚟講係噩夢。都Take咗十幾個Take，呢個世界好黑暗，最後剪咗一半有多，因為個戲太長，獎門人覺得我唔識錫嘛，埋嚟鬧我人哋女仔都識郁吓，我硬晒軚。」問到如何補償嘉欣？他說：「真係要有啲補償，但未諗到。」這場激吻戲於電梯中發生，祖藍自爆笑料說：「雖然劇情都係話佢高過我，但實在相差太多喇，拍時我要企蘋果箱墊高一級。」

九姑娘最好咀

祖藍咀嘉欣時被批評「唔識咀」，他尷尬說：「佢話我係咁含住佢上唇，感覺好奇怪，呢方面我係比較少經驗。」剛播畢的《情人眼裏高一D》，祖藍有幸與苟芸慧及阮小儀激咀，訓練有素後技術即突飛猛進，他奸笑說：「今年個嘴特別忙，（邊個最好咀？）係佢哋覺得好好咀，小儀話我個嘴似棉花雞，之後我特別留意黃宗澤、林峯，呢啲有豐富咀戲經驗嘅人，發覺自己個唇一個等於兩個。」再追問到他覺得誰最好咀？祖藍說：「九姑娘（苟芸慧）幾好咀，因為嘉欣、小儀拍時都有啲緊張，佢哋緊張會影響埋我，九姑娘一嚟就嚟，我就夠膽放膽去咀。」

後記：扮嘢王

祖藍雖然外形局限，但卻扮乜似乜，以往扮過的蘇施黃、Lady GaGa、Boy George均維肖維妙。訪問當天，攝影師叫他拿起茶杯拍照，他即陳豪上身說：「呢杯咖啡『Perfect池』！」在此解釋，陳豪在拍攝麥當勞McCafe廣告時，由於他說Perfect時，當中「t」的尾音說得太重，像加多一個「池」字一樣，因而受到網民恥笑。簡單的動作，便為這訪問帶動了輕鬆的氣氛，雖然他沒有小生的樣貌，但風趣幽默的性格更討人歡心。