掃貨迎新年
馮仁昭四圍超：甄子丹、馬德鐘冧妻大鬥法

十指緊扣嘅甄子丹同汪詩詩去 ifc行街，實行買餸返屋企玩煮飯仔。

踏入 2010年啦，馮仁超希望大家好似甄子丹同馬德鐘咁，同老婆恩恩愛愛，成日十指緊扣！日前兩位猛男趁有空檔即刻陪老婆 shopping，認真係好老公。
近日甄子丹喺上海拍緊新戲《精武風雲•陳真》，佢見有兩日假期即刻返香港，噚日陪老婆汪詩詩去 ifc嘅 city’super買餸煮飯仔，見佢哋又買和牛又買波士頓龍蝦，埋單要成 2600幾蚊。離開時甄子丹同汪詩詩大方接受訪問，詩詩好開心咁話：「今晚我哋一齊煮飯食，佢煮龍蝦。試過有次我生日佢親手煮龍蝦，當時我好 suprise佢居然識整，仲好好味。」講到新年願望，甄子丹就話：「最緊要係身體健康，老婆越嚟越靚，仔女健康開心。」反而獎項甄子丹就冇諗過，離開時有對新人要求同甄子丹影相，佢都來者不拒，鬼咁親民。

馬德鐘同老婆鍾意扮靚多啲，喺時裝店無論男或女裝都狂睇一餐。

甄子丹夫婦離開時遇到一對新人要求合照，佢哋咁恩愛直情可以做人辦啦。

老婆甜絲絲

至於馬德鐘前日下晝同老婆又係行 ifc，但佢哋就去行 Zara，現場見兩公婆男、女裝都有揀，出身模特兒嘅老婆仲細心為老公揀衫，兩個蹺手之餘又有講有笑，但係當馬德鐘見到記者立即同老婆彈開，表現避忌，不過佢老婆就露出甜蜜微笑，可想而知有老公陪係幾咁開心。