22歲的高海寧憑 34D巨胸被封新咪神，今年上位有望。

2010年月曆剛撕開新一頁，挾 09餘威的 32D周秀娜花臣多多依然有貨賣，企硬 o靚模界成為性感 icon；去年底電視圈卻殺出個戰鬥力驚人的 34D新咪神高海寧。
來自暴乳族的潮州妹高海寧，前年選港姐雖然大熱倒灶，然而鬥靚一役算是代母親圓星夢；今年她披甲上陣，再登戰場火併同鄉的谷胸高手周秀娜，自詡擁天然胸的高海寧繼續飲奶補胸、勤練瑜伽 keep fit， PK娜姐？未驚過！
2010年的 D級導彈大戰，如箭在弦。　撰文：朱倬誼

高海寧前年選港姐有頭威冇尾陣，戰果是旅遊大使豬肉獎一座，但有麝自然香，兩個月前她在 TVB節目巡禮波光乍現，一襲低胸裝盡騷本錢，挺起胸膛掃低全台花旦，翌日榮登各大報章 C1頭條。 22歲青春無敵，有樣有身材的高海寧火速彈出， 2010上位指日可待。

爆娜姐非大胸

擁 34D、 25、 36魔鬼身材的潮州妹高海寧平日慳爆，當日她豪花 4,200大元買下 BCBG奶神戰衣成功突圍，笑言：「使咗 4,200蚊買條裙係抵嘅。」還形容那襲戰衣效果「自自然然，我唔鍾意谷得好勁。」於是趁咪神師姐徐淑敏嫁人生仔攝位上、榮登 TVB新咪神，對戰同樣來自潮州的周秀娜（ Chrissie）。同鄉 D級女神互相廝殺，高海寧自信爆滿，未驚過。
「我做 model嘅時候，同 Chrissie一齊行過 catwalk，佢嘅身形真係好好，成個人好修長又有身材。啲人話佢個胸係假，我覺得係堅嘅。」有指 Chrissie一味靠谷，看過她全相的高海寧印證：「佢個胸唔係大家想像中咁巨大，佢係 fit，對腳又好瘦，天生麗質；我同佢唔同，我有啲水腫，圓碌碌。」

早前高海寧穿上這襲養眼低胸戰衣出席 TVB節目巡禮，成功撼低全台花旦。　資料圖片

周秀娜去年紅遍全港，同樣擁有勁爆身材的高海寧無懼與她正面交鋒。資料圖片

三代身材堅挺

現時高海寧除了練高溫瑜伽喼弗外，更會飲奶以形補形。

高海寧不抗拒新咪神稱號，也無懼別人將她與娜姐比較，「其實我哋兩個都好畀心機，對工作亦都好認真，我當然希望好似佢咁有人氣。 Chrissie好 friendly，可以做朋友，大家係良性競爭，所以我唔怕，有競爭係好事。」
高海寧胸前偉大，不知她會否因此感到自豪，她笑說：「我又唔覺得自己身材好好，因為我有好多肉，但整體我覺得 OK，我自己滿意，如果可以瘦啲更加好。」她自爆好身材是遺傳自母親優良 DNA：「我姨媽、細姨、婆婆都好勁，連我表妹都係，好堅 o架。」
遺傳好身材是其一，擁有靚胸也要靠後天修護，高海寧由細到大都喜歡飲奶，實行以形補形：「唔知關唔關事啦，到家仲飲緊，同埋呢排我有練高溫瑜伽，希望體態更美。」
高海寧那堅挺的胸部，經常成為別人口中的話題，「我唔介意，最緊要公司安排條路點行，我唔抗拒性感，件事出嚟健康性感就 OK。」
攝影：林德雄　髮型： Hair（ Match）　服裝： TED BAKER

乖女入行母激瘦

高海寧揚言遺傳了母親（左）優良 DNA，天生一副好身材。　資料圖片

不入港姐三甲並非末路，如今高海寧跑出，最欣慰的相信是高媽媽。
高海寧母女如同餅印，一直恨做歌星的高媽媽由於早早嫁人，無緣入娛樂圈，眼看女兒越大越可人，便游說囡囡參加港姐，希望女兒代她圓星夢。
高海寧說：「我入呢行，算係媽咪一直嘅夢想，有邊個媽咪唔覺得自己嘅仔女靚？我媽咪好後生結婚，佢唱歌好好聽，成日講話細個冇人培養，有人培養已經做咗歌星！佢好鍾意我入呢行，不過一有小小事佢又好緊張，家佢瘦到見晒骨。除咗擔心我學壞，之前我因為一啲負面新聞而唔開心，佢見到我有壓力時，佢又會覺得好內疚，又怕我睇唔開，所以佢好多嘢擔心 o架。」

自認慳妹

潮州妹高海寧自詡慳家，平日多數以地鐵代步。　資料圖片

高海寧祖籍潮州，她小時隨婆婆於南京生活，至 7、 8歲返港，故外界都誤會她是南京姑娘。她自稱出世時跟婆婆姓，她原名沈江莉， 18歲領取成人身份證時才改父姓，正式改名高海寧。
潮州人較節儉及刻苦耐勞，高海寧謂她也擁有這種潮州人特質：「爹哋都話我一係唔做，一做就會畀心機盡力做好，唔會 hea住。」她又自認是慳妹一名：「以前有父母錫，只要有需要佢哋都會買嘢畀我，但自從自己識搵錢後就好慳家，平日搭地鐵，如果出席隆重場合，衣着方面會盡量借，如果我覺得適合自己，平衫都一樣買。」

未捱過苦

高海寧的父母在女人街開檔賣銀器，入行之初她卻抗拒提及家底，她解釋說：「當時我唔講係驚煩到屋企人，所以冇公開，又唔係偷呃拐騙，我唔覺得係醜事，亦唔覺得因為咁嘅背景而有人會睇小我，大家都係辛苦賺錢啫。講真句，我由細到大，住南京定住香港，我都冇捱過苦，屋企人將我哋三姊弟照顧得好好，我自己覺得每個階段都好滿足，食得好、住得好、瞓得好，冇乜太大嘅改變。」難怪家庭是高海寧在外拼搏後的避風港。