內地大馬齊涉侵權
黎明告 Neway偷雞播逾百 MV

Leon嘅 Amusic忙於搞加州紅同 Neway侵權嘅事件，但佢噚日如常到北京宣傳新戲《火龍》。　《新浪娛樂》圖片

黎明（ Leon）揸弗嘅 Amusic日前發出律師信，指加州紅侵權擅自播出 Leon嘅兩首國語歌《是我》同埋《你懂我的愛》，結果前日記者再去旺角加州紅了解，發覺佢哋已經停播。點知啱啱收購咗加州紅嘅 Neway，同樣涉嫌侵權，喺內地同馬來西亞等地播 Amusic嘅卡拉 OK嘅 MV， Amusic已經入稟控告 Neway，事件真係越鬧越大。

指違反合作協議

Janice同師弟李治廷同樣有唔少 hit歌，唔少 K迷都好鍾意點嚟唱 o架。　資料圖片

日前 Neway先正式宣佈收購加州紅，但佢哋被指違反同 Amusic嘅合作協議，除咗喺各分店違規播放未經授權嘅《你懂我的愛》， Neway亦喺授權以外嘅地區包括深圳、廣州同馬來西亞，涉嫌違規使用 Amusic旗下嘅歌曲總數超過 100首，涉及歌手包括 Leon、光良、衞蘭、楊千嬅、李治廷、應昌佑同已經被 out嘅衞詩。
對於 Neway違反合作協議， Amusic行政總裁王凱文表示佢哋早於農曆年前已經向 Neway發律師信，如果佢哋喺今日（ 9日）仲未回覆， Amusic就會正式入稟法院控告 Neway。

望尊重知識產權

Leon一曲國語歌《是我》已經喺加州紅停播。

外界覺得 Neway收購咗加州紅之後可以話係壟斷卡拉 OK市場，至於會唔會擔心家因為歌曲版權要對簿公堂，會影響旗下歌手嘅宣傳？王凱文話：「卡拉 OK係用嚟畀大眾娛樂，樂迷喜歡歌手或者歌曲先會去點唱，呢個絕對唔係唱片公司用嚟宣傳嘅渠道，總之同業好應該尊重知識產權同合約精神。」

祖兒脫衣 13變拉鏈夾肉

甫開場容祖兒以一襲維多利亞式的舞衣出場，但原來以拉鏈作機關的舞衣可以大玩花臣。

容祖兒前晚在亞洲博覽館演出新城音樂會，她只穿一件衫上陣，但整件靚衫以拉鏈接合而成，她在台上不停變換衫款 13次之多，結果把身上維多利亞式的長裙除剩變為透視貼身舞衣。當演唱會去到尾聲時，祖兒再除拉鏈時拉及嫩肉而慘叫，訪問時祖兒又自爆中途返後台去洗手間，亦因為心急而拉傷嫩肉。

新城的「容祖兒我的女皇音樂會」前晚在機場亞洲博覽館舉行，除了主角祖兒外，她的師弟妹包括陳偉霆（ William）、鍾舒漫（ Sherman）、洪卓立（ Ken）及洪杰都有出場。為配合女皇主題，祖兒以一條維多利亞式靚裙登場，頭上則戴上一個類似「，」號的飾物，祖兒笑說：「逗號代表我雖然喺圈中已經 10年，但仍未完結，仲可以繼續。」

祖兒當晚由工作人員為她轉 look，足足在台上除衫 13次。

祖兒最後一變，以貼身舞衣演繹高難度動作，睇頭十足。

聲沙沙獻唱

全晚祖兒只穿一套衫，不過一樣睇頭十足，皆因整套衫由拉鏈組成，除下不同部位的拉鏈便變成另一款衫，當晚設計師 Sean K及工作人員先後上台為祖兒除衫 13次，最後把裙變成透視貼身舞衣，配合她連場勁舞，而其中一環節她被拉鏈夾到嫩肉而慘叫一聲。
當晚祖兒載歌載舞，只是她的聲線有點沙啞，她笑稱：「以前好怕把聲有事，但家發覺沙沙哋都唔錯，鵝公喉都可以有感情。」到師弟 Ken上台時，他提到之前曾大病一場差點要退出娛樂圈時一度嗚咽，此外 William及 Sherman則和祖兒在台上狂歌熱舞一番。
採訪：馬建華
攝影：仇志德