當旺帝后虎年喜相逢
祥仔、雯女情花開
柴九黎耀祥與四奶奶鄧萃雯恭祝本報讀者新年及情人節快樂。
今日是大年初一兼情人節，憑《巾幗梟雄》柴九及四奶奶角色榮登視帝視后寶座的黎耀祥和鄧萃雯，祝賀本報讀者新年及情人節快樂之餘，更預告今年 3月原班人馬開拍的《巾幗梟雄之義海豪情》中，二人將可以放膽去愛，祥仔更透露新劇中與雯女將有更進一步的親密鏡頭。 撰文：戴彩煥
剛過去的牛年可算是柴九黎耀祥和四奶奶鄧萃雯最豐收一年，因為二人眾望所歸憑《巾幗梟雄》成為視帝視后，帶挈二人名利雙收，接 job接到手軟。
柴九作情深款款狀捉實四奶奶玉手，卻令四奶奶忍俊不禁，笑到肚痛。
祥仔登台享情人節
今日是虎年大年初一兼情人節，祥仔將繼續努力工作銀，偕太太 Julia到美加登台做騷，順便在當地慶祝情人節，至於未有真情人的雯女，只好一早收爐休息，跟祥仔可謂相映成趣。
祥仔說：「雖然自己牛年做到成隻牛咁，但過年都唔會收爐，要去 LA同多倫多做騷，太太會陪我過去，個仔就留喺香港俾婆婆湊，不過我哋會喺嗰邊留低幾日玩吓休息吓，喺美加慶祝新年同情人節，到時太太睇啱乜嘢咪送畀佢做情人節禮物囉。」
憑柴九角色富貴又吉祥的黎耀祥，祝大家虎年如意吉祥。
雯女祝讀者心想事成，賺個盤滿缽滿。
合作新劇放膽去愛
今日柴九雖身在美加跟真情人 Julia共度，但仍識做地提早送上鮮花冧他的螢幕情人四奶奶。
雯女則笑謂：「我就一早收爐啦！忙咗成年，做咗好多嘢，所以放自己一個假期，加上《巾幗梟雄之義海豪情》下個月尾就開工，一開工就會好忙，所以我真係要放假叉電。過年難得唔使開工，我會陪吓屋企人，見吓啲好耐冇見嘅親朋戚友，佢哋話好想請我食飯恭喜我，但我一直唔得閒，家趁新年畀佢哋請我食飯又可以利是，簡直係一舉兩得啦。」雯女餐餐跟親友食飯大魚大肉，分分鐘跟祥仔一樣過肥年呢！
雖然四奶奶與柴九是觀眾心目中的螢幕情侶，但礙於《巾》劇以清末作背景，二人在《巾》劇中的感情瓜葛只能隱晦交代。不過，下月開拍的《義海豪情》中，二人終於有機會談談情，說說愛。祥仔說：「上次雯女個角色係人哋妾侍，今次佢做嘅黑幫大家姐係冇老公，我雖然有老婆，但個老婆後尾走咗佬，加上時代背境係民初，所以我同雯女可以放膽去愛，大家感情戲可以寫得更加深一啲。」
雯女羨慕祥仔夫婦
會否有親熱場面？祥仔笑說：「唔知 o架！家劇本只係出到 10幾集，但相信親密少少嘅鏡頭應該會有嘅。」雯女聞言遂笑說：「同祥仔太熟，我驚到時見到佢情深款款個樣，會忍唔住笑出嚟。不過，我係個專業嘅演員，鄧萃雯對住黎耀祥就會咁啫，但當我投入咗個角色度就唔會 o架啦。」
問雯女可希望虎年找個真情人時，她坦言：「見到祥仔身邊有 Julia咁細心照顧，真係好羨慕 o架，所以虎年都好希望能夠搵到個好細心體貼嘅情人啦。」雯女希望自己找到真情人時，亦不忘祝祥仔與 Julia追番個虎女，祥仔聞言笑道：「你估話生就生咩，盡力啦。」
攝影：陳慧安
髮型： Ivan Lee of headquarters（黎耀祥）、 Nelson Chang of Hair（鄧萃雯）
服裝：裕華國貨
場地：九龍夜上海
黎耀祥鄧萃雯抗拒公開煙韌
东方日报
出爐「視帝」黎耀祥與「視后」鄧萃雯憑「柴九」及「四奶奶」曖昧之情俘虜觀眾心，但現實中二人性格不合，只能攜手在幕前做最佳拍檔。
祥仔同老婆二人世界
五十多年來首個「當情人節遇上年初一」，最開心的應該是「住家男人」黎耀祥，此刻他正與太太Julia撇甩囝囝正橋，在美國登台兼過二人世界，搵銀浪漫一次過到手，豈不開心。問到以往最開心的情人節，祥仔說：「通常都係同老婆玩煮飯仔，唔使出去四周圍搵位，（咪唔浪漫？）唔係架，喺屋企一樣可以好浪漫，我點晒蠟燭，仲親手整鵝肝畀老婆食，（仲有咩冧招？）花就唔會送，掠水嘛，老婆都唔贊成，但我年年都送卡，寫埋啲感性嘢，試過寫詩，好浪漫架。」
問祥仔心目中的理想情人需具備甚麼條件？他就坦言：「就係好似老婆咁囉，全方位幫到手，可以好似朋友咁做聆聽者。我外表雖然堅強但好需要人關心同開解。」
黎耀祥自爆冧老婆招數。
今年情人節，祥仔會跟太太Julia到美國過二人世界。
雯女男友離枱三呎坐
雙魚座的雯女自命有顆浪漫的心，以往拍拖有不少難忘的情節，但礙於公眾人物的身份，雯女只有在外地時才會與男友煙韌一番，她透露：「喺香港試過同男友生日食飯慶祝，因為唔公開得兼周圍係人，兩個坐到離枱三呎，我會錫住食飯架嘛，但嗰次要好守禮，按住自己嘅熱情。」至於理想情人，雯女只要求對方能體諒她及包容她的工作，但就慨嘆非常難求。
互窒唔啱心水
祥仔和雯女戲內戲外均十分合拍，更曾離奇傳出緋聞。對於雯女是否具備好情人的條件，祥仔即「落閘」說：「佢太倔強，鍾意拗嘢，好難談情嘅。佢原則性太強，工作上有爭拗可以配合，可以做螢幕情人，私下談情就唔係咁好喇，我同老婆好少爭拗。」被評為「硬倔倔」的雯女即作出抗議：「我冇當佢係情人梗係拗啦！真實嘅我唔係咁架，嗰個係工作上嘅我，我都有溫柔嘅一面，不過好多年冇拍拖，好耐冇用，都唔記得溫柔嗰個Tone。」
當問到祥仔是否她的理想情人，雯女即笑住反擊說：「睇唔到有咩條件啱，但睇到有唔啱嘅，就係佢好需要人照顧。我都係要人照顧嘅人，咁邊個照顧邊個呀？」
「柴九」及「四奶奶」同時獲封視帝視后，相當難得。
無意踩入影圈
在電視圈努力多年，祥仔和雯女終於摘下視帝視后殊榮。問二人會否以影帝影后作終極目標？祥仔坦言沒想過，且滿意在電視的成績：「淨係想《巾幗梟雄之義海豪情》整體有更好成績，視帝都攞咗，再攞都係嗰啲嘢啦。」
而雯女一向不重視獎項，她與祥仔想法一致，只望《巾2》再創高峰：「近年知道香港觀眾好錫我，感受到嗰種溫暖，大家對《巾2》咁期待，所以拍好呢個劇係今年主要嘅事，唔可以令觀眾失望。」
採訪：影視組
攝影：黎志輝
場地、服裝：中藝
髮型：Ivan Lee@Headquarters（黎耀祥）Nelson Chang@Hair（鄧萃雯）
化妝：Omix B.（鄧萃雯）
