相信很多人都聽過「樂易玲」的大名，被喻為方逸華的左右手、TVB製作資源部副總監的女強人，在管理旗下近百藝人的四年間，能剛柔並濟，把藝員部管理得妥妥當當。說到藝人的感情瓜葛，我更投以百份百信任、出力聲援，誓要為這班仔女的清白，捍衛到底。

要說近期的熱爆新聞，非羨妮與大宇的緋聞莫屬，坦言孰真孰假，只有當事人才知曉，作為經理人，只能站在場邊細心觀察、分析，為他們排難解紛。真心講，緋聞係咪真﹖得佢兩個自己知，但站在演員立場來說，如果拍情戲唔投入，跟對手冇感情又點得呢﹖我冇問佢劇裏發生咩事，因為我覺得唔需要問，佢一定對對方有好感，唔係點做情侶﹖點會無端端有個接吻鏡頭﹖但你問我，我一定覺得佢冇，因為我知道郭羨妮早前拍《古靈精探》期間，病得好辛苦，出出入入醫院咁多次，只得我、佢阿媽同佩華陪佢，我從來冇見過有男性朋友打電話慰問佢，佢又瘦、面又青，情緒仲好低落，如果件事係真，點解唔見佢探病﹖站在他們立場，我覺得佢兩個依家真係冇。作為專業演員，演戲當然要全情投入，這是無可厚非的事實，但演員同時要承受無止境的蜚短流長，壓力之大，實非旁人能道，就以大宇為例，今次事件，他本人、太太，甚至羨妮都是當中的受害者。 我覺得就呢件事來說，佢三個都係受害者，你話Sonija形象差﹖那大宇同佢太太換來婚姻失敗喎，兩樣都好傷，你唔可以話，Sonija形象受損，就要我或者Sonija企出講會傷害第三者的說話，最好的解決方法是時間，讓大家傷口冇咁深先再去補救，話我放棄Sonija﹖佢同Management約仲有幾年，我唔可以放棄我手上的藝人﹔我覺得Sonija實在太內向，又冇朋友，又唔鍾意出街，成日困住屋企，連狗都唔敢出街放，佢好驚睇到自己新聞，因為寫親都唔係好，呢d係藝人悲哀，個個都好怕出街俾人影、俾人寫，唔似阿佘咁勇敢，話之你點寫。

別人眼中，我高高在上、有無盡威嚴，說到旗下藝人的前途、利益，我更會捍衛到底，記得年前鄭嘉穎與前經理人的合約糾紛，都是我出面調停。鄭嘉穎個人好真、好誠實，唔會講大話，係有d少爺仔脾氣，可能因為少年得志，不過如果冇台灣的挫敗，佢唔會有今日的成就﹔我記得當日簽嘉穎時，大家傾左好耐，我知佢台灣遇到唔開心的事，但佢本身條件唔錯，年齡、樣貌都符合我要求，點解唔簽﹖至於佢同戴思聰單Case，就連佢自己都唔記得，當佢同我講呢件事時，我同佢講﹕有危先有機，你要把握呢個『危』變成自己的機﹗只要我推你上去時，你唔好掙扎、唔好踢開我就得。

TVB旗下藝人眾多，難免會出現偏心之說，雖然我一再強調，公司從不偏心，但正所謂「人心肉造」每年例必集體偏心，絕無可能真的一視同仁吧，再者，有幸被我點名力捧的，總能在娛樂圈裏大紅大紫。首先你要明白Management藝人一定要兼顧好多，要睇住佢生理、心理狀況，起居飲食都要了解，拍完劇，就要捉佢傾偈，了解有咩困難﹔我每年都有Plan做邊幾個，名會寫出來，再同方姐匯報，譬如佘詩曼、鄭嘉穎、陳豪、郭晉安、林保怡，呢班上一線的，就要推向海外、大陸巿場﹔而黃宗澤、吳卓羲、林峯、胡杏兒、鍾嘉欣，呢班比較年輕的，就要推上一線位﹔跟住陳法拉、楊思琦、馬國明、高鈞賢，呢班就要再推高，同時，我想畀廖碧兒、徐子珊出去拍電影，仲有黃德斌，佢性格、位置已經企得好穩，我就要推佢去大陸巿場，呢d都係我Planning ，你話呢d係偏心﹖我諗我真係幾多心。

要知道，藝人的形象很重要，但當中最令經理人頭痛的，莫過於管制藝人的言論，記得年前港姐冠軍徐子珊公言在大氣電波上發表其「性愛」偉論，結果引來廣泛輿論。我記得那件事發生後，我同徐子珊傾了幾個鐘頭，知道佢真係鬼妹仔性格所致，但我一定要佢明白，中國人社會，尤其做呢行，唔可以咁做，加上佢係港姐出身，你一日係港姐，你一世都係港姐，要保護呢個形象，我要佢學識保護自己，佢咁做，只係傷害緊自己，今年港姐唔得﹖出年會再有另一批，要食呢行飯就要識得保護自己，佢好聰明，真係肯聽、肯改，依家關係好Close，同時亦好高興見到佢同媽咪關係好，要知道，家庭生活好重要，出面擔風擋雨，如果返到屋企冇家人Support﹖真係好難捱。