肥田囧樣 躍變怒火鳳凰

每個人都有迷失的時候。

胡杏兒入行 12年,嘗到高低起跌,她的演藝事業就好似日本富士急的 Dodonpa過山車一樣,衝過很多小圈之後,垂直攀升, 06年她到達事業第一個頂峯,三個月增肥 40磅演何美田成為一時佳話,頂峯過後,以時速 100公里 121度俯衝直插,嚇至面容扭曲,魂不附體,以後的 3年做戲亦只是得個囧樣。苦痛沉屈的日子過去,胡杏兒重拾自信,終於再次站起來,現正計劃向「視后」的終點進發。 撰文:楊潔雯

如果每一個人可以用文字來代表,林峯是 chok,胡杏兒一定是囧。

囧其實是一個漢語古字,古語所言雙目有神,則形容為炯,是跟囧同義。不過,經過一班高登仔惡搞之後,變成一個網絡火星文字,一個網上熱爆的表情符號,被指囧樣即是「你個樣好委屈!」

胡杏兒的演藝之路,有如坐過山車一樣,有高亦有低,而她就從中學了不少人生哲理。br/攝影:葉君海 

胡杏兒的演藝之路,有如坐過山車一樣,有高亦有低,而她就從中學了不少人生哲理。
攝影:葉君海

有網友曾將杏兒演劇時的悲情樣與囧樣相提並論。互聯網圖片

有網友曾將杏兒演劇時的悲情樣與囧樣相提並論。互聯網圖片

杏兒增肥 40磅演《肥田囍事》成為一時熱話。劇照

杏兒增肥 40磅演《肥田囍事》成為一時熱話。劇照

囧字惹的禍

囧字對胡杏兒別具意義,囧字令她跌入人生谷底,卻又提醒她不要放棄,杏兒說:「以前都好有觀眾緣,唔知點解突然冇晒!記得 06年,我都仲算係好新,拍《肥田囍事》嗰時,唔知自己係咁威,差唔多每個外景都有記者探我班。諗番起先知傳媒對我好好,係我唔識珍惜,嗰陣係吹捧得好勁,公司突然又加多一個獎,當時嘅我知道自己冇可能贏到阿佘,不過嗰時俾我感覺好似想捧我咁,覺得自己有機會,一個大一個細,我諗自己咁辛苦,公司都應該會畀個獎仔我啩!就當係勤工獎,所以嗰時好老定!點知出嚟食白果,嗰吓好記得,其實我唔介意輸,都預咗輸,但冇諗過輸得咁徹底。之後仲要頂硬上去慶功,當時如果唔去好小家囉!我去又點呢?係咁俾人影個落敗樣,好難頂,亦都係個經歷。」
胡杏兒是隻好性又自尊心強的蠍子,那年被徹底打敗,變得一蹶不振。她說:「嗰年頒獎禮後,再有唔同抨擊,就係嗰時開始,打沉我演戲嘅信心。」然後她用帶有恐嚇成份的比喻來說服面前的聽眾,她說:「你知嗎!演戲冇信心係件好恐怖嘅事,就好似你做記者,突然寫唔到嘢咁樣,好慘!當時我係一個反應都唔識做,再唔係得心應手,連做個反應都懷疑自己,我覺得好辛苦!我諗我冇信心咗起碼兩三年,好痛苦,不斷 question自己究竟係咪真係咁差,但家過咗,我覺得係好事,呢個都係學習過程,冇嗰時嘅杏兒,就冇家嘅杏兒。」

今年憑《萬凰之王》角逐視后,令杏兒的事業更上一層樓。劇照

今年憑《萬凰之王》角逐視后,令杏兒的事業更上一層樓。劇照

拍攝《魚躍在花見》時,杏兒受到張智霖的啟發。劇照

拍攝《魚躍在花見》時,杏兒受到張智霖的啟發。劇照

萌輕生念頭

指南針受磁場影響,找不到正確方向,不過,胡杏兒個性頑強,下決心再撐起身子,傷痛期間還多得兩位姊姊全方位照顧,她說:「淨係匿喺屋企,真係會有輕生念頭,嗰時個人好 emotional,好易觸動到脾氣同情緒,唔想同人傾偈溝通。我只係同兩個家姐傾訴,我好慶幸有佢哋,有時佢哋唔一定會明白,但一啖烏氣唔吐出嚟,會好唔舒服。」
胡杏兒另一個成長的轉捩點,是遇到拍攝《魚躍在花見》的劉松仁和張智霖,她說:「令我好番嘅,係松哥同 Chilam,我最初拍嗰時好冇信心,問 Chilam就知,知道個角色係公主病,我又怕會做到好乞人憎,又要可愛,又有乞人憎嘅元素,唔知點演。好彩 Chilam係個好清嘅演員,演戲唔係好似演緊,好生活化,對我好有個新衝擊。至於松哥係前輩,教我好多演技同道理。最後出嚟人哋又鍾意,個人先定番,所以觀眾認同對演員好重要,我知道點解我咁在意觀眾認唔認同我,因為我鍾意做戲!」

經歷低潮時,杏兒幸獲兩位姊姊的支持。

經歷低潮時,杏兒幸獲兩位姊姊的支持。

很怕一個人住的杏兒,盼望有個家庭。

很怕一個人住的杏兒,盼望有個家庭。

愛情百分百

即使被拍得與黃宗澤出雙入對,杏兒從不肯承認戀情。資料圖片

即使被拍得與黃宗澤出雙入對,杏兒從不肯承認戀情。資料圖片

《我的野蠻奶奶》是度身訂做給胡杏兒和黃宗澤的,此劇製造幕前情侶,然後造就一對地下情人,再發展成大家眼中的戀人,本是最合襯的一對,最奇怪的是,即使被影到共處一室,不知何解仍未肯確認身份。偶像派?過時了,眼看陳豪和陳茵媺多甜蜜,搞到藝人變偽人,何苦呢?
問胡杏兒何時跟黃宗澤拍拖,她一定無話可說。換個問題,你兩個幾時開始傳緋聞?她說:「拍《野蠻奶奶》開始,佢話 7年之癢嘛!」在娛圈怎樣維繫一段感情呢?她說:「我好儍,永遠係攞個心出嚟。我唔鍾意玩手段,係愛你就愛你,唔愛你睬你都儍,如果要用好多方法 keep住呢個人,會好攰!我係愛你, That’s it!我會全心全意對你。」黃宗澤收到未!

不想一個人住

剛剛 32歲的胡杏兒還未說完,她想擁有一個家:「我想有個 family, family對我嚟講好緊要,我好怕一個人,我唔可以堅強到一個人生活,我都想做張曼玉,咁勁一個人生活。我家同家姐住,之前試過一個人住,返到屋企就開晒成間屋嘅電器,我想有屋企人,有 family,我就係個要背後有嘢嘅人。」是甚麼?黃宗澤想吓喇!

衝擊視后 天時地利

現正有一股由電視城吹出來的烈風,顯示胡杏兒會是今年的視后大熱。胡杏兒憑《萬凰之王》沅宛一角角逐視后,沅宛貴為皇后,又是後宮之首,演皇后可以做視后,攞景兼贈興,她說:「我成日講攞獎係天時地利,《萬凰之王》係我今年第三套劇,頭一套《魚躍在花見》,年中《怒火街頭》,《萬凰》唔知反應點。」

唔想贏年資

論資排輩, 12年胡杏兒大勝 5年貨仔陳法拉,今年楊怡和鍾嘉欣又未入流,杏兒勝券在握:「信心都有八成,但如果係贏,梗係唔希望因為年資喇!希望係觀眾認同而贏!但我都擔心《萬凰》,唔算做得好好,有瑕疵,不過我都安慰自己,《萬凰》唔鍾意,都仲有《怒火》同《魚躍》。」

化妝: Phoebe@ Bravo Workshop
手錶: Temporis
服裝: 2068


本文鏈接:肥田囧樣 躍變怒火鳳凰