下周結婚舊愛爆大鑊
黃澤鋒疑腳踏數船被捉姦

謝小姐昨日接受訪問細說黃澤鋒一腳踏幾船。

黃澤鋒下周一與任職時裝設計師的圈外女友陳麗麗（ Lilian）拉埋天窗。不過，在黃澤鋒喜事將近之際，其前女友謝小姐卻在舊愛婚前「送大禮」，狂數黃澤鋒曾經一腳踏幾船，除借拜佛為名媾女外，謝小姐更聲稱試過捉姦成功。

一名聲稱是黃澤鋒前女友的謝小姐前日主動聯絡本報，指自己與黃澤鋒拍拖三年期間，多次出現第三者，揚言要踢爆黃澤鋒的真面目，同時她又提供了一些黃澤鋒和其他女子的合照，以證明舊愛曾與許多女子交往。

《舊愛》
黃澤鋒舊愛謝小姐（左）力斥黃澤鋒風流，更謂最後受不了男友有其他女人而分手。

《未婚妻》
黃澤鋒和 Lilian下周結婚，黃澤鋒卻被指曾腳踏數船， BoBo和 GiGi也是其女友之一。

《女友 1號》

《女友 2號》

女友入屋吵鑊金

據悉謝小姐與黃澤鋒是香港泰拳理事會成員，二人是同門師兄妹。昨日謝小姐在尖沙嘴接受本報記者訪問時說：「相入面個女仔叫 BoBo，佢哋係 07年 2月 17日相識，當時我都在場，佢哋交換咗電話，一個月後就拍拖。」
問謝小姐如何得知黃澤鋒與 BoBo交往？她說：「上到人哋屋企發覺有唔屬於佢嘅煙頭，有人聽電話習慣改晒，點會唔知。」
謝小姐續說：「我同佢冇同居，但住隔籬街，初時佢都有畀屋企鎖匙我，但兩星期後問我攞番，話老友個老公喺外國返嚟要借宿，就再冇畀番條鎖匙我。」
謝小姐還聲稱試過當場捉姦，她說：「去到佢（黃澤鋒）屋企門口，打個女人（ BoBo）電話，就聽到入面有電話響聲，最後入到屋同佢（黃澤鋒）吵鑊金。」問有否大打出手？她說：「我都想郁條女，佢（黃澤鋒）好醒，即刻推條女入房，我出得手條女已經唔會喺呢個世界。」
那黃澤鋒如何一腳踏幾船？謝小姐說：「我 05年喺 disco識佢， 06年頭開始拍拖， 09年 5月 15號分手，佢同我講 04年 1月已同太太離咗婚，雖然我哋拍拖，但我都知當時佢都有其他女友，所以冇出聲，多謝報紙寫咗佢同筱靖，單嘢爆咗出嚟，其他女人都走晒，得番我一個。」
問謝小姐與黃澤鋒分手原因，她說：「當連續三次出現第三者，冇可能再一齊，佢喺 BoBo之前，仲俾我知同一個叫 GiGi嘅女人一齊，佢哋家仲有聯絡，直到 08年喺 facebook識埋家話結婚個女人（ Lilian），一個女人點會半夜三更打畀你呀。初時我都想畀機會佢，都同佢發過爛渣，但最後都係覺得非走不可。」

借拜佛連環女

今次爆大鑊是否為報復？謝小姐說：「冇動機，只係睇唔過眼有人話自己係佛教徒，最嬲係借拜佛為名去識女，又再識第二條女。」她表示現時一星期仍會和黃澤鋒見面三次，因大家在同一間拳館打泰拳，分手初時大家仍保持朋友關係，但後期已此情不再。
雖然在謝小姐口中黃澤鋒媾女無數，曾同一時間內有三至四位女友，但她也讚賞舊愛說：「佢對女人好好，仲會煮埋飯畀我食，就算 05、 06年佢事業低潮期，炒埋車，經濟唔掂，仍然好硬頸唔要我用錢幫佢，不過我哋拍拖咁耐都係 AA制，最多係餐餐去茶餐廳食飯。」
採訪：魯萍

有情歲月：女人緣勁旺

筱靖

快將 45歲的黃澤鋒，曾是香港泳隊代表，贏過「香港渡海泳」冠軍，後加盟 TVB當藝員。雖然演藝事業未見突出，但女人緣卻非常旺盛。

女友： Lilian
簡介：任職時裝設計師，下周一將與黃澤鋒拉埋天窗。

女友：謝小姐
簡介：聲稱是黃澤鋒舊愛，昨日狂數對方，並指曾捉姦在床。

女友： Winnie
簡介：兩人於 99年訂婚，又合資開了麻辣小喇叭火鍋店，火鍋店 04年結業，兩人戀情也告終。

女友：筱靖
簡介：亞視藝員筱靖去年被踢爆數年前曾搭上黃澤鋒，當時黃與 Winnie仍未分手。

女友：阿池
簡介：林家棟前女友，多年前曾與黃澤鋒拍拖，又有指曾與筱靖為爭黃澤鋒而打架。

資料來源：《蘋果》資料室

黃澤鋒：佢係個癲嘅人

結婚申請書顯示黃澤鋒未結過婚，原來他當年與前妻 Winnie只擺酒而未有註冊。

對於被前女友謝小姐指一腳踏幾船，黃澤鋒昨日在電話中反指遭女方威脅及電話騷擾要求復合，他說：「我 09年同佢分手後先識我太太（準太太陳麗麗），雖然大家仲喺同一個會打泰拳，但見到佢我冇嘢講，大家分咗手成年，佢仲不斷打電話畀我，想話復合，但我唔肯。佢睇到《蘋果》知我結婚後發咗癲，打咗二、三十次電話畀我，又要脅我話同傳媒爆大鑊。我唔聽佢電話，佢就打畀我太太騷擾佢。」

「真係頂佢唔順」

黃澤鋒表示準太太一早知道前女友行徑，形容跟舊愛謝小姐拍拖三年來都很辛苦，他說：「我真係頂佢唔順，我所有朋友佢都當敵人，成日 check我 email、電話同 facebook。我 facebook禁制咗佢，佢就好似電影《 Fatal Attraction》（孽緣）咁，佢係個癲嘅人，男歡女愛合則來不合則去，你要脅我，我係唔會怕你。」
至於被指一腳踏幾船，黃澤鋒說：「佢要點講就點講，我又未結婚，朋友係有好多，但影幅相係咪代表乜嘢？ BoBo同 GiGi都係我朋友，如果我真係咁仆街，佢哋唔會仲同我聯絡啦。我要交代嘅話，只需要同太太交代，其他人我唔理，佢放唔低我都冇辦法。」採訪：林妃