苟芸慧減肥着泳衣搵銀

苟芸慧噚日喺大角嘴出席「智 Fun復活嘉年華」，為小朋友嘅天才表演做評判。苟芸慧好鍾意細路仔，入行前試過喺加拿大做保母，佢話：「小朋友係未來社會嘅棟樑，一定要好好照顧同教育，唔好畀佢哋染上壞習慣。」苟芸慧之前出埠拍飲食節目，搞到暴肥返香港，佢苦笑話：「我都知衰，家要認真減肥，夏天要有靚樣見人呀。」佢又話唔介意接泳衣騷，最緊要性感得嚟健康。

沈卓盈慶幸去唔到泰國

沈卓盈（圖）同司徒瑞祈（阿水）噚日到九龍灣出席復活節活動，佢哋用環保物料互相為大家設計服飾，沈卓盈將阿水打扮成「 Lady Water」，非常搞鬼。
今日生日嘅沈卓盈原先計劃去泰國過生日，最終因為接咗工作被迫臨時取消，不過佢都好慶幸自己最終冇去到泰國，因為近日當地嘅紅衫軍又再次出動喺曼谷市區集會，如果邊度都去唔到，又真係幾掃興嘅。