萬綺雯時間靜止

自問看過亞視的節目不多,不過亦曾捧過當年大熱《我和殭屍有個約會》的場,而對萬綺雯的印象亦停留於「馬小玲」的迷你裙造型。時間在她身上像過得特別慢,縱然出道多年,但看起來都一如往昔。自婚後,她可謂過着養尊處優的生活,不過偶爾戲癮發都會「復出」,像今次拍《追凶》般。 今日再見到她,42吋的美腿依舊一樣的長,訪問時連導演彭發都不禁說:「所以我第一場戲都要佢企高換燈膽。」對於突如其來的「讚賞」,萬綺雯聽到後不禁大笑起來。

萬綺雯

人妻生活

常說做人妻後的萬綺雯減產,過着悠然自得的生活,但當事人卻是渾然不覺。「我嘅工作都無咩點話畀人知,做完就返嚟,並無刻意減產。因為我鍾意就會繼續接。除非你話我呢排真係好攰,就會唔做住。」

其實多年來她亦曾於別處找興趣,但偏偏最愛仍然是演戲。所以即使拍《追凶》要吊威也吊到十幾層樓高,畏高的她都願意去做。「其他事總係無演戲嗰種滿足感。你演繹第二個人,去做人哋個世界又係另一樣嘢嚟,我嚮往做人哋嘅世界,我覺得好得意。 」

想做就做,想休息就休息,雖說她不多產,但從不乏想找她合作的人。就如曾想將她挖角多次的無綫,到近日終成事。「其實係timing,好有誠意,佢哋offer畀我嘅嘢我又覺得ok嘅 。有時你做嘢會有個感覺喺度,因為傾嘅過程好好傾,所以都無考慮太耐。」

時機成熟

其實無綫自從《我和殭屍有個約會》時已經開始想招攬她到旗下,但卻一直慘食閉門羹。偏偏適逢「花旦荒」,伊人才首肯。

「以前佢哋搵我係《殭屍1》之後,嗰陣時大家都唔睇好,放埋一邊唔出。但係一出街收視好,拍得辛苦又有口碑,咁我覺得當時走真係走唔到。 之後再搵我無走到,係因為當時心入面plan定我要離開呢一行一段時間去第度讀書,我又無諗到我會閃婚㗎,咁又讀唔到書,繼續做嘢。而家係覺得只拍20集,又係喜劇,同埋有郭晉安、王祖藍做對手,我又覺得好好,咁就接囉。」

恨做媽媽

與老公結婚多年,一直都過着二人世界,但原來她一直都想做母親。「好鍾意BB,但係要搞好身體先。」說的是以前拍劇拍到五癆七傷,令到她現在不時仍然受到傷患困擾。

「以前啲舊患,令到坐骨神經有問題。轉天氣嘅時候,就所有舊患的痛都出晒嚟。睇過好多醫生,紓緩到,但係仲係會痛,有時會痛到坐喺度喊。」

她亦坦言將來會有領養的可能,但係與老公的二人世界又令她未捨得放手。「而家嘅相處方式好舒服,雖然老公好忙,但有時我心癮起可以返大陸做9個月舞台劇都得。有BB,以我嘅性格,我一定會湊,唔會假手於人。」

撰文:kia 攝影:sing 髮型:Domanic Tao @ Orient 4
化妝:Jenny Tziong 場地:The Mira Hong Kong

萬綺雯


本文鏈接:萬綺雯時間靜止