留港度歲伴雙親　葉翠翠蕭正楠願事業更上層樓

踏入虎年，葉翠翠跟蕭正楠（Edwin）雖然工作在身未能出埠度歲，但兩人仍不忘相約到迪士尼樂園暢遊，高興一下！翠翠跟Edwin更藉機向《成報》讀者拜年，翠翠祝大家「虎年行大運！心想事成！」Edwin祝大家「虎虎生威！身體健康！」

Edwin與翠翠來到主題公園，齊齊變大細路。

農曆年期間暢遊主題公園，遇上大批遊客，仍不減翠翠與Edwin的雅興，翠翠今次首度暢遊主題公園，而去年曾在樂園慶祝生日的Edwin，則充當導遊介紹翠翠玩遊戲，翠翠玩過「飛越太空山」後，大叫好玩刺激，不過最慘還是Edwin，翠翠坐在他身旁不停尖叫，令他的耳朵受罪。及後，兩人不忘與身穿唐裝的米奇及米妮合照，更被他們讚靚仔、靚女，在樂園玩了一整天，Edwin又請翠翠品嘗新年餐應節。

翠翠、Edwin與米奇、米妮向讀者送上祝福。

談到為何兩人會成好友，Edwin謂「我都算係翠翠前輩，加入娛樂圈七八年，後來去咗北京發展，不過加入無綫呢個大家庭，翠翠就係我師姐。之前我參加綜藝節目，嗰陣佢擔任司儀，之後又合作《宮心計》，我飾演皇帝，佢就係其中一個妃子，加上常會撞見，慢慢開始傾偈就熟落咗。」

買桃花旺人緣

農曆新年期間，翠翠只得兩三日假期，她說：「我都係陪家人啦！年三十晚跟阿爺食飯，初一陪父母去拜年，初四已經要開工拍《公主嫁到》，我仲準備咗利是畀家中嘅寶貝寵物，當然父母嘅利是都唔少得啦！」翠翠坦言去年過得開心，算是順風順水，工作方面亦不錯，她透露今年盼人緣更旺，故特別跟父母行花市買桃花，她說︰「其實我買咗幾年桃花，並唔係要行桃花運，只係覺得擺喺屋企好靚，除咗買桃花，仲買咗其他花，我哋呢行好需要人緣，所以新一年都希望人緣旺啦！」至於感情事，她則謂現階段盼專心工作。談到新年願望，翠翠希望事非遠離，事業順利，最重要是自己跟家人身體健康！

Edwin充當臨時情人餵翠翠食嘢。

新年一家團圓

至於Edwin今個虎年隨家人向親戚拜年，他說︰「因為新年係一家人難得聚喺一起嘅日子，所以我好重視新年，雖然之前三年喺內地發展，但我都會專程抽時間嚟香港跟家人一齊過，陪媽咪到親戚家拜年，因為嗰時媽咪好擔心我一個人喺外面工作，試過有一年因內地有工作，未必可抽時間返嚟陪媽咪過年，媽咪好唔開心，差啲要同我反面，知道後即返嚟陪咗佢兩日，佢成個人都開心番。其實媽咪都知我喺外面工作辛苦，可能中國人好重視農曆新年，希望喺大日子可以一家團圓。」今年農曆新年大年初一，Edwin也有工作在身，他要出席公司的新春活動，又要做花車巡遊，休息三日，便要為新劇《公主嫁到》進行拍攝。最令他開心是玩遊戲時贏得金虎，可算是新一年的好意頭。至於新年願望，Edwin說：「希望家人身體健康！開心快樂！自己嘅事業可以發展得更好，可以嘗試唔同角色。」

翠翠與Edwin化身童話故事的公主與王子

翠翠擊鼓，盼是非遠離。

Edwin祝大家事業愛情兩得意。

＜採訪＞慧芳

＜攝影＞吳國明

＜場地提供＞迪士尼樂園