蔡少芬在劇集中扮演女超人，雖然辛苦，但也甚感驕傲。

蔡少芬（ Ada）近日在無綫劇集《飛女正傳》中飾演一個有事業但沒愛情的「港女」梁巧芝，因一次意外竟令她能靠咀型男而變身成樣靚身材正的女超人 Janet Bin。咀戲連場的她更要被篤胸，難怪她大嘆「好蝕」。

蔡少芬和黃德斌日前在中環接受本報訪問， Ada直言在《飛女正傳》中一人分飾兩角不容易，她笑說：「呢兩個角色一啲都唔 easy，仲係好難，試過有一次講我着住肥妹裝喺山上跑去救陳豪，搞到我喘晒氣，又焗到出晒汗，身痕又唔到。」

蔡少芬與黃德斌有咀戲又有吊威吔戲，兩人更齊齊克服畏高。

只有咀型男才能變身成超人，蔡少芬拍此劇自言大犧牲。劇照

「監製真係好衰」

Ada續說：「我要咀咗人先可以變身，我真係唔想咀佢哋（劇中男角陳豪、黃德斌和曹永廉等），我從影以嚟都未試過一部戲要咀咁多人，我仲同德斌有場喺半空差啲咀埋嘅談情戲，又要俾佢篤我個死穴，即係喺個胸度，好毒呀！呢個監製真係好衰，咁多地方唔揀，係要寫個死穴喺胸度，我真係好蝕。」她又透露劇中還有很多尷尬場面，不過詳情當然要賣個關子。
但 Ada也因此而驕傲，她說：「我真係要講喺電視史上冇拍過超人戲，我有份做都好驕傲，我仲期待咗好耐，我真係做得好辛苦，唔係 Janet Bin就係梁巧芝，幾乎場場戲都有份，但係出嚟個效果好好，所以我唔理收視係幾多，我已經當係自己嘅代表作。」

吊威吔畏高死撐

黃德斌也對 Ada讚不絕口，他說：「喺戲入面除咗 Ada之外，我諗我係第二個吊威吔最多嘅人，我哋第一日開工已經吊威吔，次次都吊得好高，最慘係我哋都畏高，但係 Ada話驚就兩份驚，要慢慢克服，我梗係唔可以衰俾佢睇，所以我都好佩服佢。」 Ada即飄飄然說：「我都好佩服自己，我覺得自己係一個好出色嘅跳樓人。」向來型到爆嘅黃德斌形容今次在劇中是破格演出，他說：「有好多嘢係諗唔到會咁樣做，雖然未必係想像中嘅喜劇，不過會令你對我改觀。」
採訪：何慧斯
攝影：葉君海、陳慧安