香港人平均壽命是86歲，蔡少芬（Ada）還未活到這一半，已經歷了很多人一個世紀都未遇過的事，但她仍能樂觀面對，並懷有感恩之心。在新劇《飛女正傳》扮演女超人的她，現實生活中也是一名「神奇女俠」。

在單親家庭長大，Ada自小要跟從避債的母親不停搬家。1991年，只有17歲的她當選港姐，入行後她只顧工作，為的是替豪賭的母親償還賭債。

1995年，Ada因為對人生絕望產生自殺念頭，幸而聽到神的召喚，她打消尋死念頭，從此成為基督教徒。5年後，替母親還了過千萬賭債，她認為已足夠償還了母親的養育之恩，不再為母親揹任何債項，斷言斷絕母女關係。

2008年，剛與張晉新婚不久，Ada在蜜月期間確診患上有可能導致終身癱瘓的強直性脊椎炎，令她再度陷入絕望中。再一次因為神的力量，她深信難過的事情有多大，在她身上的祝福亦是同等，因而樂觀接受及面對。

撰文：霍淇
攝影：TungStar
髮型：Barry Tran @ HAIR CORNER
場地：di LUX

在新劇《飛女正傳》中，Ada飾演的梁巧芝，本來是一個自信心強的事業型的女性，因為一次意外，梁巧芝發現自己只要吸收男性賀爾蒙，身體的基因就會變異，成為身材惹火、能飛天遁地、刀槍不入的女超人。

劇中，Ada經常要飛天，但她本身有腰患，問到拍攝時不停吊威左飛右飛，會否擔心加深病況？她說：「都有擔心，但問過醫生，佢話『強直性』呢個病對女性嚟講唔係好嚴重，最緊要係保持適當運動，腰痛就食止痛藥。有呢個病我都感恩，因為又唔係喺塊臉度，又唔係令我拍唔到嘢，亦唔會影響生育，最多都係臨瞓前覺得比較痛。」

你唔要畀我

戲如人生，梁巧芝的人生有着不平凡的變化，現實中的Ada亦然，她自覺最大的變化，是在當選港姐後的第四年，那一年的她事業雖然沒有大起伏，但卻因工作上的不開心及力不從心，加上身邊發生的事，令她覺得自己的人生既孤單又毫無意義，打算就此了結生命。

回想當時的境況，Ada沒半點畏懼說：「我去三藩市時諗住自殺，喺進行緊嘅時候突然間聽到有把聲話：『你唔要嘅嘢你畀我啦！』我當時就問：『你係邊個呀？』就諗起我一個女同學曾經話過生命係神賜予，你唔要都唔可以自殺。咁我就問：『係咪你呀主耶穌？』然後我又聽到之前同一番說話，我就話：『主呀！好呀，呢舊垃圾我唔要o架喇，我覺得我好冇用，讀書唔叻，又唔係一個有本事嘅人，我喺呢個世界冇價值，唔通你覺得一舊垃圾畀你會有用咩？』講完之後再聽到都是那句話，我就話：『好呀！我都諗住掉咯，垃圾你都要我就畀你！』講完呢句說話之後突然覺得好溫暖，我唔想死，跟住我就面對番我嘅生命。」

神幫我洗底

Ada直認信教初期的自己仍是很驕傲的人，雖然「信」，但在佈道會遇上有教友示好，她都會在心裏想着因為自己是明星而與眾不同，為求得到監製及導演留意，她繼續拍性感照，但心態漸漸有所改變。「人在江湖身不由己，若然唔影我就唔使做呢行，嗰陣我好想要封面，就算我幾唔識擺甫士、幾唔願意着嘅衫我都要同自己講：『着啦！唔怕啦！做封面就要咁o架啦！』以前我有得做封面我覺得好威，直到有一次我覺得自己好醜，好想買晒啲雜誌唔俾人睇到，尤其係教會附近間便利店。」

Ada拒絕再拍性感照，足有一年時間連內頁亦沒有人找她拍，但她卻感恩說：「百萬生日會啲人對我嘅印象好差，之後又唔知點解，啲人開始覺得我係一個實在嘅人，唔貪慕虛榮。原來嗰一年裏面神幫我洗底，清除晒所有人對我嘅記憶，畀一個新嘅我畀人睇。」

識得去愛人

人生得到滿足，信仰亦令Ada變得有愛，而這份愛，大到連斷絕關係的媽媽，她都可以原諒。「人嘅愛有限，亦都有條件性喺入面，係神嘅愛令我識得點去愛人。我都唔係一個最孝順、最乖、最叻嘅人，咁又點可能要求人哋都係咁？其實佢盡力做佢可以做嘅嘢，盡能力去錫我已經好夠，每個人都唔一樣，我點可能你阿媽同我阿媽比？唔好話我要原諒佢，阿媽都會原諒我以前做錯過嘅嘢，佢都需要原諒我，o依家我哋母女關係好到不得了，非常之愛對方。」Ada謂過去的已過去，不想再舊事重提，希望大家看她媽媽，正如大家看她一樣，是看她新的一面。

後記：太幸福驚遭天譴

風雨過後，問Ada可覺得自己命苦？她笑着認真說：「o依家睇番轉頭，我夠膽講我命好。如果冇嗰陣嘅經歷又點會有今日嘅我？我真係覺得感恩。以前我唔接受自己嘅過去，成日都埋怨，但o依家我可以用自己嘅經歷，去安慰有困難嘅人，我真係覺得我非常幸福。我成日都同老公講：『同你每日都Sweet Sweet（甜甜蜜蜜）咁，會唔會遭天譴？』真係o架，我覺得我太幸福喇，我同我阿媽阿爸十幾年都可以破冰而出，夫復何求？」