關心妍聽錯名上台攞關菊英個獎、梁詠琪喺台上撻到兩腳朝天走光、錢嘉樂想貼影帝心水，被人兜口兜面話佢未夠班……係人都試過尷尬滋味，人多少有啲虐待狂，聽人講尷尬事總覺得好笑，咁將自己嘅尷尬事同人分享，博人一粲，都算係日行一善。撰文：伊依

周秀娜斗零踭踩渠蓋

「入行前我唔着高踭鞋，入行後覺得一定要練吓着，有一次我着住對四吋斗零踭，一個人行中環，唔覺意踩咗入坑渠蓋度，可能嗰區啲人見慣晒，竟然冇人埋嚟幫我。我唯有踎低除咗隻鞋，雙手用力掹番佢出嚟，尷尬到不堪，o依家我練到着住對斗零踭跑步都得。」

楊千嬅夜店被罵八婆

「我覺得做任何工作都有機會被人無理取鬧，記得好多年前，我仲要喺夜店表演，有一晚我唱歌時，台下有個客指住話我好嘈，仲鬧我『八婆』，現場冇人幫我，費事得罪客人啩，當時我忍住度氣，尷尷尬尬笑住賠禮，但返到屋企匿埋喊。」

江若琳大姨媽忽來訪

「記得讀初中時，有一次將衛生巾（M巾）搽上茄汁放喺老師張椅上，阿Sir入嚟見到，佢塊面紅晒，尷尬到眼濕濕，但佢冇鬧人，我反而覺得自己有啲過份。唔知係咪報應呢，讀中二時，某日同細佬行行吓街忽然來經，我匿喺公廁，叫細佬幫我買衛生巾，真係狼狽又尷尬，呢件事畀細佬笑足十幾年。仲有一次，頒獎禮完場後，可能長時間坐，雙腳有些少腫，返後台換衫時，除唔到對靴，要搵一個人喺後面拉住我、一個喺前面扯靴筒，出盡力至掹到對腳出嚟，真係尷尬。」

魏駿傑淋雨濕身凸點

魏駿傑：「記得好多年前，接到無綫通知我去試鏡，我開心到不得了，一早預備定件白淨緊身恤衫，打扮到斯文靚仔。出門口時明明陽光普照，半路忽然落起傾盆大雨，當年唔係隨處有遮賣，我又怕遲到喎，去到無綫已經衣衫盡濕。入到錄影廠，我奇怪點解咁多人打量我？我向下一望，嘩，原來我件白恤衫透底又黐身，胸前兩點盡凸現，但又要焗住繼續試鏡，真係到?家都未試過咁尷尬。」

羅仲謙樁瘟雞撞崩牙

「我係樁瘟雞，以前經常同人當街傾偈，有一次一邊講拜拜，一邊擰轉頭，撼咗埋條燈柱度，撞崩咗一隻牙。又試過掛住邊行邊傾撞埋郵筒度，我又痛又尷尬，朋友仲笑到碌地。自從練大隻咗之後，最尷尬係被女記者叫我除衫影相，我即刻覺得塊面好熱。」

詩雅被誤認徐熙媛

「經常有人話我個樣似徐熙媛（大S），有一次，我戴鴨舌帽一個人逛街，忽然有兩個女途人指住我大叫『大S呀！』我尷尬地更正自己係詩雅，好彩佢哋冇發出噓聲，仲要求合照。」

蒙嘉慧尷尬被寸阿嬸

「我讀中學時幾男仔頭，尤其是一雙濃眉好誇張，講嘢又大聲，又唔在意服飾，有啲同學叫我做『阿嬸』，我都冇所謂。直至有一次，我搭搭吓車離遠見到有個同學，佢一見到我就嗌『阿嬸』，我未及回應，旁邊一個五、六十歲阿嬸竟然應佢，當乘客知道原來『阿嬸』係指我時，目光有啲怪異，我尷尬同時，知道係時候重整形象，搣甩『阿嬸』個花名。」

陳嘉桓仆親貼大膠布

「記得大約八歲時，我同細佬玩「捉伊人」，唔小心仆親個額頭，傷口呈不規則形狀，唔記得邊個咁搞笑，竟然用白色膠布喺我額頭傷口貼咗個T字，搞到我每日返學都畀人笑，我就尷尬到唔敢抬高頭。」

楊丞琳被侍應暗寸大食

「我呼籲歌迷不要送食物給我，尤其是糖果和朱古力，因為我很易肥，要經常做運動喼弗。以前我很大食，有一次，我獨自光顧餐廳，要了一份三文治、一碟芝士意粉、一件蛋糕和熱朱古力，侍應生以為少擺了一個位，想加位時，我尷尬地告訴他，只有我一個人吃。」

鄭嘉穎自認靚仔

「有一次我以嘉賓身份出席一個宣傳活動，坐喺台下等叫名上台，忽然聽到司儀嗌『靚仔，請你上嚟』，我下意識一個箭步上台，見到司儀望住台下另一個男人，我至知道佢所指嘅靚仔唔係我，當時唔知點落台，好彩司儀補飛叫埋我留低，以後我會搞清楚至做反應。」

葉翠翠硬啃加料美食

「記得有一次尷尬又嘔心嘅經歷，嗰次去瀋陽拍旅遊特輯，有機會試當地美食金魚餃子。正式拍攝時，有隻蚊圍住我飛，導遊先生好有風度，主動幫我驅趕，但唔小心拍死咗佢，條屍掉落金魚餃子上面，大家都見到，但實在趕唔切另外蒸過，我硬住頭皮將『加料』餃子放入口，仲要扮到好滋味，其他人越係同情，我就越覺得尷尬，?家每次諗起都想嘔。」

---

本文鏈接：藝人尷尬錄