補習天后家姐帶挈 關二嫂唐樓搬豪宅脫貧

FACE週刊 第246期

安樂窩

補習天后家姐帶挈 關二嫂唐樓搬豪宅脫貧

2012年02月08日

黃智雯因《缺宅男女》演八婆關二嫂而升呢,今週結局篇更與大佬安苗僑偉反大面,幾百萬觀眾到實。
入行 5年, 29歲黃智雯一向只做二、三線角色月入有限,但最近卻忽然富貴,搬入市值約 560萬的新蒲崗「譽.港灣」豪宅。關二嫂成功殺入豪宅,原來全靠有位補習天后家姐 Cathy Wong帶挈。有富貴家姐照住,黃智雯脫貧話咁易啦!


難得唔使開工,黃智雯上週便四出 shopping,問到佢最近升呢搬入豪宅,她說:「層樓我同家姐租㗎咋!」

黃智雯在《缺宅男女》飾演的關二嫂,八婆形象深入民心,觀眾睇到咬牙切齒帶挈黃智雯呢期大熱,接住下星期播映的新劇《 On Call 36小時》,更會與楊怡爭愛羅仲謙,話題有排講。

家姐 TVB出鏡

帶挈黃智雯住豪宅的家姐 Cathy,現於英皇教育教英文,但她並沒有像其他補習天王般勁賣廣告。反而最近同欣宜男友 Mark一齊於無綫收費兒童台教英文,兩姊妹一齊喺無綫出鏡。


英皇教育 Cathy


Cathy(左)最近同 Mark一齊喺電視教英文,教書教到上電視都算名師。

新蒲崗長大


《缺宅》玩完,下星期又有《 On Call 36小時》出街,仲要同楊怡爭花心羅仲謙,晚晚見足幾個月!

雖然人氣急升,不過黃智雯始終未係一線姐仔,未有廣告接,只靠 TVB月入始終有限;雖然入行前做過 3年空姐,但積蓄都用來投資媽媽在灣仔大有商場的美容化妝品店,所剩無幾。
對於最近有報道指關二嫂屈住新蒲崗舊樓,週一( 6日)於美容店內睇鋪的黃媽則說:「嗰度係佢阿爸嘅,我哋離咗婚 20多年,不過佢(黃智雯)一直都喺新蒲崗長大,家同家姐住,不過你哋唔好寫咁多啦,佢附近品流複雜,怕有 fans等佢呀!」不過記者近日發現一直於新蒲崗舊區生活的黃智雯,已搬到區內新貴「譽.港灣」、 7百多呎市值約 560萬、月租約$17,000的兩房單位,關二嫂成功進駐新晉豪宅,原來全靠有位做補習天后的家姐 Cathy。
Cathy在英皇教育教授英文, Miss界中算省鏡,上月起英皇教育與 TVB收費兒童台合辦兩個節目《補習升 Level》及《極速拼寫講》, Cathy都是主要女主持,拍檔是鄭欣宜男友 Mark Ryan,黃智雯同家姐都孖住入 TVB撈起。
其實黃智雯貴為無綫新貴,出入唐樓當然有失身份,至最近才決定搬往家姐豪宅,唔失禮之餘又有家人方便照顧,可謂一舉兩得。週日( 5日)黃智雯出席《缺宅男女》宣傳活動,回應有位補習天后家姐一事時,黃智雯不再巴渣惡樣,不過對家人仍不願多談:「譽.港灣係我同家姐租㗎,佢邊係補習天后,教書咋!佢只係普通人,打工仔 嚟 啫,家姐同屋企 嘢唔答喇。」今日有家姐帶挈,他朝黃智雯紅 咗記住報答家姐呀!

返新竇

素顏黃智雯上週六( 4日)遊完街後,直踩返回「譽.港灣」新居,其間自行嘟閘出入兼同保安打招呼,十分平易近人。

560萬豪宅

黃智雯的新居市值約 560萬,雖然係租住,但以黃智雯今時今日人氣,好快可以買番層啦。

48年舊樓

而之前有雜誌報道的屈住唐樓地址,原來只屬已經離婚的黃父所有, 86年購入,現時市值約 250萬,而黃母亦說:「嗰度係佢阿爸同啲家人住!」

黃母:離咗婚 20幾年


黃母看鋪親力親為,問到她身後是否男友時,黃母忍唔住笑點頭,跟住說:「佢姓葉, partner㗎咋!」做乜咁怕醜呀!

於灣仔大有商場開設美容用品店的黃母,對於黃智雯身世亦不避嫌說:「佢好叻女, 8級鋼琴㗎,我哋(黃父)離咗婚 20幾年啦,佢(黃智雯)一直都喺新蒲崗長大,佢都擔心關二嫂會好乞人憎,不過我叫佢唔使驚,做得好就得啦!」

上樓按腳

雖然貴為無綫新紮小花,不過生活仍然平民,上週六( 4日),黃智雯就揸車到九龍灣一間上樓足浴店按腳,腳底按摩連穴位推拿都係$240。

百變關二嫂

黃智雯由「鵪鶉妹」變惡新抱,現實中的她也非常百變,在演藝學院畢業後做過 3年空姐,之後參選香港小姐入圍五強,才成功成為演員。

’02演藝黑妹

黃智雯 10年前就讀香港演藝學院主修舞蹈,當時只得 20歲,皮膚黑又男仔頭,跟現在差別好大。

’05為食空姐

演藝學院畢業後,黃智雯在國泰任職空姐,她說想去的地方都去過了,而非常為食的她,經常把食物照片放上 blog,她也稱那是她最肥的時期。

’07港姐性感

07年黃智雯為加入娛樂圈而參加港姐,打入五強止步(冠軍張嘉兒),雖然冇獎攞,但成功簽約無 綫成為演員。

’11最愛婆婆

雖然在《缺》劇中她為搶公屋,不惜趕絕家人,但現實中她卻非常孝順,去年她為婆婆慶祝生日,也將照片放上 TVB的微博。


本文鏈接:補習天后家姐帶挈 關二嫂唐樓搬豪宅脫貧