談楊怡口窒窒 羅仲謙死過翻生禁女埋身

去年八月,羅仲謙經歷了人生一場「大劫」,「前度」傅穎主動向傳媒爆料,指羅仲謙跟她拍拖期間一腳踏幾船,又曾毆打她,打女人此等天地不容之事迅即令謙仔慘變「賤謙」,File被畫花,辛苦經營多時的乖仔形象如浮雲般飄去!好彩,在TVB新劇《On Call 36小時》中憑「洋蔥」一角色搶回分數!所謂少講少錯,談到新舊緋聞女友,謙仔即變人肉錄音機,訪問中如播帶般不斷重覆播放公式答案。噢!40吋胸肌下是一副沒靈魂的軀殼,多麼的浪費。

攝影:徐錦池

髮型:Jan Chiu@IL Colpo

服裝: D-MOP、coolday sir

提到舊愛傅穎,羅仲謙變得好避忌。明嘅,去年被女方搞到「雞毛鴨血」,幾乎要攬住一齊死,真係執身彩,最怕講多錯多!問到謙仔對「多口穎」是否已息怒?一觸及敏感話題,謙仔帶點避忌說:「唔講啦,再講對公司,對身邊人都唔公平,專注工作啦。目前我哋無聯絡,各自做番自己嘅事啦!(係咪因為佢唔好惹呀?怕會惹出火?)無呢啲事,唔想再講以前嘅嘢,(咁將來呢?好似將來會唔會有機會合作?會唔會愛火重燃呢?)合作都OK嘅,畢竟大家都係藝人,仲係同公司藝人,我唔抗拒碰頭,如果有戲會拍,因為我會尊重角色。至於感情事唔再講啦。(咁你仲關唔關心佢嘅事呀?)睇報道會睇到佢嘅消息,(傳佢遭公司放逐喎!)梗係唔係,佢喺北京拍戲呀嘛!」謙仔唔講又講,睇得出對舊愛仍然關心!

姊弟戀無問題

所謂大難不死,必有後福,28歲羅仲謙連女友都「升呢」,快速轉換口味和32歲的無綫花旦楊怡大玩姊弟戀,咪話唔爆。提到新緋聞女友,謙仔突變漏口。「我同楊怡係好朋友咋,我哋係有約會食飯,係正常社交,只不過兩個都係藝人,所以變咗一個炒作好題材,(手都未拖過?)係……(佢唔係你杯茶?)……隨緣,我無規定同邊種女仔拍拖,唯一我可以講唔介意姊弟戀。」明白!

避忌禁女埋身

之前有報道指謙仔一腳踏十幾船,先後跟傅穎、「鵪鶉妹」黃智雯、周秀娜與「浸大 E神」楊梓瑤、落選港姐蔡慧欣等撻着!他大歎無奈:「由兩年前開始,身邊所有女拍檔都好似關我事咁,有咁多緋聞,可能自己夠健談,同女仔無避忌,好鍾意講笑,坦白講,唔只女性,其實我人緣唔差㗎,入咗TVB之後識咗好多新朋友。我唔接受一腳踏十幾船,就算得果兩、三隻船,都無錢、無時間、無能力同無本事去踏啦,為免咁多緋聞,依家開始會學識避忌,正常交際活動唔會斷,唯一係私下唔好約會女仔,費事有不必要嘅誤會。」

新劇《On Call 36小時》叫好叫座,不但為羅仲謙締造姻緣,還可以幫他「洗底」!他說:「我將會係第二個張一健成為出色醫生,最後要管教好似洋蔥咁頑劣嘅實習生!當然想乘勝追擊開續集啦!(奉旨同楊怡談情?)咩呀?到時佢係做高級醫生,由我去教學生㗎嘞。」他自行幻想說。

羅仲謙最近憑新劇《On Call 36小時》搶回不少分數。
謙仔最近憑新劇《On Call 36小時》搶回不少分數。
羅仲謙話自己同楊怡只係好朋友。
謙仔話自己同楊怡只係好朋友。
當談及其新舊緋聞女友,羅仲謙不斷重覆答案,十足人肉錄音機。
當談及其新舊緋聞女友,謙仔不斷重覆答案,十足人肉錄音機。

謙仔支持「僭建」

無巧不成話,謙仔新歡舊愛傅穎及楊怡分別傳整容!他會否介意女朋友整容呢?「如果自己鍾意嘅女仔,係唔會介意佢嘅,心地靚咪得囉,都係到時先算,都無呢啲事發生,我唔覺得傅穎及楊怡係整容喎,佢哋個樣好自然。」


本文鏈接:談楊怡口窒窒 羅仲謙死過翻生禁女埋身