新年團拜小賭怡情　謝天華新年發大財

今天是大年初四，謝天華雖然在農曆新年要到外地工作，但他仍不忘向各位讀者拜年，祝願各位身體健康、事事順景！早前天華吃了一頓新年大餐，菜式十分有「諗頭」，六道菜名都是圍繞這位Laughing哥！

＜採訪＞曉妍 ＜攝影＞法蘭西

＜場地提供＞迎月小菜館

地址：新蒲崗景福街91-95 號
電話：21169518

天華除向讀者拜年外，他會入廟誠心祈福，說：「希望自己同家人健康，唔好有病痛，自己就事業順利，唔好受傷，再貪心啲就希望愈來愈好啦！」天華表示自入行後，都很懷念兒時過的農曆年，他說：「加入電視台後，人哋放假，我哋就要開工，因為要做賀年節目，所以同工作人員過年多過同屋企人，覺得好唔同嘅。」

一家廿多人勁熱鬧

天華記得在小時候，每逢大年初二，全部親戚都會到他家吃開年飯，說：「年初二又係我爸爸生日，所以親戚到齊晒，好熱鬧，氣氛真係好濃厚，因為屋細人多吖嘛，嗰日好忙㗎！爸爸媽媽會煮廿幾個人嘅飯，因為爸爸做酒樓，所以佢煮餸好好味，我就負責做樓面，哈，即係負責遞吓碗筷咁囉，不過最煩就係食完之後嗰桶碗，見到都唔想洗，哈哈！」

天華笑言最開心當然是逗利是，不過年初四已經花掉所有利是錢，小朋友嘛，當然會買自己心愛的模型、零食，但他坦言婚後派利是是最大分別，說：「第一年結婚要派利是，我同老婆都失咗預算，因為唔知要封幾多封，點知最後又唔夠派，好彩有咗第一年嘅經驗，第二年就大概知，就算派唔晒，去到金錢葫蘆都可以拎出嚟吖嘛，不過我又好得意，過年先會賭吓錢、打吓衞生麻雀，平時係唔鍾意賭。」

盼與內地導演合作

對於今年大計，天華希望不停工作，知名度繼續擴大，主要集中電視劇和電影，說：「希望拍多啲電影，因為09 年嘅電影開始好，多咗投資者，對演員嚟講係好事，我好希望可以跟內地導演合作。」去年， 天華憑Laughing哥這個角色成為「最佳男配角」，及後更拍攝電影《Laughing Gor之變節》，天華表示總算給自己有個交代，亦是09 年最精采的一環。希望天華在2010 年，工作方面更上一層樓！