東Touch 第863期
有否留意今年聖誕電影的走勢？《神探福爾摩斯2》、《吸血新世紀4之1》、《踢躂小企鵝2》，全數由續集電影包辦。不過最不忍心是看到細細個已叫他做靚佬湯的湯告魯斯，也要重溫個人舊作，來個《職業特工隊4》。你不是《哈利波特》，沒有7本小說做基礎務必要拍足8集，觀眾更加不想如看哈利仔長大般看你步入半百走去爬杜拜塔。謝天華明白這個道理，所以Laughing Gor第二套電影《潛罪犯》未出街就先放風，這次可能是最後一次飾演Laughing Gor。「在演員來說，都不想一個角色拍到爛，拍到冇人想看才收手吧！」道理說得對，加上一個角色已拍下兩套劇兩套戲，「笑」埋今次，差不多收夠籌。但剛投身潛行行列的黃宗澤跛Co，又肯放過你嗎？定還是跛Co真的如視后所言非常難頂，連Laughing Gor都頂佢唔順？（上映日期：12月29日）
text■Patrick Photo■Yin Make up■Eleena Yu（謝天華）、Cyrus Lee@Beauty tech（Bosco）Hair■Kel Fung@HHhair.nail Styling■Queenie Yu（Bosco） Wardrobe■Initial（Bosco） art■snow
跛Co翻生？有看《潛行狙擊》，都知最後跛Co是被Laughing Gor一槍打死，然後Laughing為此而瑯璫入獄，但原來這是一場佈局，目的是入獄調查另一單案件。所以電影是緊接劇集發展的，那麼跛Co何解又會重現？
B︰《潛罪犯》是劇集的延續，Laughing在戲中主要交代續後的故事發展，而之前發生過甚麼事，導致日後出現的情節，就由我去交代。我的戲份會跟鎮宇較多關係，會講到多年前我被打跛坐監後，鎮宇來找我，他令我起了重大轉變。總之我可以向大家保證自己沒有翻生，亦冇孖生細佬。
T︰即是獄中戲份全由天華處理？
L︰無錯，我在監獄所遇到的，冇一個是善男信女，有些好暴力，有些有高智慧，所以入到去，不單止對付一個人。而惟一幫我的是聯絡員Janice Man，監獄外的資訊全靠她提供。
T︰兩位在劇集播出時，其實分別盡吸男女觀眾，男觀眾鍾意睇Laughing夠囂，女觀眾又被跛Co對Paris的情深而迷倒，兩位又有冇發現呢？
B︰跛Co冇樣好，就是對女人特別好，而Paris就是他的死穴。所以一個壞人都未必是冇一是處，也會有好的一面。
L︰套劇出街後，的確多了男粉絲在街上找我合照。其實Laughing這個角色亦有別於過去的警匪片，他極具剛陽味，遇上不滿的事，會連上司都罵，甚至可以拍檯鬧大sir。現實生活中，作為打工仔，都是生活逼人，有時收到老闆的無理要求，想破口大罵，但都知冇可能做到，所以我的囂張無形中成為一種投射。
T︰之前天華放風，今次有可能是最後一次飾演Laughing，孰真孰假？
L︰其實再開拍的機會是50/50，最終都要看公司決定。對演員來說，都不想一個角色拍到爛，拍到冇人想看才收手。但這刻你要我實際地講出可以拍到何時？我答不到，但我相信要收手時，自然會知道。
T︰不拍Laughing，可以跛Co外傳呢？
B︰一套劇好看，對手好緊要，單一個跛Co其實搞不出甚麼花樣，要有Laughing跟他鬥智鬥力才好看。我反而好想原班人馬拍過一個全新題材，可能出奇不異地拍個笑片都可以的，其實Laughing好適合拍笑片。某人某月某日講過︰「佢外表gentlman，其實內裏好低能。」只要拿我們平時等埋位的對話同笑料出來，都已經好好笑，所以我覺得未必一定要續集才可以合作落去。
沒有Michael，只有跛Co如果拍到笑版Laughing，那就是切切實實的Laughing Gor。不過今套《潛行狙擊》，兩位已被網民公認為最chok的臥底及黑社會，亦相信兩位都會繼續chok，chok埋入戲院。
L︰其實我們等埋位時已經冇chok，大家一行埋，多數都是講講下一場戲怎樣拍，然後就開始講男人的話題︰車呀、紅酒呀……
B︰不礙乎酒色財氣啦。又因為拍攝時正值推出候選港姐名單，於是大家又會研究下佳麗們，然後又會夾計整蠱徐子珊。因為每拍完一場戲都好繃緊，所以工餘時一定要鬆一鬆。
T︰要自己揀，哪一幕最chok？
L︰最chok就是爭做坐館一幕，簡直是你chok我一下，你又chok一下回應，都幾累。
B︰真的好累呀，這場戲已經好長，一拍就是十幾個鐘，每一下都要keep住chok同一個表情，好辛苦。不過要我揀，我反而喜歡有場天台戲，講我向Laughing訴苦被女友飛，但他不單止沒有安慰我，反而挖苦我。好冇人性但好有人味，我們身邊都會有這類朋友，所以我幾鍾意這場戲。
L︰男人相處得耐，都會產生兄弟情，就算一個臥底一個黑社會，你想破到案，我要爭做坐館，各取所需。而最後就要大家在兄弟跟事業上作出揀選。所以男fans看時會特別感受到，女性觀眾反而會不明白，猛問點解班男人會這樣做？點解肯這樣蝕底？點解！邊有得解？
B︰正如女人會問點解要成班男人出去飲嘢，唔可以有女人同行。大佬呀！男人好多話題，是女人不可以聽的。未必是花天酒地的事，可能只是講講老婆好煩，呻下女朋友又要求乜乜，試問怎可以同場呢？
L︰正如我都不明白女性圍在一起講的話題有何趣味？我有時聽到都覺得好悶。
T︰去到電影，仍然chok住上嗎？
L︰演繹上沒有大分別，都是沿用Laughing Gor的人物性格。不過要留意是電影銀幕好大，而你的任何動靜表情都會放大了，所以埋位時一定要問清楚導演今次會用甚麼鏡頭，太close up，用電視的演繹，你就會over。
B︰我都是做回跛Co原本的角色，劇情上我會跟鎮宇有點點混淆，到底是我影響鎮宇，還是鎮宇影響了我，這就是導演的處理手法，我的責任就是保持住本身跛Co的味道。
T︰天華本身的英文名是Michael，但似乎這個名是轉贈予Bosco。
B︰無錯，大部分人見到我而家都會叫我做Michael，或者Co哥。等於Laughing，我都冇再叫佢Michael，直接叫Laughing。其實開工時都有少少亂，一聽見有人叫Michael，以為叫我，其實是叫謝天華，所以叫Laughing就一定冇搞錯。
L︰我而家打電話俾朋友都會叫自己做Laughing，大家會明，如果我堅持叫番Michael會仲煩，又要解釋邊位Michael。
本文鏈接：謝天華 黃宗澤 笑埋今次