賀歲片大戰　無綫打壓《花田喜事》

壹周刊 1038期 2010年01月28日

賀歲片大戰殺到，今年兩部港產喜劇《花田囍事》同《 72家租客》正面對撼同日上畫，兩部戲未上，話事人黃百鳴同曾志偉已經展開罵戰，互踩對方。

為了爭贏票房，做賀歲片之冠，邵氏出品的《 72家租客》片段近日已不停以密集式在無綫節目同廣告中出現，攞盡宣傳效果，另方面，更下旨打壓對手，趕絕《花田囍事》演員在無綫曝光，減少宣傳機會。

睇你點贏！（設計對白）
《 72家租客》除了外援張學友及袁詠儀外，全部起用無綫藝員，早前志偉更爆無綫藝員無得收片酬，只收了一封「無言感激」利是。

開火互寸

《花田囍事 2010》同《 72家租客》在開拍時都瞄準虎年賀歲片檔期，雙方亦早已視對方為競爭對手，身為《花田囍事》老闆兼男主角的黃百鳴被問到同《 72家租客》打對台時，非常大口氣說：「我相信佢（曾志偉）絕對唔係我對手，因為佢拍喜劇嘅經驗冇我咁多，以票房估計應該《花田囍事》第一，曾志偉第二啦。」

輪到曾志偉講對手，他更毫不俾面狂踩黃百鳴，「黃百鳴嗰幾吓把戲，我最了解，我之所以咁多年冇做導演拍賀歲片，今年走出嚟拍，就係因為睇咗佢嗰部《家有囍事 2009》，一部咁爛嘅片都賺錢，我要贏佢唔成問題。」

雙方擺明車馬開火，向來愛做大哥的無綫更加唔可以俾邵氏的《 72家租客》輸，於是頻頻晒冷以百多位演員一齊宣傳，又幾乎每晚在《東張西望》、《娛樂頭條》播放《 72家租客》的相關新聞，成功爭取曝光同話題。

《花田》以大堆頭明星（古天樂、吳君如、鄭中基）上陣，加埋由模特兒殺入影圈的熊黛林加 Angelababy，牌面唔比有一百七十多個演員的《 72》弱。

少了無綫宣傳，黃百鳴最近帶埋女主角熊黛林、 Angelababy及兒子到國內狂做宣傳。

去年《家有囍事 2009》收二千四百多萬，成為○九年港產片票房冠軍。

禁止出鏡

為了進一步擊退對手，無綫方面更下旨要盡量減少《花田囍事》的演員在無綫有曝光機會。翻查記錄發現，《花》片在近期總共搞了三次宣傳活動，但除了在愉景新城舉行的活動，無綫有派娛樂新聞台採訪外，其餘活動都無派人出現。
「其實上頭講明唔使做《花》片嘅活動，但上次係因為愉景新城有俾錢同無綫買時段，所以先有喺《娛樂頭條》度播，但係都盡量唔提部戲。」知情人士說。

對手有心明㩒，據知與無綫關係良好的古天樂同吳君如，都分別主動向有關方面表示有時間，可配合《東張西望》做一些宣傳，禮下於人，但無綫竟然拒絕兩個大牌，只答應安排在下午同深夜播放收視低的《娛樂直播》做專訪，而且仲要四個主角（古天樂、吳君如、黃百鳴同鄭中基）一齊做，否則連這個出鏡機會都冇埋。為了宣傳，黃百鳴方面只好就範。

吳君如在戲中有一場與黃百鳴啜爆戲份，是片中高潮笑位之一。

《 72》劇情穿梭七十年代同現代，學友飾演一名縮骨佬與曾志偉爭奪袁詠儀。

月初《花》在愉景新城進行宣傳，但因為有廣告商撐腰，難得逃過被無綫封殺。

無綫幾乎場場戲都派《東張西望》採訪，連奀星小肥都有份接受訪問。

同期對撼

同期上映賀歲片仲有剝衫谷胸甄子丹主演《錦衣衞》及趙文卓同周杰倫演出的《蘇乞兒》。