FACE週刊 第238期
面對面
那一年，我們把票投給 Miss Koo 鍾嘉欣
2011年12月14日
那一年，那一個晚上，我們在公司開盤競猜視帝視后，我猜鍾嘉欣，結果輸掉20塊。
據說，很多網民和我一樣屬意在《點解阿Sir係阿Sir》裏結局篇一幕哭崩的Miss Koo，替在電視台裏沒黨派沒後台沒籌碼的鍾嘉欣不值，最後「內定」本年度她是「民選視后」。
嘥氣！正如每日上映的豬狼對決、年尾排隊出爐的樂壇成績表，民意甚麼時候鬥得過權貴高層政治遊戲？民意永遠只在民間。
入行七年，27歲的鍾嘉欣說，玩遊戲最重要的是懂得遊戲規則：「講爆，我四年前拍《溏心風暴》都好爆，信我啦，再爆都會過。I know、I’m sure，將來我一定會有另一個No.1。」
事實勝於雄辯，像溏心、柴九、Laughing哥一樣延伸外傳的，2011年，只有Miss Koo一個。 明年見，Miss Koo。
品味鮮奶
有Miss Koo外傳之稱的《護花危情》要到明年二月才拍竣，女主角鍾嘉欣難得抽出一天檔期，舉行簽約星煥唱片公司記者會，會前會後順道還掉幾家專訪債。
擺甫士的空檔，她突然說：「我真係好羨慕人哋可以拍旅遊特輯，入行七年，我邊度都冇去過。」我說：「沒人會找當家花旦拍旅遊特輯，鬼叫你入行七年做足七年女主角。或者你可以諗吓學陳豪同黃宗澤，品味吓咖啡同紅酒嘅！」「係喎！我拍一輯《品味鮮奶》咪得囉！」 鮮奶？對，鮮奶。難怪我聽說電視台裏沒幾個姐仔願意跟鍾嘉欣交朋友，都說她純到沒法溝通，純到被姐仔們藐。
「哼哼……」鍾嘉欣聽了笑得有點尷尬：「係呀，我冇乜幾個close friend，ok㗎，冇問題喎。 「啱啱同杏兒拍完《耀舞長安》，佢都話我好似一張白紙，入行七年，仲係冇野心、冇私心，同七年前冇變。佢同好多人都係同我咁講，應該要有多啲主見……
「我唔係冇野心，我都想自己做得再好啲，台慶夜opening，都想企前排。我一年拍五套劇，每套受歡迎程度都算高，企前排係應該。我覺得好有成功感，呢七年都冇咩大新聞喺我身上發生，人哋鍾意我就係因為我做戲同唱歌。由第一年至第七年，我用嘅方法冇變，我仲係爹哋媽咪嘅鍾嘉欣，同一套方法，頭七年可以，點解唔可以last多七年？頭七年work，我唔信跟住嗰七年唔work。
「我唔係一成不變，呢七年，我搵到自信、知道呢個圈點run，知自己個位置喺邊，學識唔好睇個result咁重要。Miss Koo今年係爆，咁又點？再爆都會過，I know，I’m sure，將來我一定會有另一個no.1。」
上月18日，鍾嘉欣簽約星煥國際，計劃明年尾推出第四張個人專輯：「我第一日入TVB已經知道會好忙，以前一年拍100集劇可以出碟，出年一樣得。」
年中推出的《點解阿Sir係阿Sir》結局篇，Miss Koo發現被陳豪欺騙感情時崩潰一幕為她贏盡掌聲，卻贏不了視后獎座。
會過去的
在加拿大小鎮土生土長的鍾嘉欣，從小就立志要打一份穩打穩紮的工。18歲那年，她如願入讀英屬哥倫比亞大學教育系，打算畢業後入職做小學教師，結果被推薦參選溫哥華華裔小姐，就這樣一路贏到來香港。
第一次拿商場選美冠軍，鍾嘉欣說是朋友代報名，純為練膽量。參加華姐選舉，也是大會邀請，第一年婉拒，第二年才勉為其難當暑期活動參加。恨死所有精心鋪排處心積慮要出名的港女，總是歪打正着的人，才是天生的主角。
我喺一個好普通、好受保護嘅家庭長大，屋企平實、冇乜高低起伏。由細到大，我淨係諗住讀好啲書、出少啲街，搵份寫字樓或者學校工，最緊要穩陣。從來冇諗過選美之後條路係咁行，冇諗過一嚟到就有得做女主角、跟住出碟、跟住拍電影。
突然間咁多機會、突然間要同咁多人接觸，我突然間去到一個景點，唔知自己行唔行到落去，身邊真真假假唔知信邊個好。個個搵我做女主角，我根本就覺得自己啲戲好屎，覺得好多人都唔認同我已經達到女主角嘅level。我出名係喊包，以前會因為做戲唔夠好、太攰、或者掛住屋企喊，兩年前，我失眠、抑鬱，真正崩潰。我要乜？要休息囉……於是拍完《冏探查過界》，公司畀我放咗一個長假。
我返咗加拿大，整整一個月，每日買餸、行街、睇吓雪，睇住屋企人幾錫我，睇到行出街我可以令到路人擰轉頭望我，睇到一路以嚟我幾幸運，毫無理由要咁樣。
受保護動物，我曾經係。但係做呢行，冇人可以繼續保護我、冇人可以幫我攬啲嘢上身，唔通登台搵屋企人上台唱？做戲搵朋友幫我做咩？然後有一日，我上到台唔再口震震，做戲可以開開心心放膽去做，我知我得喇。
年年有份被提名最佳女主角、年年食白果，鍾嘉欣上次拿獎，是06年的飛躍進步女藝員大獎。
電視城以外，最常見到鍾嘉欣的地方就是地鐵、街市和超市：「唔係去邊啫？我係好悶，所以狗仔隊都話唔想跟我。」
啲人話我純，心裏面其實係覺得我戇居，ok喎。
In a relationship
七年前合作《隨時候命》，曾經傳過與鄭伊健的緋聞煙幕，五年前拍《溏心風暴》，曾被外間當她和林峯是一對情侶檔。事實說明，林峯愛尤物，乖巧老實的鍾嘉欣應該不是他杯茶。狗仔隊長期監視的結果亦說明，鍾嘉欣七年如一日搭地鐵、逛街市、買特價衫，間中在私人時間出現的異性，只有打星伍允龍一個。
我呢，有朋友，有好多朋友……感情事，我咁多年都處理得好低調，我好想keep住呢個作風。係唔係成日影到嗰個？我只可以講，我家嘅status好開心。
啲人話我純，心裏面其實係覺得我戇居，ok喎，我一樣覺得係讚賞。
我嘅家庭背景、人生經歷造就我嘅個性，既然冇嘢要防、冇陰暗面要收埋，點解要怕？點解要防？我遇過壞人、試過俾人出賣，但係我相信每個人做每件事都有原因，我總相信呢個世界仲係好靚、好人仲有好多，呃過我嘅人，我照樣會畀機會佢，再做朋友。
我唔係易恰，我係好聽話、好就得人，但係絕對唔會俾男仔恰。有啲女仔乜都靠男人，注定俾人恰。我今年27歲，事業好好、搵到錢，又有自信，仲點會心甘情願俾人恰。
我愈嚟愈覺得，呢行可以做一世，好似陳慧琳、關詠荷、袁詠儀一樣，同時亦可以兼顧到另一半同家庭，只要唔好繃得太緊，唔好將所有嘢睇得太重。
07年接拍葉念琛電影《十分愛》，被武打奀星伍允龍狂追，雖然被拍到多次約會，鍾嘉欣一直否認。
今年5月，被雜誌拍到與大律師男友李傲寰遊赤柱，鍾嘉欣拒絕承認：「我只可以話我現時status好開心。」《壹週刊》圖片
本性
還記得三年多前第一次採訪鍾嘉欣，撞正08年1月尾淫相風波爆發，影樓裏有人傳閱奇拿發布首輪淫照，當年23歲、只拍過一次拖的鍾嘉欣離遠睄到已經嘩鬼叫，愈叫愈走。
三年多後訪問當天，咁啱再爆陳冠希咀嘴私相，鍾嘉欣則說要品味鮮奶。所以說，有些人死性不改，有些人本性難移，就算撈落同一個染缸裏，要變就變，不變的，不變。
高中時期的舊照，一看就知道鍾嘉欣是個好學生。《ME！》圖片
撰文：朱小博
攝影：范仲良
髮型： Green@Chin. G.
化妝： Jessica Chan
形象： Bryan@the Flaming
服裝： Karen Millen