郭政鴻易容享天倫樂 妻女唔見得光

雖然一把年紀又唔係英俊瀟灑，但45歲的郭政鴻依然有傻妹黐埋身，懶理她有妻有女，更明言：「人哋點睇人哋嘅事，總之我覺得佢係一個超好男人。」又天真又傻的滕麗名確實好惹人憐愛，不過，麻煩滕小姐睇清楚。本周日晚上，這位「超好男人」帶老婆行IKEA，全程將囡囡抱入懷，一家三口樂也融融，不過，阿好男人唔知驚咩，全程Cap帽不離頭，加上口罩遮臉，被通緝嗎?採訪:張詠森

去年尾，郭政鴻被踢爆與一貌似他前妻的女人同居，兩人的愛情結晶更已九個月大，當時經常與郭政鴻糖黐豆，被全世界認定是其正印女友的滕麗名心死地說：「我會同佢劃清界線！」不過，女人講嘢信一成好嘞，有傳兩人各行各路未夠半年，已秘密復合。

郭政鴻有妻有女

本周日晚，郭政鴻以Cap帽加口罩的避債Look現身九龍灣宜家傢俬，當時現場還有貌似其前妻的女人及一名可愛小妹妹，只見這位「超好男人」一邊同小妹妹玩一邊四圍望，鬼祟行徑甚為礙眼，難得其疑似妻子無所謂，揀碗筷刀叉之餘更主動到收銀處找數，同時間，郭政鴻則拖住小朋友四圍走，然後再抱住小妹妹對疑似妻子說:「你睇你個女幾百厭。」謎底已經解開，滕麗名你瞓醒未?

※郭政鴻抱住囡囡同老婆行街睇傢俬，一家三口十分高興。

※「超好男人」全程抱實囡囡。

※「郭太」主動到收銀處找數。

※郭政鴻對妻子說︰「你睇你個女幾百厭。」

※最後三口子搭的士返歸。

※滕麗名曾表示，覺得郭政鴻是一個超好男人。資料圖片