早前被踢爆與貌似其前妻的女人同居兼生埋女的郭政鴻，雖然在TVB只屬4線頭3線尾藝人，但竟鍾情在名店Shopping，衫褲鞋襪全部有牌子。採訪︰張詠森
本周日下午，被滕麗名稱為「超好男人」的郭政鴻，跟梁靖琪在中環為新劇《團圓》拍外景，劇情講述兩人在街頭互相拉扯，由於兩位都係實幹型藝人，埋位數次後監制便滿意收貨。

懶人試鞋法

然後，「超好男人」極速換回便服便向安蘭街邁進，先入D-mop買了一頂賊仔帽，再上二樓試了一對潮款波鞋，繼而再到隔離的Black Barrett揀T恤，45歲的郭政鴻唔只好，更非常潮。

在中環散完財後，意猶未盡的郭政鴻再打的殺落尖沙咀，一落車即急步走入Gucci，望吓波鞋再望吓皮鞋，然後再拎住波鞋往鏡前照，照啱心水才叫店員拎所需Size穿上腳，「潮鴻」連Shopping方法都別樹一格。

以為當事人夠皮，估唔到佢再到連卡佛繼續Fing錢，4位數尾的真皮袋的確好靚仔，所以郭政鴻亦急不及待，拎住心頭好往鏡前照，前、後、左、右再轉身，露出滿意笑容的郭政鴻當然要將它帶回家。

※郭政鴻到Gucci睇中波鞋，照到啱心水才叫店員拎Size穿上腳。

※買個不亦樂乎的他再去潮店揀T恤。

※「潮鴻」到名店睇中真皮袋，拎住心頭好不停照鏡。

※郭政鴻（右）與梁靖琪拍攝新劇時，在街頭拉拉扯扯。