都是那些年:儲彈藥返娛圈 廖偉雄燦到底

獲網民封為燦神的廖偉雄,近年主力於內地做有機食品生意,偶爾才回港客串做節目,似對娛圈不再留戀,原來燦哥一直心繫演戲藝術,希望人如其名可以延續燦爛的星途,而他即使做生意都是為復出做準備,雖然沒定下回歸日期,但燦哥化身未來戰士阿諾舒華辛力加,承諾總有一日, I will be back。 撰文:羅美倫

燦哥近年醉心發展內地有機食品生意,自01年開始已再沒拍劇,只間中在節目中跟觀眾分享人生哲理,當大家以為燦哥不再拍劇時,原來他另有籌謀:「做咁多嘢主要係為藝術,生意只係令我有固定收入,喺無綫日拍夜拍,有次問自己到底喺度做乜,如果再上高一層應該點做?訓練班時老師話藝術來自生活,自己都係將生活帶入戲,但當有錢有名,生活就脫離群眾,感受唔到佢哋,得唔到認同,就要諗點突破自己,做任何嘢都係一個過程,由模仿、改進、創作,最後變成藝術,我最大目標唔係做生意賺錢,我係追求演藝藝術,但要先安頓家人。」

廖偉雄表明從未離棄過演藝藝術,總有一日會回歸。攝影:羅美倫
廖偉雄表明從未離棄過演藝藝術,總有一日會回歸。攝影:羅美倫

廖偉雄在《網中人》演的阿燦很生活化,此角色亦成為經典人物。
廖偉雄在《網中人》演的阿燦很生活化,此角色亦成為經典人物。

燦哥(左二)01年曾演出棟篤笑,當時其女兒(左一)、太太(右二)及兒子都有捧場。
燦哥(左二)01年曾演出棟篤笑,當時其女兒(左一)、太太(右二)及兒子都有捧場。

廖偉雄與盧海鵬扮「撻成一塊」唱《壽頭記》,是扮嘢界經典中的經典。
廖偉雄與盧海鵬扮「撻成一塊」唱《壽頭記》,是扮嘢界經典中的經典。

堅持搞生意

要重投娛樂圈懷抱,並不是一時三刻的事情,因燦哥做事從不半途而廢,他說:「等公司上埋市啦,我肯定會返娛樂圈,呢兩年應該搞到上市,但上市後都要上咗軌道先。如果我只做藝人,會見少好多人,但家排隊坐車,可以睇到小市民各方面嘅生活,我從冇放棄過演戲㗎。」

燦哥先後做過美容直銷、卡拉 OK、燒味生意,都經歷失敗,還曾被申請破產,但他堅持繼續從商,其實當年返娛樂圈隨時可撈得好角色,但燦哥不甘於此,始終認為要有突破就要離開娛樂圈。

《笑聲救地球》是廖偉雄創作的代表作
《笑聲救地球》是燦哥創作的代表作,為觀眾帶來不少歡笑聲。

廖偉雄與關詠荷演的《河東獅吼》叫好叫座
與關詠荷演的《河東獅吼》叫好叫座,但燦哥為求突破,決意離開娛樂圈再作部署。

廖偉雄曾在《向世界出發》中與大家分享做人道理。
燦哥曾在《向世界出發》中與大家分享做人道理。

唔敢做奸商

現年55歲的燦哥揚言總有一日會回歸娛樂圈追尋理想,但未必一定做幕前:「唔知幾時㗎,儲咗嘅資料,可以幻化唔同角色,例如寫書、寫劇本、做幕後,都係藝術。」

從商吸取人生經歷為演戲,那燦哥有否將演戲經驗放到商界上應用?他笑言:「做生意唔使演戲嘅,做任何嘢都一樣,要老實去做,好多人話商界奸,都真係奸,但我唔識亦唔夠膽,因為身份唔可以,人哋做假蛋發咗又點,到爆煲時就係老實人機會。」

燦哥經歷過成功失敗,確實有不少人生哲理,近年他做特輯時總愛分享,網民就將燦哥的人生金句百搭使用,無論網民問甚麼問題,燦哥的警世語錄都可以回答得有紋有路,因而獲封為燦神,問到他知不知自己地位已屬神級?他笑說:「唔知喎,唔係金句,呢啲係生活,要達到理想就必須係咁。」

燦哥的人生哲理、金句全來自他的經歷,有時還會跟師傅傾佛偈,他說:「呢個世界其實乜嘢都有,只係你知與唔知,靈界有好多嘢,係你領域唔知。」他認為人不是活在過去,必須想將來,行不通就要轉方法做,並不能放棄:「總之目標已設定,啲方法唔得就轉,只要累積咗經驗就一定得。」

在馬來西亞做燒味生意失敗,但廖偉雄只認為是經歷。

在馬來西亞做燒味生意失敗,但廖偉雄只認為是經歷。
在馬來西亞做燒味生意失敗,但燦哥只認為是經歷。

女兒已出嫁

現時燦哥的太太除了照顧他,還在馬來西亞有自己的燕窩生意,女兒出嫁了,兒子亦在瑞士的大學完成了酒店管理課程,他可謂無後顧之憂,能專心一意做他的有機食品生意,只要成功將公司上市,燦哥隨時就可回歸娛樂圈。


本文鏈接:都是那些年:儲彈藥返娛圈 廖偉雄燦到底