鄭嘉穎:恨入紅館開騷

往事如煙,可能大家已忘記鄭嘉穎是歌手出身,當年的「棒球小子」形象唇紅齒白,也不及此刻「Law霸」不羈形象深入民心。但嘉穎仍有心願未了,簡單一句:「我好恨入紅館唱歌!」道出他對「棒球小子」年代的執着。

你問我想唔想做番歌手?唔係我想唔想嘅問題,而係有好多商業嘅元素喺入面,依家唱歌係一個十分艱難嘅行業,由我出道係一個百花齊放嘅時候,及至四大天王年代係最蓬勃嘅時候,到依家係一個幾惡搵食嘅年代,所以有太多商業問題要去處理。

真係要有番咁上下機會同Timing配合,真係想再揸番支咪,我認,我恨做歌手o架!但唔係我話講過就算數,而係要有好多因素配合,亦唔應該夾硬嚟,當市場唔容許,你夾硬嚟係冇意思,我要去做就要做到最好。

唉!有邊個歌手唔想喺紅館開演唱會?真係好想,但我控制唔到囉!做呢行咁耐,知道唔係你Plan就一定得,邊有嘢係我要一定就OK。就好似我都唔知《步步驚心》有好成績啦!我只可以喺我嘅範圍內做到最好,但好多時都係畀人帶住我走,唔係我想攞獎就可以攞,唔係我唔想攞獎就可以唔攞,就係咁簡單。

欣賞學友性格

So Far暫時真係未有人搵我去唱歌,香港內地都冇,但斟我去內地表演唱歌嘅就有。其實我唱歌仲得o架!呢把鋒利嘅刀仲未生銹,我沖涼嗰陣不知唱得幾好聽,唱歌係我嘅興趣,唔開心嘅時候亦會唱歌,可以令我開心,連卡通歌都會唱一餐,不過我最叻係唱學友嘅歌,當年寶麗金我見佢最多,知道佢真係一個不可多得嘅超級歌手,最欣賞佢嘅執着,所以我都好執着!(明日待續)

嘉穎恨入紅館唱歌,可惜仍未有此機會。

張學友是嘉穎心目中的超級歌手,更欣賞他的執着。

嘉穎和湯寶如手牽手在台上合唱。

鄭嘉穎與馬賽(右)及高海寧等在鬧市出巡,場面墟冚!


本文鏈接:鄭嘉穎:恨入紅館開騷