惠英紅對扮靚非常有心得，她日前揀金像戰衣時，看到貨架上的半截長裙，即改裝變 tube dress，着得飄逸又有型。
攝影：仇志德
服裝、場地提供： ESCADA（ ifc）
【倒數第 8日 第 29屆金像獎之女主角篇】第 29屆香港電影金像獎將於本月 18日舉行，今屆影后之席，擺明造就《心魔》的惠英紅熱鬥《歲月神偷》的吳君如。從影 33年、打女出身兼挾首屆金像獎影后餘威的小紅已紮穩馬步迎戰，信心十足的她日前豪情快語：「呢個獎唔係佢就係我！」十年前仰藥自殺死唔去的小紅，茅塞頓開，近年全副精神投入演戲，戲裏戲外都要演出精采人生。 撰文：比華利
短短半年，惠英紅憑電影《心魔》先後橫掃今屆台灣金馬獎最佳女配角、香港電影評論學會最佳女演員和亞洲電影大獎最佳女配角獎，本月 18日舉行的香港電影金像獎，她再憑《心》片角逐影后。
小紅與金像獎早有淵源，她早於 82年已響頭炮，憑電影《長輩》成為第一屆金像獎影后，當年硬橋硬馬真功夫為她打出燦爛事業，至今事隔 28年，小紅收起真功夫純賣演技，同樣獲評審肯定，她很緊張這次提名，日前更到中環 ESCADA挑選戰衣，賽前一刻，她直認恨攞獎，她日前接受本報記者專訪時說：「好坦白講，我梗係恨攞，呢個獎對我另有意義，我今年都 50歲，唔同後生一輩，我攞到獎之後未必起得更高，當還自己一個心願，第一屆我攞過，相隔 28年再攞係還我一個心願。」
去年小紅憑《心魔》在台灣摘下金馬獎最佳女配角獎，為爭獎打下強心針。
小紅憑《心魔》角逐金像獎影后，片中她與徐天佑演母子，有戀子情意結。劇照
拍打戲致長短腳
四位候選影后為《金像獎特刊》拍封面，獨欠正在待產的趙薇。
今屆小紅要還心願再嘗當影后，着實也不容易，相信她必要再發揮「打女」本色，以一敵四揮低舒淇、張靜初、趙薇和吳君如，但論殺傷力似乎以《歲月神偷》的吳君如最大，二人在獲提名的電影中分別扮演不同類型的母親，小紅在《心魔》演繹的母親有戀子情意結，君如則是 60年代典型慈母，兩位螢幕媽咪將成為頒獎台上的勁敵，小紅說：「入圍五套戲都唔同類型，最終真係要睇評審嘅口味，佢哋鍾意邊種類型電影就邊個可以跑出，我相信今次呢個獎，唔係佢就係我，最終都要講天時地利人和。」
恨攞獎恨到出面，但小紅明白不能強求，她決定帶着平常心出戰，她說：「《心魔》都幫我攞咗三個獎，都好意外，金像獎我雖然恨攞，但就算攞唔到都唔會唔開心。」小紅反而戥任達華多年與影帝獎項擦身而過不值，她說：「今次華仔有《天水圍的夜與霧》同《歲月神偷》兩部戲提名，佢兩部都做得好好，可惜兩個提名會分薄票源，佢係一位長青演員，每部戲都有攝人魅力，過去幾次提名都差少少，希望今年真係可以輪到佢。」
資深演員求存也要與時代並進，小紅正是棄打從文的好例子， 77年憑演打女入行的她，處女作是電影《射鵰英雄傳》，在水銀燈下由七十年代打到九十年代，有名有利都彌補不了身體遍體鱗傷，小紅說：「以前自己年紀細，唔識拍戲要平衡，只係有信心拍打戲就係咁拍，忽略咗可以拍埋文戲，拍打戲又唔識錫身，搞到周身傷，唔夠休息令傷患隨住年紀大，帶嚟好多後遺症。」
動作片令小紅全身變重災區，身體由上到下：頸椎、肩膊、腰骨、手踭甚至雙腳都嚴重耗損，她邊說邊皺眉說：「我手踭軟骨磨蝕晒，家靠食藥補救，雙腳因為傷患搞到有啲長短腳，所以家我都盡量唔拍打戲。」
後悔自殺傷母心
小紅很重視每個頒獎禮，她為了出席金像獎費煞思量，日前到 ESCADA揀戰衣。
動作演員生涯有限，體力不逮便難再有生存價值，小紅早於十年前便開始轉型當演技派，但演員之路卻不好走，小紅最初接受不了歲月催人的事實，抗拒做綠葉，久而久之鑽入牛角尖，更不自覺患上抑鬱症， 00年差點走進人生盡頭，情緒低落的她狂吞安眠藥企圖自殺，事後想通了的小紅已不介意自翻舊賬，她現今更輕鬆面對：「嗰次我啪咗 80粒安眠藥，好彩拍慣打戲身體好，最後屋企人灌水救番我，死唔去我咪面對現實去睇醫生。」
走出鬼門關的小紅學會珍惜，積極治癒抑鬱症，她語重心長說：「瓜咗等同冇咗機會，永遠唔會有日後呢啲精采人生，家諗番自己當時真係好儍，我死咗就一了百了，但會傷咗好多關心我嘅人，我醒番一刻覺得好對唔住媽咪，萬一我唔死嚇親老人家先事大，咁我咪好不孝。」
戀黃子揚成一生污點
小紅曾與年輕她 7歲的黃子揚（小圖）譜姊弟戀，最終分手收場。
如何堅毅的女人總有軟弱時，打女出身的惠英紅也不例外，年屆半百的她渴望身邊有伴陪終老，為她遮風擋雨，過去多段無結果的愛情，當中有甜蜜回憶，也有傷痛的經歷，但小紅仍堅信屢敗屢戰，期待愛神邱比特之箭。
小紅在 89年承認跟比她年輕 7歲的黃子揚譜出姊弟戀，但戀情維持三年便告終，小紅曾形容黃子揚是她一生污點，二人分手至今已十多年，再見不是朋友，小紅說：「冇話邊個傷害邊個，對方都可以話我傷害咗佢 o架，只係我哋緣盡，我只會記得中間賺咗開心，一齊唔開心又何必拖一世。」
「吓吓哦佢咪似阿媽」
這段失敗的戀情令小紅不再玩姊弟戀，她說：「或者我閱歷多，經驗多，同細過自己嘅另一半相處，彼此步伐唔一致，吓吓哦佢咪似阿媽，會好傷個大男人自尊心。」小紅吸取教訓，日後闖情關必挑選較自己年長的男士，她幽默說：「對方老過自己，咁先顯得我後生嘛！」其實她的擇偶條件要求不高，除了年紀，也要心地善良。
小紅近年心急覓對象，自爆曾請朋友安排相睇，她說：「人生苦短，家對我嚟講，每分每秒都好重要，如果有一日我行街撞見個男人好啱眼緣，我夠膽行埋去主動結識佢 o架。」被動變主動，衷心希望小紅的愛情也像事業一樣，早日大放異彩。
今屆影后提名
張靜初《天水圍的夜與霧》
惠英紅《心魔》
趙薇《花木蘭》
吳君如《歲月神偷》
舒淇《游龍戲鳳》
資料來源：香港電影金像獎
電影人之選
張堅庭：君如未有突破
不少電影人都有自己心目中的最佳演員，對最佳女主角的睇法各有不同。
張堅庭：「君如喺《歲月神偷》未有突破性嘅演出，惠英紅機會高啲，因為評審對一啲努力咗好耐，而又有突破嘅演員會畀多啲分。」
劉偉強：「我對舒淇情有獨鍾，我睇到舒淇嘅演技越趨成熟，但又可以保持新鮮感，近年每套電影都畀人一種睇唔厭嘅感覺，我睇好佢。」
黃真真：「我好鍾意《心魔》嘅惠英紅，佢唔只演技爐火純青，而且對電影好認真，近年仲肯接演一啲有突破性嘅角色，值得支持。」
娛樂資料庫
張曼玉五度封后
香港影圈一向巾幗不讓鬚眉，過去 28屆香港電影金獎像頒獎禮，就有 19位好戲女星奪得影后殊榮，張曼玉更所向披靡攞走五屆影后。
《壹週刊》圖片
演員：葉童 封后次數： 2 得獎電影： 84年《表錯七日情》、 92年《婚姻物語》
演員：斯琴高娃 封后次數： 2 得獎電影： 85年《似水流年》、 08年《姨媽的後現代生活》
演員：張艾嘉 封后次數： 2 得獎電影： 87年《最愛》、 02年《地久天長》
演員：蕭芳芳 封后次數： 2 得獎電影： 88年《不是寃家不聚頭》、 96年《女人四十》
演員：張曼玉（圖） 封后次數： 5 得獎電影： 90年《不脫襪的人》、 93年《阮玲玉》、 97年《甜蜜蜜》、 98年《宋家皇朝》、 01年《花樣年華》
演員：袁詠儀 封后次數： 2 得獎電影： 94年《新不了情》、 95年《金枝玉葉》
資料來源：《蘋果》資料室