阿佘拒談廖碧兒扯火走人
佘詩曼（阿佘）、陳豪與廖碧兒的三角戀愈傳愈盛，最近更演變成兩女隔空開戰！阿佘昨日出席活動時不甘再被拖落水，罕有發火拂袖而去！
廖碧兒昨日宣傳《72家租客》特別場。
最近「緋聞女王」佘詩曼與陳豪合作拍攝無綫新劇《公主嫁到》，有傳剛與鄭嘉穎甩拖的阿佘與同樣甩拖的陳豪日久生情，陳豪成功以咖啡攻勢奪得伊人芳心。早前阿佘接受訪問時，試圖甩身，揚言一早做定人情給陳豪，暗示「碧豪戀」仍未結束，豈料辣慶陳豪緋聞女友廖碧兒，隔空宣洩不滿說：「我覺得好唔抵，影響到我屋企人，畀人帶咗上嚟（擺上枱）都冇辦法！」
阿佘昨日現身奧海城《Mabelle呈獻：志雲「情人節」首選》新書記者會時，慘被陳志雲將緋聞拿來搞氣氛！陳總在台上直指陳豪是阿佘的新歡，並問她有甚麼擇偶條件，阿佘說：「我愛佢（陳豪）演個角色，我擇偶條件只要開心就得。」陳總笑說：「咁王喜都得啦！」嚇得王喜O嘴。事後阿佘揚言不介意緋聞被擺上枱：「冇尷尬！預咗會問呢啲問題，都唔係真！但呢個話題已經夠喇！（唔想緋聞依家傳晒，到劇上冇嘢傳？）呢個唔係我控制範圍，我專心拍好我嘅劇。」
陳豪想擺平事件
有傳廖碧兒對「做定人情論」感不悅，阿佘即板起臉認真地說：「件事真係應該告一段落！唔好將幻想當事實，根本係得啖笑嘅新聞，唔想再回應。（會同陳豪避忌啲？）我哋拍埋同一個劇o架！呢套係喜劇，要開開心心先可以感染觀眾。（私底下小心啲？）唔該晒！」一向EQ甚高的阿佘，突然中斷訪問，匆匆轉身走人。
至於一直夾在兩女之間的陳豪，在電話中得知阿佘表現激動亦有點無奈，對於被指兩女為他爭風呷醋，他苦笑說：「係啦！我都抓晒頭，唔知點回應好，呢啲係煲水新聞，等佢靜靜哋！（點靜？嬲到出面？）《宮心計》都係我同阿佘合作，當時又唔傳？以前就蝦嘉穎，依家拍《公主嫁到》冇嘉穎就傳我，擺明蝦我啦！」雖然事件愈鬧愈大，但陳豪仍為兩女講好說話，希望能平息風波：「我諗阿佘唔係嬲，佢冇嘢，都係唔想謠言延續落去，而廖碧兒係因為覺得搞到屋企人，唔想拉埋屋企人落水。（你兩條女都攬晒上身？）攬咩吖？大家係過來人，知道發生咩事，我哋呢啲江湖仔女嚟嘅。」至於廖碧兒則至截稿前仍未回覆。
笑談緋聞EQ高
阿佘曾與不少合作過的小生傳緋聞，每次問到有關回應時，她都會談笑風生，EQ甚高，但今次提及與陳豪的緋聞時卻一反常態！
講鄭嘉穎風騷
阿佘被踢爆與鄭嘉穎撻着，更於8號風球被斷正共處車廂內，被記者追問時，她風騷地說：「唔同你玩！」
啜馬德鐘甜蜜
馬德鐘與阿佘拍《鳳凰四重奏》時傳緋聞，宣傳時當眾隔住膠片接吻，事後阿佘笑言望能刺激收視！
提陳浩民掛心
阿佘與陳浩民傳緋聞時間最長，被記者問到二人前後腳到酒吧一事，她即笑問幾時，又直言想見對方。
