無綫新紮姐仔陳敏之，喺啱啱播完嘅劇集《美麗高解像》得到唔少好評。劇入面嘅佢因減壓染上毒癮，不惜素顏上陣以真面目示人，認真搏到盡。

敏之登上司機位，做柴可夫送友人離開。

早前八太就喺銅鑼灣見到敏之同一位年約四十幾歲嘅男友人，去咗景隆街一間日本串燒餐廳醫肚。當然敏之冇化妝，但依然皮光肉滑，精神飽滿，同劇中嘅佢完全判若兩人。佢哋食到凌晨十二點幾齊齊行出餐廳，敏之仲唔介意做埋司機送友人離開。

食飽咗嘅陳敏之零舍醒神，同男友人步出時眼仔碌碌。