喬寶寶落地生根做小丑
在懲教署任職16年的喬寶寶,最愛散播歡樂。在同事鼓勵下,他以出位造型參與無綫節目《殘酷一叮》,並成為藝人。入行初期,他坦言受過不少白眼:「好多人見我唔係中國人,以為我乜都唔識,又唔識講中文,其實唔係囉!」慶幸他天生性格樂觀,終漸漸為人受落:「香港人太緊張喇!生活節奏好易令人爆煲,好需要有笑料調劑生活,我希望將歡樂帶畀觀眾。其實做小丑唔易,人與人之間需要互相鼓勵,唔好淨係識一盆冷水淋落去!」
樂:
在香港出生的喬寶寶,認為自己是一個不折不扣的香港人:「雖然我唔識睇中文,但我嘅廣東話好過好多香港人。香港唔止係我嘅家,仲畀到我唔少鄉土感覺,唔係因為我成日出入重慶大廈,係因為我真係好鍾意呢度!」
喬寶寶在娛樂圈2年,得到的人生經驗卻比16年懲教署生涯多:「喺懲教署多數對住犯人,工作基本上千篇一律,喺娛樂圈就睇到好多人生百態,有人對你差,有人對你好,隨處都有小人,亦隨處都見貴人,好刺激!最重要係我識到一班圈中好友,令我嘅生活圈子擴闊咗好多!」
姓名:Mohinderpaul Singh Gill(喬寶寶)
年齡:40歲
出生地:香港
現職:演員
陳智燊學潮語挑戰難度
在英國出生的陳智燊(Jason),雖然在當地主修中文,但要講得一口流利、地道的廣東話亦非易事,尤其是「潮語」,只好多看報紙下苦功:「我喺外國長大,講中文轉數一定唔及本地人,香港好多主持好似崔建邦、李浩林咁,真係講得好流利,我惟有同朋友講多啲,先練到廣東話好啲。」
Jason認為外國的競爭比香港少,故自小已養成凡事樂觀面對的性格,這種開朗的性格,令他在娛樂圈甚得人心,他說:「我同陌生人都可以好快熟,特別喺呢一行更加有用,因為我同啲未合作過嘅藝人、工作人員,都可以好快就好Close,熟啲嘅話,拍嘢會方便好多!」
得著:由於英語流利,Jason剛從無綫藝員訓練班畢業,已獲邀擔任明珠台節目主持,並為節目撰寫旁白,他說:「全靠喺明珠台做主持,啲人先開始認識我,然後有機會喺其他方面發展!」他希望多向戲劇方面發展,挑戰更多高難度的角色。
姓名:陳智燊
年齡:32歲
出生地:英國倫敦
來港年份:05年
現職:無綫藝員、主持