陳法拉扭計食「飛佛」炸物

咪睇陳法拉骨肉勻稱、「瘦」色可餐，就以為佢日日節食，連水都唔敢飲多滴，原來佢不知幾擦得，對食仲好有要求添！小小So向來贊成「食得是福」呢句說話，法拉呢位「薛家準新抱」絕對唔吼茶記嘅揚州炒飯或黑椒雞扒意粉等，反而對美式連鎖快餐店嘅「麥X雞」同「巴X香雞翼」情有獨鍾！有日小小So撞到佢同經理人，咁啱聽到呢段感人肺腑嘅「食神」宣言！

陳法拉：好肚餓呀！點算好呀？

經理人：你要影相喎！

陳法拉：唔怕啦！食少少嘢先啦！

經理人：咁呀……不如叫附近茶記嘅揚州炒飯吖？

陳法拉：唔好啦！我要食「麥X雞」同「巴X香雞翼」，唔好叫餐喇！我唔食薯條！

經理人：好熱氣喎！食咁多冇益！

陳法拉：唔怕啦！我請你食咪唔熱氣囉！其他嘢我真係唔想食，呢兩樣係我最鍾意食嘅嘢，求吓你啦！

經理人：咁呀……好啦！

陳敏之嫌瘦想打脹塊面

陳敏之昨日出席復活節活動，她表示年頭已接了不少廣告，當中包括美容公司、美容產品及服裝，而有份參與的劇集《搜下留情》快將出街，故都想做多些宣傳。說到她的臉頰尖了，她坦言之前頸椎有事，吃不下亦睡不着，她說：「依家咪肥番少少囉，之前我頸椎神經線被壓，痛到落腳板，（唔驚人話你打Botox呀？）唔使啦，我咁瘦，自己不嬲有baby fat同水腫，但年紀大都開始收水。」敏之笑言嫌自己塊臉太瘦，要打都想打脹些，看起來會健康及飽滿一點。

陳敏之情緒不穩時會盡量令自己開心。

另外，敏之有份拍攝劇集《公主嫁到》，說到劇中演員梁麗瑩的母親因抑鬱症自殺，她說：「希望佢冇事，香港人好多都有抑鬱症，我都有情緒唔穩定嘅時候，惟有盡量令自己開心，唔好諗得太負面。」