無綫藝員陳美詩（Macy）自爆小時候經常與弟弟打架「切磋」，更試過鯨吞兩個即食麵、一個麵包、一杯雪糕及一包大薯片，是一個不折不扣的「大食男人婆」！
放大圖片
飲食篇：
問：試過一日最多同最少食幾多嘢？
答：試過最多一次過食兩個即食麵、一個腸仔包、一杯雪糕同埋一包大薯片；最少就試過一星期入面淨係食菜。
問：食唔食得辣？
答：我食得勁辣，食過號稱全世界最辣嘅辣椒醬添！
解讀：我有次做完運動，唔知點解特別肚餓，所以就一口氣食咗兩個公仔麵，加多個包，一杯雪糕仲有一大包薯片，食完都覺得誇張同埋後悔！至於一個星期都係食菜真係忍得幾辛苦o架，尤其係見到朋友大魚大肉嗰陣！
問：如果係升降機度唔小心放咗個屁，個個都懷疑係你嗰陣，你會點反應？
答：我會直認！之後狂講唔好意思啦！
解讀：雖然我未試過當眾放屁，不過咁多人都懷疑係你放屁嗰陣，認唔認都一樣啦，如果真係我放又唔怕認嘅，我都唔想o架嘛！
問：信唔信有第二個空間，而且嗰度又有另一個你？
答：都信o架！我有時都會諗其實依家身處喺夢境，醒番之後就係另一個世界。
解讀：我好鍾意幻想，所以都會相信第二個空間有另一個我！
問：你會點對付有臭狐嘅朋友？
答：我會敬而遠之，或者同佢講嘢時盡量閉氣，我可以閉好耐氣o架！
解讀：如果係唔識嘅人我會敬而遠之，但如果係朋友就冇理由為咗呢啲嘢疏遠佢o架嘛，所以我會閉氣同佢講嘢囉！
問：如果發現自己得番一個鐘頭命，你想做啲乜？
答：我會為自己籌備一個開心而隆重嘅安息禮拜， 因為我終於可以返去主耶穌嘅懷抱！
解讀：因為信仰嘅關係，我唔係好怕生命終結，相反我唔想親友太傷心，所以會為自己籌備一個開心而隆重嘅安息禮拜！
問：有冇試過同男仔打交？
答：有！以前經常同我細佬「切磋」一下，不過除此之外就冇喇！
問：有冇試過寫信畀明星？
答：有！我曾經寫過畀金城武，因為佢真係太靚仔喇！
解讀：我以前好鍾意同弟弟打交，耐唔耐就會「切磋」一下！（邊個贏多？）都冇話邊個贏嘅，不分勝負！雖然我男仔頭，但都有少女情懷嘅一面，金城武就係我嘅偶像，最鍾意佢對眼同埋把聲，嗰陣好期待佢幾時回信，不過最後都冇回信。
