飛車撲頂 拍劇賣命 祥仔8成信心3連帝

黎耀祥憑《巾幗梟雄》及《義海豪情》兩部台慶劇,連續兩年穩奪視帝寶座,今年他再接再厲,以近日熱播的《法證先鋒Ⅲ》劇集角逐。祥仔今次可謂搏晒命,跳車頂、飛車、火爆場面全部親身上陣,誓要與被視為大熱的謝天華、林峯、鄭嘉穎及陳豪硬撼一仗。

去年無綫推出《義海豪情》台慶劇時,祥仔在訪問中這樣說:「《義》劇捉到歡眾口味,能觸動觀眾個心,我對這部劇好有信心。」結果《義》劇果真「爆紅」叫好叫座,令他冧莊視帝寶座。事隔一年,再次與祥仔做專訪,他又用肯定語氣說:「看過眾多警匪片,《法Ⅲ》劇有齊各方面成功元素,好適合觀眾口味,完全無壓力,亦沒擔心過收視問題。」同樣的信心爆棚,祥仔應可做其第3年視帝?

冧莊視帝 自認行運

劇中飾演法證科高級化驗師的祥仔,與法醫張可頤有感情綫,還與飾演警察的吳卓羲、徐子珊有不少對手戲。為免影響演出,祥仔沒有看過《法證》的第1及第2輯,今次是新故事、新組合,所以他希望用新的演繹方法。
最初接到劇本時,祥仔覺得好有趣,因每宗案件涉及複雜人物,案情又曲折離奇,可吸引及帶動觀眾追看及代入。祥仔說:「今次角色甚至乎比《義海豪情》劉醒一角沉重得多,但就無擔心過收視,《法Ⅲ》故事有趣味性,演員又稱職,而案件的整體鋪排夠曲折,峰迴路轉,觀眾追看時,可以競猜誰是兇手,順便畀個提示給大家,兇手永遠不會是最初出場那幾個人。」

祥仔對部劇大派定心丸,至於問到3連冠奪視帝的信心時,他的信心由最初5成,到今日激增至8成,不過奪獎與否,始終要顧及客觀形勢。他更說,每位藝員都好努力,拍出來劇集好不好,根本沒有標準,就好似當年張國榮及譚詠麟激鬥一樣,各自有擁躉。

去年祥仔以一面倒形勢冧莊,連他自己也說行運,今年可否3連冠?他覺得好視乎《法Ⅲ》的口碑及收視成績,頒獎禮這個遊戲,主要為無綫宣傳,從而帶出一個熱炒話題,如果部劇爆紅而得不到獎,對無綫都無好處,始終觀眾才是大客戶。

親自飛車 阿仔睇實

雖然祥仔拍劇不為攞獎,但今次他為《法Ⅲ》好搏命,劇中飛車、玩火、在天台打鬥等場面,統統由他親自上陣。其中有場戲講張可頤被綁架,他為救可頤,由山坡飛身跳落車頂,結果都是救不到可頤,還被匪徒捉住。
講到這幕飛車頂鏡頭,起初導演擔心他的安全,但祥仔堅持親自上陣,除了希望拍出來效果更真實外,最關鍵的原因,原來是他兒子在場,兒子一向視他為偶像,看到老竇飛身落車頂,幾有型呢!為了不想在兒子面前失威,當然拒絕用替身,「因為我太熟悉鏡頭的剪接,大家都知這類鏡頭一定用替身,但某些鏡頭觀眾看到演員親自拍攝才會看得肉緊。今次算搏,近年較少拍動作戲,我會衝量出來的效果,如果不需要就不會請纓上陣,幾十歲人受傷就唔抵。」

今次祥仔除了搏命演出外,還首次與吳卓羲(Ron)合唱主題曲,分分鐘上《勁歌金曲》攞獎,祥仔戲言,如果大家對他與阿Ron這對組合受落,會考慮進軍樂壇,與Twins打對台。

這幕飛車撲頂,祥仔堅持親身上陣。 <
這幕飛車撲頂,祥仔堅持親身上陣。

與吳卓羲合唱,或會上《勁歌》挑戰Twins。
與吳卓羲合唱,或會上《勁歌》挑戰Twins。


本文鏈接:飛車撲頂 拍劇賣命 祥仔8成信心3連帝