馬國明（左）和鄭嘉穎兩個大男人合作拍攝《鐵馬尋橋》，發覺彼此臭味相投，變成沙煲兄弟。

鄭嘉穎和馬國明在無綫劇集《鐵馬尋橋》中飾演好兄弟，現實生活中，馬國明坦言最初知道和鄭嘉穎合作，覺得嘉穎只懂擺甫士，又有不少朋友告訴他嘉穎為人麻煩，不過相處過後彼此了解加深，竟成了好友。

鄭嘉穎和馬國明日前在奧海城接受訪問，宣傳劇集《鐵馬尋橋》，兩個大男人坐低即談個不停，原來合作前，不少朋友忠告馬國明指鄭嘉穎好麻煩。
馬國明笑說：「老實講，未同佢（鄭嘉穎）合作前，睇佢做戲覺得佢又係擺甫士，跟住好多人知我會同嘉穎合作，又叫我小心啲。嗰啲人話同鄭嘉穎拍劇真係好麻煩，佢哋口中嘅麻煩唔係乞人憎鬧人嗰種，而係話佢難相處，直到我哋合作後，反而好快同佢熟絡，啱晒 channel，可能大家都係臭味相投。」

鄭嘉穎和馬國明劇中扮演兄弟，一起對抗仇家的迫害。　劇照

嘉穎被指為人麻煩，他自辯只是要求高，帶一點藝術家的脾氣。

演員互相關心

聽完馬國明一番話，鄭嘉穎忍不住邊笑邊說：「有冇咁嚴重呀？不過我諗我哋最夾嘅地方，無論係演戲同做人都係一啲好固執嘅人，因為大家都有藝術家脾氣。馬國明好多場戲都好好，佢各樣嘢都有齊，可以叫做齊晒架生，家只欠缺一個機會，一個好嘅角色。呢套劇全部人都拍得好開心，又冇是非。」
馬國明補充道：「以前一班同事合作，就算拍戲嗰陣有幾 friend都好，之後見到面最多都係傾一兩句就散，如果唔 friend直情唔睬，今次一班演員間唔中約埋食飯睇戲，又會互相關心。」
雖然今次合作愉快，然而該劇播映以來收視平平，他們說：「可能係啱啱開始，而且最近睇劇風氣又唔係好暢旺，不過我哋都想觀眾畀機會去睇，要睇先知道好定唔好。」
採訪：何慧斯　攝影：葉君海
場地提供：馬泰（奧海城）
服裝提供： Club Monaco