馬賽MC Jin飛躍更高境界

頒獎禮如初生之犢的審判日,頒獎嘉賓讀出你名字前,腎上腺素登時上升。今年有份「受審」的馬賽和MC Jin幸而沒名落孫山,有份手執「金色TV Buddy」獎座。但這次飛躍定必好好把握,稍一懶惰隨時粉身碎骨!

由Rap歌界跳入公仔箱做主持、拍劇,現年29歲的MC Jin(歐陽靖)今年確實豐收。愛情,他與拍拖多年的圈外女友Carol於年初結婚;事業,加入無綫近兩年的他今年首次拍劇,便奪得「飛躍進步男藝員」獎,事業愛情兩得意。MC Jin坦言當初發現提名表中有其名字很「震撼」︰「提名表上見到好多一哥花旦小生,全部好有經驗,但我竟然有三項提名!」

MC Jin奪獎當日振臂高呼,他直言由始至終都恨攞獎:「頒獎禮前大家問我有冇信心、恨唔恨攞獎?我有信心,我好想攞!不過如果我冇得獎都唔會灰心。」

處男劇帶挈「入屋」

MC Jin今年的曝光率確實比前多,他感激無綫對他的信任︰「呢幾年演藝事業嘅故事由TVB開始,做主持、上勁歌、玩獎門人再拍劇,遇到好多貴人信我嘅能力。」而今年突破拍劇、憑「立青」一角成功入屋的他說︰「好幸運角色寫得好又有好平台。」又坦言希望有更多發揮機會︰「電視劇嘅威力大,對演藝事業有幫助。」問到明年會否挑戰男配角獎?他說︰「冇諗咁長遠,我好認同老友陳奐仁話要有『天時地利人和』,好似我有咁嘅機會,先有得把握同爭取。」

結婚下一站「生仔」

成功男人背後多有一個默默支持自己的女人,MC Jin也不例外,他坦言太太Carol極之重要︰「今次得獎除咗感謝主,第一個就係我老婆,佢喺我最低潮嘅時候進入我生命。」太太不離不棄令他極為感動︰「我當時事業唔升反跌,其實佢可以拍拍籮柚走,但佢不斷畀推動力我。我哋結婚只係第一步,仲有好漫長一段路,仲會生小朋友組織家庭。」

將會開個人音樂會的MC Jin透露,明年計劃用英文Rap出今年的經歷︰「上次出英文碟係01年嘅事,今年結婚都可以寫幾首歌啦!」

後記:想同馬賽合作

MC Jin甚少跟無綫女星合作,雖然今年的「飛耀進步女藝員」獎得主馬賽跟他未有合作機會,但他仍衷心替對方開心︰「因為同路人感受一樣,有機會梗係想同佢合作啦!可以請佢上兄弟幫,都係一個新開始。」

非「戲班」出身的馬賽抱着只有兩成機會得獎的心態,默默坐在頒獎台下等候宣判,心情隨着開始播放候選「飛躍進步女藝員」劇集片段而不安,直至有人高呼「馬賽」,她詫異得伸脷!她坦言當時想:「真係我攞呀?」致辭時她更忍不住流淚:「我原本以為唔會喊,但最後都忍唔到,呢三年我全情投入拍劇,每次拍得唔好,返到屋企都會喊,中間好多好辛苦嘅細節!」由於預先沒綵排答謝辭,講不夠兩句就被工作人員催趕,可幸她不忘答謝無綫高層樂易玲。二人相識始於她08年參選港姐:「當時入選港姐,樂小姐係評委之一,後來開始做演員,佢都有鼓勵我。以前覺得佢好嚴厲,原來佢成日留意藝人做嘅嘢!」

跟黃智雯並肩作戰

她認為跟四位候選強敵黃智雯、高海寧、龔嘉欣及樂瞳各有千秋:「我哋五個Style好唔同,各有長處,佢哋有好多嘢值得我學習。」賽前她一直睇好黃智雯:「大家係互相嘅『勁敵』,佢做到有啲角色我做唔到,佢又想好似我咁拍多啲古裝,大家會互相鼓勵,係彼此嘅推動力!」相比之下,她多了一點運氣,皆因她花兩年時間拍的三部劇集《九江十二坊》、《不速之約》及《萬凰之王》今年一口氣推出,讓觀眾加深了對她的認識,見證着她的進步。

三年來努力拍劇,亦是為最初擔心她踏上演藝之路的雙親打下強心針,有時她的爸爸在電視看完她的演出後會傳短訊讚她,媽媽亦對她另眼相看:「媽咪以前會諗阿女係咪啱做戲,佢會話唔得就讀番書,今次佢認同我有潛質,咁親密嘅人對我改觀係好大鼓勵!」

難忘阿姐松哥提攜

兩位前輩汪明荃及劉松仁的話更令馬賽感動至今!她表示得獎後上台跟阿姐擁抱時,在阿姐耳邊說:「多謝你,喺我拍第一套劇時教我咁多嘢,佢就答『咁你值得我教吖嘛!』最初同佢合作,佢已經叫我諗清楚係咪想做呢行,係就要磨練演技,我唔可以辜負佢!」而即將跟她再合演新劇《名媛望族》的劉松仁,儼如其師傅,每次埋位前都會跟她剖析角色及教授演技。

後記:讚MC Jin多才多藝

雖然從未跟MC Jin合作,但他Rap功了得,令馬賽印象深刻:「佢好多才多藝,我冇睇《潛行狙擊》,不過好多朋友都讚佢喺套劇做得好出色!佢得獎致辭時好激動,頒完佢就頒我個獎,所以佢致辭時我個心已經好亂!」

動作多多的MC Jin夠晒活潑,難怪拍處男劇大獲好評。

動作多多的MC Jin夠晒活潑,難怪拍處男劇大獲好評。

MC Jin

看馬賽擺甫士就知她愈來愈有自信,相信父母一定給她很大鼓勵!

看馬賽擺甫士就知她愈來愈有自信,相信父母一定給她很大鼓勵!

馬賽參選港姐時曾到珠海拍外景,當時的她還很羞澀。

馬賽參選港姐時曾到珠海拍外景,當時的她還很羞澀。

MC Jin跟馬賽分別奪得飛躍男、女藝員獎,喜上眉梢。

MC Jin跟馬賽分別奪得飛躍男、女藝員獎,喜上眉梢。

馬賽

女飛躍愈戰愈勇

「飛躍進步女藝員」是踏上一線花旦的台階,若能把握機會,隨時升至「視后」之列!

胡定欣
胡定欣憑出色表現得獎後人氣急升,去年及今年分別憑《刑警》及《法證先鋒Ⅲ》先後打入「最佳女配角」最後五強。

陳茵媺
陳茵媺09年憑《學警狙擊》及《烈火雄心3》得獎,其後開始擔正演出,去年參演處境劇《天天天晴》後,今年亦有三套劇出街。

唐詩詠
最初多演綠葉角色的唐詩詠,去年演《鐵馬尋橋》應雁鳴一角備受讚賞,為她帶來「飛躍」獎,其後在多部劇集中任女主角。

男飛躍展翅高飛

歷屆圈中不少男星奪「飛躍進步男藝員」獎後,劇接劇兼戲份增多,開展輝煌的演藝路。

王祖藍
08年王祖藍得獎後,由主持到拍戲等多方面發展,其中主持《荃加福祿壽》令人印象深刻,今年亦擔正拍劇集《福祿壽探案》。

敖嘉年
敖嘉年09年勇奪「飛躍進步男藝員」獎後劇接劇,於《魚躍在花見》等劇獲好評,於《花花世界花家姐》更首次任第二男主角。

黃浩然
去年得主黃浩然得獎後人氣急升,其後參演《女拳》、《真相》及《我的如意狼君》等電視劇,更開始擔正,為當家小生之一。


本文鏈接:馬賽MC Jin飛躍更高境界