驚Sam哥搶戲 Chilam推《衝2》避鎮宇

FACE週刊 第240期

唔爭戲

驚 Sam哥搶戲  Chilam推《衝 2》避鎮宇

2011年12月28日

《衝上雲霄》 03年播映至今一直令人回味,除型爆機師吳鎮宇,又有當年嫩草 S4吳卓羲、陳鍵鋒、黃宗澤和馬國明,相隔 8年,終扑鎚拍續集。
早前 TVB於節目巡禮出現《衝上雲霄 2》宣傳片,以外援新血張智霖( Chilam)孭飛主打,而吳鎮宇則以客串形式現身,原本有指張智霖為還劇債拍《衝 2》,吳鎮宇亦講明會盡量留檔期,絕不考慮客串。上月 Chilam忽然轉軚:「我冇可能同無綫不停獻媚。」擺明想推劇。據知 Chilam近日正式向無綫辭演,事緣 Sam哥鎮宇終肯「點頭」拍續集, Chilam為免被搶戲分,連 8萬蚊 1集的劇酬,寧願唔賺!


聞《衝 2》皺眉
未落實(真實對白)
Chilam於上週六( 24日)出席活動時,聞《衝 2》問題時,即時額頭一皺稱未知係咪落實接拍,其助手亦迅速推走佢避答,只解釋當日戴黑超係因為同姨甥玩時,撞傷右眼(下圖)。

《衝上雲霄 2》落實下年 5月開拍,一眾《衝》迷梗開心,不過未開拍已經大堆是非,先傳出 Sam哥吳鎮宇怕被無綫合約縛死及嫌錢少,決定唔拍;又有話 Chilam以 8萬 1集拍《衝 2》幫 TVB打仗。以為 Sam哥蒸發,點知最後 Chilam怕同 Sam哥爭戲分,決定以「冇檔期」為由拒拍,兩個中佬爭來爭去。


同法拉做情侶
巡禮片段中,飾演機長嘅張智霖戲中與妻子離異,連帶兒子亦被帶走,之後與飾演女機師嘅陳法拉發展戀情。


壓軸現身
最初巡禮片尾,上集飾演 Sam嘅吳鎮宇突然出現,更手插褲袋謝賢上身笑住話:「飛機師囉,搵唔到四哥,咪搵我嚟搞!」為《衝 2》留下伏線。


唔客串坐正
好大機會拍!(真實對白)
上週一( 19日)吳鎮宇出席《 Laughing Gor之潛罪犯》時被問到會否參與《衝 2》時,佢話:「同無綫傾緊細節,我會盡量留檔期,但絕對唔考慮客串,亦唔想破例。」


冇喺 TVB一排嘅吳鎮宇,比喻自己係畢業生, TVB係母校,話近排母校「手緊」要畢業生「捐助」,而鎮宇返嚟第一炮就係幫邵氏拍《 Laughing Gor之潛罪犯》。

人多難突圍


有好戲點會唔預親生仔林峯一份吖,喺《衝 2》巡禮片中,林峯亦擔任戲分極重的角色,同胡杏兒有感情線,而胡杏兒今集於戲中,亦因一次意外要坐輪椅拍攝。

其實 Chilam拒拍,上月已有跡可尋,他接受電台訪問時,被問到搵到好劇本時,會否為電視台效力,佢坦白話:「我經理人公司係澤東,冇可能要向無綫不停咁獻媚㗎嘛。」
知情者說:「其實一開始 TVB搵 Chilam拍《衝 2》, Chilam都覺得有壓力,一嚟上集 Sam哥個角色太深入民心,二嚟又未知鎮宇係客串定同樣坐正,佢怕鎮宇太搶戲,一劇不能藏二虎,都係唔拍啦!何況套戲咁多人,咁多主線,好難突圍而出啦!」

Sam哥:盡量去爭!

上週一( 19日),吳鎮宇現身《 Laughing Gor之潛罪犯》,就接拍《衝 2》回應:「希望拍啦!都幾大(機會),會盡量去爭。( Chilam唔拍喎?)唔知喎(你哋有心病,所以 Chilam唔拍?)冇可能,我哋其實都有溝通過,唔係㗎!」
而上週六( 24日),張智霖出席活動時話:「我同鎮宇好 friend,我同佢唔知幾好朋友,大家冇心病,其實喺上集《衝》原本有機會合作,不過因檔期問題就唔到,家同 TVB仲傾緊,未有共識,一切要等公司安排。」係咪要等公司安排好晒啲搶戲靚位先肯呀?

馬國明:
留定期拍啦!

《衝 1》為 S4之一的馬國明,喺節目巡禮片中,雖然冇影,但問番馬明,原來一早已經留定明年 5月個期拍《衝 2》。
馬明話:「因為我已經拍咗幾套巡禮片,所以冇參與呢套,不過之前傾好晒初步嘅嘢,我都留定 5月個期嚟拍《衝 2》,不過未知會係全新故事,還是延續上集,淨係知道希望盡量原班人馬啦,(今次鎮宇及 Chilam有冇份?)初步同我講時話兩個都有份,加插巨聲幫做見習機師,而我今次會有感情線,(今次有冇 sponsor?)初步淨係知唔再係國泰 sponsor,未知係邊個。」不過據知香港航空已拍板贊助,聽埋馬明咁講,都算安落晒!


37歲馬國明 00年加入無綫讀訓練班,同期仲有葉璇,兩人同被選中做《衝》劇,馬明再度演《衝 2》同 Sam哥續片緣。

吳鎮宇歸位
梁家樹:唔想放棄 Sam哥


製作總監梁家樹

作為 12年最期待師奶劇之一嘅《衝 2》,巡禮片中,巨星雲集,除外援張智霖型仔揸跑車出場,仲同陳法拉有感情戲,仲有徐子珊、朱晨麗等新女加入;最期待當然係 S4黃宗澤、馬國明和吳卓羲,離巢嘅陳鍵鋒就冇份。
問無綫製作部戲劇製作總監梁家樹(小圖)《衝 2》陣容,佢話:「喺家真係太早,套戲 5、 6月先拍,製作經年,咁多星,檔期真係好難就(陣容同巡禮片一樣?)部分啦!(張智霖唔拍喎?)我未知喎!我哋都係傾緊佢個檔期問題。( Sam哥咁重要,唔會放棄啦?)梗係啦!我哋唔想放棄佢。(鎮宇話拍喎!)係啦!暫時就係咁樣!(吳鎮宇由客串變番主角?)哈哈!我哋乜都可能,我同啲演員一路聯絡緊!家最重要係度好個劇本先,有諗過續集係圍繞上一集啲關係,但有啲人又反對,所以要度好劇本先再確定角色,遲啲有劇本,我希望搵驚喜多啲人客串,有啲人想玩吓嘅,咪客串吓囉,好似上集都有 Eason(陳奕迅)同 Twins。」

S4搵新人


《衝 2》男主角爭崩頭,連見習機師嘅角色都大把人爭,監製話新劇未決定有冇「 S4」,但就唔排除搵巨聲幫同 MC Jin(歐陽靖、左一)喎!不過喺巡禮時出現過嘅 MC Jin就話仲未有聲氣喎!


當年由吳卓羲、陳鍵鋒、黃宗澤、馬國明組成的 S4機師角色,深受女觀眾歡迎,家個個大晒,冇得再做見習機師,點都要畀啲新人上位啦!


本文鏈接:驚Sam哥搶戲 Chilam推《衝2》避鎮宇