黃宗澤撇杏兒閃縮隊酒
黃宗澤同胡杏兒拍拖咁多年，兩個成日隔空打情罵俏，都好恩愛吓，但前幾日八太就見黃宗澤撇低女友，同兩個男友人去咗尖沙咀嘅酒吧飲嘢。之不過嗰晚黃宗澤就好鬼祟，戴晒鴨舌帽嘅佢，同朋友到場時頭耷耷咁急急腳入酒吧，仲揀咗張酒吧最入嘅枱，其實嗰張枱位置已經好隱蔽，但黃宗澤慌死畀人見到咁，仲要全程用個背脊「得」住門口，見佢就連行去廁所，都要拉高件衞衣遮住個樣。其實黃宗澤都係同男仔飲嘢之嘛，就算畀胡杏兒知道都唔係咩事啫，澤哥唔使咁避忌呀。
黃宗澤（右）日前與友人到酒吧飲嘢。
蘇玉華聞已婚自爆生埋仔
蘇玉華、胡楓昨日以六十年代懷舊造型出席商場活動，久未在港露面的蘇玉華，表示剛在紐約完成一年演藝深造課程，對於有傳她與男友已在美國註冊結婚一事，蘇玉華聞言即一臉愕然，並強調自己未婚：「邊個講㗎，冇咁嘅事，邊度結都得，世界咁大，唔一定喺美國結婚，呢啲開心事，會畀大家知。（咁即係結婚未？）未結，隨時都可以結。」
蘇玉華又表示深造期間，男友特意飛到美國探她，而問到會否擔心被誤會在美國秘密產子？她沒好氣表示：「係喇係喇，個仔兩歲添，依家肥肥白白。（依家有冇結婚計劃？）隨緣，最緊要活得快樂。」
