離開無綫向外闖，不少藝員都會選擇繼續跟舊僱主簽部頭合約保持關係，只有林保怡，在零後着下毅然離開，他笑言皆因大家要打穩陣波。自比是無綫貨架中一件過氣產品的他，甘願冒險，找尋樂意用舊型號產品的用家，各取所需，對無綫也無恨無怨。 撰文：羅美倫
為了劇集《天與地》，離開無綫的保怡仍落力配合宣傳，忙拍內地劇甚至與日本視帝唐澤壽明合作拍《六個陌生人》時，保怡依然心繫《天與地》，他說：「老實講，內地劇係畀到錢，但我唔係睇錢咁重，否則家唔會喺度做緊訪問，可能喺內地拍緊唔知幾多套，好凍咁捱緊飯盒，但有可觀嘅收入。我唔需要咁急搵錢．鋪靚條路畀自己行，唔好咁短線。」
林保怡毅然離開無綫向外闖，為的是給自己更大的空間發展。攝影：陳志嵐
《天與地》口碑好，保怡最想觀眾看完後有所得着。劇照
與鄭嘉穎（左）先後做過無綫視帝，保怡自比是過氣 iPhone，與嘉穎當紅的型號不同。資料圖片
亞洲視帝冇人理
保怡憑《掌上明珠》成亞洲視帝，但未獲無綫熱情對待，最終淡然離開。問到無綫對他如何，保怡說：「我只係一件貨品，好似家 iPhone4S好 hit吓，仲 iPhone4？家鄭嘉穎就係 4S，我就係 iPhone3，冇乜人理，但 iPhone3係咪真係冇用？無綫對我最好嘅時間已經過咗，好似一對戀人熱戀咁，已經分咗手，佢嘅新寵係鄭嘉穎，但可能有一日鄭嘉穎做番我呢個位，係好自然嘅事。」保怡在內地獲不少獎項，已不需理會自己在無綫是否已過氣，只想努力做好，靠實力維持自己在演藝界的位置，幸好他多年來都認真演戲，拍下《壹號皇庭》、《妙手仁心》等經典劇，才令他「襟撈」。
跟無綫分手，保怡不講舊愛壞話，只說：「分開冇話好唔好，緣份一定係咁，但我都攞番個尾彩，臨走仲有部《天與地》，《九江十二坊》個尾又好收得。」但攞亞洲視帝返港冇人理，會否感受不好？保怡笑言：「唔係冇人理，只不過係提醒佢哋以後嘅亞洲視帝要好好做嘢，我上年返嚟至做就疏忽咗囉！我一向 EQ好高，你點對我我咪點囉，如果人哋對你好反而要小心，佢一定有嘢謀你，好現實嘅世界。」
保怡快約滿時有好好跟無綫傾約，只是他去意已決：「了解我嘅人都知難改變我，決定係咁就係咁，最高層同我講都冇用，不如保持良好關係，畀我出去行個圈，但我可以出去行個圈係要多謝無綫喎，冇無綫嘅經典劇，林保怡點可能喺內地橫行。」
保怡坦言，對無綫只有多謝，沒有怨恨。
《掌上明珠》令保怡得到名譽，令他事業更上一層樓。劇照
雖獲封亞洲視帝，但在機場冇人接機，遭無綫冷落。資料圖片
跳出香港，林保怡的目標鎖定整個亞洲。
冒險拒簽部頭約
問保怡對無綫有冇怨恨？他說：「冇！怨恨乜嘢，又畀錢我使，我只係需要空間，喺一個空間做得太耐，有固定嘅劇本、朋友，餐廳又有固定好難食嘅魚肉燒賣，走啦！去闖吓啦！ 5月踏出嚟我真係 nothing，冇人搵我，唔知會發生乜嘢事，可能冇人搵林保怡，可能要返番去都未定，好彩一路有商演、有劇本搵我。」
問到零後着都走是否因心灰意冷？保怡坦言：「唔係，只係佢（無綫）可以做到嘅已經見晒，我唔可以改變公司，惟有自己離開，要自己藝術生命擴展，就一定要離開，亦冇感到徬徨。」出身自無綫的佘詩曼、蔡少芬等都會跟無綫簽下部頭合約，就只有保怡沒有，他笑言：「係得我一個走之嘛，佢哋可能未練好武功，驚出去闖，我冇所謂，唔簽咪唔簽，使死呀！佢哋打穩陣波，我就冒險啲。」
當年合作《金枝慾孽》的佘詩曼離巢但仍與無綫簽部頭約，保怡笑好友是打穩陣波。劇照
保怡在無綫最後一部劇《九江十二坊》，結局收視不俗。劇照
靠唐澤壽明帶挈
跟日本視帝唐澤壽明及韓星吳智昊合作《六個陌生人》，保怡有所寄望。
做過無綫視帝甚至亞洲視帝，保怡下一個目標是甚麼呢？他坦言：「製作人搵你，唔係視乎你得幾多個獎，而係你嘅實力，啱唔啱嗰個角色，睇吓《六個陌生人》嘅唐澤壽明幫唔幫到我喺亞洲發展，係整個亞洲包括中國，我唔係只搵錢咁市儈，唔好只講幾錢集，要有人信至得，錢搵唔晒嘅，我唔係好有錢，但我寧願揀好劇本、好角色，滿足感係錢畀唔到。」
《天與地》若腰斬網民會示威
保怡在《天與地》中演食人鼓佬備受讚賞。劇照
無綫劇《天與地》雖有好口碑，但收視一般，保怡未有失望，他說：「同 04年《金枝慾孽》嘅感覺一樣，開頭冇乜人理，但有好多人關注，亦喚醒好多已經放棄香港電視劇嘅朋友返屋企睇劇，所以我都將收視拋開，唔使點理。」至於有沒有對香港觀眾失望，保怡說：「冇，始終一個劇出嚟有佢嘅擁躉，唔可以話我哋個劇好人哋唔好，人哋個劇好我哋唔好，只不過係公司想要做乜嘢劇去吸引乜嘢群眾去睇，我喺無綫嘅劇向來一半一半，《讀心神探》算唔算商業？我覺得商業，睇劇本已知會有好收視，估到嘅，《妙手仁心》又有自己風格，攞到平衡，有啲嘢要犧牲，《天與地》犧牲咗商業，好希望觀眾睇完劇有所得着，唔係哈哈哈哈哈乜嘢都唔記得。」
多作新嘗試
保怡認為作為演員，很難得拍到一部另類劇集，實在應多作嘗試。問他怕不怕收視不好會被腰斬，他即笑言：「如果腰斬我諗幾大件事，啲網民出嚟示威呀！收視已經唔係一個指標，你話四十幾點，嘥氣啦，《天與地》有好多 noise，觀眾係兩極化，真係天與地。」