38歲的張智霖（Chilam）為做全職爸爸停產三年，不過20年前的「飛圖王子」並不是浪得虛名，去年尾復出拍劇出唱片兼開Show，一張酒窩童顏加滿身男人味，極端形象迷得一眾港女頭暈暈。不過，Chilam對突如其來的頻密工作大叫頂唔順，更曾在訪問中說:「好辛苦，工作愈排愈密，搞到我失準同甩嘴。」據知工作壓力更令Chilam出現脫髮危機。「希望今年唔使做」的袁詠儀 為保搖錢樹Outlook，即往掃防脫髮Treatment及有機營養食品，務求內外兼施助老公治脫髮。採訪：張詠森
十年無開迷你演唱會的張智霖，開Show消息一傳出即引來撲飛潮，中年老公有價，更帶挈埋重返視壇回響麻麻的袁詠儀，以夫妻檔名義拍鑽石產品廣告，在記招上，籌備生第二胎的靚靚更大膽許下心願：「希望今年唔使做。」靚靚唔想做又想生多件，難怪張智霖會甩頭髮。

努力尋Treatment

除了家庭壓力外，張智霖之前要出埠拍TVB新劇《魚躍在冬季》，加上唱片宣傳，及忙為6月推出新EP及8月在紅館開演唱會的籌備工作，突然要開行Turbo，令玩樂悠閒型的他大叫頂唔順，據知在多重壓力下令Chilam出現中年「男人最痛」，為免搖錢樹老公被脫髮拖累，日前晚上，靚靚一家三口齊往時代廣場內的超市買防脫髮Treatment，只見靚靚在Hair Corner不斷搵，十多分鐘後終被她找到一支價值138元的「Hair Loss Tonic Treatment」，一臉興奮的她拿着產品遞給Chilam，不過，後者只顧同囝囝慕童（魔童）揀Thomas牙刷及卡通膠布，對Treatment零興趣。

Chilamo氹功一流

買完Treatment及焗油後，脹爆靚靚即轉往掃有機營養食品，包括無任何化學劑的有機糙米以及高質日本蛋等等，在靚靚努力揀選食物的同時，一直抱住個仔，廿四孝老豆上身的Chilam依然無間斷地同魔童玩，時而對囝囝吹氣時而互唧，o氹得魔童全程哈哈笑。靚靚推住載滿戰利品的購物車往找數，魔童即企在購物車上的小童坐椅位四圍郁，突然間，魔童失足跌落地，喊聲響遍超市，臨危不亂的Chilam即抱起囝囝溫柔地說：「關我咩事喎，你自己跌之嘛。」然後呵吓、錫吓，魔童話咁快破涕為笑。

※靚靚一家三口行超市掃貨，選購物品全權由靚靚負責，Chilam九成時間擔任湊仔公。

※靚靚為保持老公的靚樣搵食，選購了防脫護髮產品。

※靚靚當日身形漲了不少。

※Chilam湊仔公上身:靚靚負責買，老公Chilam就全程掛住湊仔，其間魔童不慎跌倒哭起來，Chilam馬上呵吓o氹吓，魔童即時破涕為笑。

※本報記者曾拍得Chilam一家三口幸福遊街。