3週刊 第713期

高層出招放人益now

萬人迷林峯的去向，一直獲萬千女粉關注。從去年失落視帝，就開始傳出林峯對TVB心淡，意欲明年約滿後退出娛樂圈，回鄉執掌家族生意；到近日又傳他接now的重頭劇《大漢賢后衛子夫》，對娘家倒戈相向云云。

不過本刊接獲消息，實情係TVB高層為呵番林峯連環出招，除了破例讓他接now的劇集外，又特別安排他跟偶像梁家輝合作拍劇，令林峯十分happy，故他已口頭答應再賣身無綫三年，目前只欠動筆。

峯少事業路向清晰，但BB吳千語閃婚夢碎，短期內都冇得嫁。不過三年後BB都係得22歲，等吓先啦！

樂易玲出馬 傾掂林峯

TVB藝員部揸弗人樂易玲，對林峯續約就信心十足，「一直以嚟我哋合作愉快，雖然佢合約未完，但我哋一路有傾續約，年期方面就大家仲傾緊，出咩條件唔方便講啦，但一定好好。」講到林峯續約TVB，是否代表未來三年不會結婚，樂易玲就笑說：「我哋冇聽過佢話結婚喎，咁拍拖好正常啫，都咁大個仔。佢依家做嘢都好好呀，佢喺橫店拍緊劇，拍得好開心，同劇組合作愉快，好勤力，完全冇人話佢懶散，佢不嬲唔會咁做，拍拖亦冇影響到工作。」