3週刊 第723期

娛圈超級筍盤郭富城，天王嫂位置經常換人，繼坐了7年正印寶座的熊黛林後，再有華姐冠軍苟芸慧獲城城點燈，可惜「富黛戀」結束後，苟芸慧卻未能留住城城不羈的心，讓內地歌手模特兒葉熙祺成功入屋，禁室焚城30小時，但城城其後卻表示「享受單身」，新城嫂名份花落誰家，至今仍是未知之數。

城城雖然已經年近半百，但仍未想成家立室，對年輕嫩模仍然興趣盎然，享受追女仔的過程及樂趣，而有傳城城最愛以電話攻勢，綿綿情話冧女，又會以黃色法拉利接載心儀女孩去食糖水，再送錶送袋贏取女仔芳心，而曾替「維園霆鋒」龍心揼骨而成名的嫩模仙樂都，更向記者直認曾到城城寓所，為對方做facial，不過卻拒絕收城城送贈的平價手錶，她表示：「佢份人好好客，好多人都上過佢屋企玩啦。」不過城城新歡葉熙祺聽罷即反擊仙樂都說：「垃圾嘅人，我唔會回應。」寸仙樂都是垃圾，火藥味濃！

仙樂都直認曾攻城

近日有人爆料，原來城城曾和骨妹仙樂都熟稔，二人友好程度更達登堂入室的階段，據知當時仙樂都從事護膚品的直銷生意，經朋友介绍下認識城城，而城城隨即向仙樂都買了幾千元的護膚品，而一向有化妝師貼身護理皮膚的城城，對於新產品的使用方法不太清楚，特意邀請仙樂都到寓所幫忙，為他逐樣講解護膚品的用法及成份，其後仙樂都更為城城做facial，為答謝仙樂都，城城取出活動大會送贈的情侶手錶，將女裝手錶送贈仙樂都，但據知該手錶價值有限，仙樂都亦婉拒了城城的好意。

向仙樂都求證她到城城寓所，為對方做facial一事，仙樂都即表現得甚為驚訝，口窒窒回應：「妳點知呀？都係好耐嘅事，唔好再講啦，費事以為我揾佢嚟做宣傳啦，其實隻錶都好平啫，所以我都冇要到，你哋唔好亂寫呀。（咁妳係咪上過城城屋企？）佢份人好好客，好多人都上過佢屋企玩啦。（城城有新女友葉熙祺，有冇聽過呀？）佢咁多都唔知係咪真嘅。」仙樂都雖然不肯接受城城的示愛手錶，但她仍大讚城城甚有風度，而且非常靚仔，仍令不少女仔心動。

嫩模Monna認識城城

城城出手甚為大方，會送錶送袋，有傳城城曾送贈手袋力追另一嫩模林宜芝（Monna），向Monna求證，她即大方承認和城城相識。Monna表示：「好耐啦，都係幾年前嘅事，嗰時我仲未出寫真，都仲做緊model。喺中環夜店玩時撞過佢，大家有傾過偈，但依家冇聯絡啦，對佢嘅印象咪係天王巨星囉。（城城係咪追過妳呀？）唔知點解會傳城城追我呢，更加冇收過佢送嘅手袋啦。（若果城城追妳呢？）真係追我先算啦，佢都幾靚仔嘅，我又鍾意靚仔。（有冇聽過城城追其他o靚模？）冇聽過呀，我只係同自己公司嘅model熟，都冇聽佢哋講過。」

葉熙祺寸仙樂都垃圾

對於城城送錶冧仙樂都，兼讓女方進「城」，葉熙祺回覆時語帶醋意，嬲爆寸仙樂都說：「垃圾嘅人，同垃圾嘅新聞，我都唔會回應！」

惹火仙樂都

仙樂都原名吳堯堯，因在網絡電台節目《星期5冇女2》內飾演仙樂都一角而被稱為「仙樂都」，中泰混血兒，經常以性感裝扮示人。於節目上被有「維園霆鋒」之稱林克霖（又稱「龍心」）涉嫌非禮，其後仙樂都報警求助，最終龍心被判監禁21日。