3週刊 第728期

距離《萬千星輝頒獎典禮》還有三個月，本年視帝視后花落誰家仍是未知之數，但去年為視帝爭崩頭、呼聲一直最高的林峯，最終仍然無緣「登基」一嘗視帝滋味，今年林峯更罕有沒有劇集播出，已肯定與「帝」無緣。

據了解，自從與女友吳千語高調撻著之後，林峯「爭帝」之心已不復當年勇，加上與TVB約滿在即，林峯已決定只與TVB改簽一年一劇的部頭約，改而自組公司自己話事，自此他與TVB關係已大不如前。

雖然林峯鐵定出局，但視帝之爭仍然激烈，除了有剛播完的《衝上雲霄Ⅱ》的「機長孖寶」吳鎮宇及張智霖外，還有本年台慶劇之一《My盛Lady》，擔正的是收視幾乎未衰過的黃子華，還有另一套台慶劇《On Call 36小時Ⅱ》，去年勇奪「我最喜愛電視男角色」的馬國明絕對是黑馬，戰況激烈。

對於本年度的頒獎禮，TVB外事部副總監曾醒明表面會再一次以公投形式選出視帝視后。「其實時間尚早，一切都未有決定，但就肯定會用公投方式去選，但詳細情形就真係要遲啲先知，至於林峯今年佢冇劇播出，所以佢應該冇得候選，至於嚟唔嚟撐場？就要等藝員科度唔度到期。」

除了有年初收視反應理想的《老表，你好嘢！》之外，還有即將播出的《巨輪》、《法外風雲》（前名《傳愛事務所》）、《On Call 36小時II》、《My盛Lady》等等，在內部都得到極高評價，因此連帶視帝之爭，亦出現不少變數。就像去年三奪視帝的黎耀祥，雖然有《神探高倫布》滑鐵盧之役，但今年將會有《法外風雲》在10月播出，仍有收復失地的機會。

馬國明：續集好大壓力！

不過身在內地拍劇的馬國明，在電話中表示信心不大，但仍不忘多謝網民選他為視帝黑馬。「始終今次係續集，演出方面受到第一輯框框影響，應該唔會有第一輯咁大反應，但我當然希望劇集收視理想啦，至於視帝就真係唔敢諗，有當然好開心啦，如果冇咪以後要更加努力。而且今年對手真係好強，好似《巨輪》我聽公司人講呢套劇拍得好好，咁已經有陳展鵬同蕭正楠，另外《法外風雲》有祥仔同陳豪兩個視帝，當然仲有《衝上雲霄II》鎮宇同Chilam，仲有次次拍劇都好高收視嘅黃子華，咁嘅對手陣容……我估點都未到我啦，但我真係好多謝大家咁俾面話我係黑馬，咁樣已經好開心。」

黎耀祥：我睇好吳鎮宇！

對於三次憑古裝或民初劇稱帝的黎耀祥，當然希望《法》可以受觀眾歡迎，但他只會抱平常心面對。「今次《法》算係一半輕鬆一半嚴肅嘅劇，當然比起《巾幗》或《大太監》輕鬆好多，我當然希望《法》可以得到觀眾歡心，但拍咗咁多年劇，我都係抱平常心面對，獎當然想有啦，但唔會太過刻意去諗。其實《神》嘅失敗，對我嚟講都可以係好事，起碼成個過程我都學識好多嘢，我最怕就係劇集播咗但冇人留意，就咁播完就算，有人鬧或者有人讚，我先知道自己有咩可以改善。今年其實都好多好劇，如果俾我揀視帝，我會揀《衝上雲霄Ⅱ》嘅吳鎮宇，佢好戲冇人會反對。」

嘉穎阿佘台慶擔大旗

佘詩曼最近簽約TVB跟內地公司合組的TVBC，正式回歸，日前更現身TVB拍月曆。而近兩年大部分時間都長駐內地拍劇的鄭嘉穎，雖然忙於內地掘金，但為吸引觀眾，有傳TVB將安排這對過氣緋聞情侶，於11月19日的《萬千星輝賀台慶》中擔大旗。

至於扭計未傾續約的林峯，以及傳簽陳慧琳經理人鍾珍的陳法拉，今年台慶應該無影。