馬國明:我最欣賞蒼井空!

近日杜汶澤極速操肌拍攝電影《豪情2》,在片中飾演AV男優,與多名日本真正AV女優拍攝「動作場面」,令不少人再度留意被視為日本重要「產業」的成人電影行業。AV全名為Adult Video,顧名思義就是成人電影。日本AV業一向手執亞洲成人電影的龍頭位置,雖然其他亞洲國家都有拍成人電影,但始終不及日本的專業。隨住近年社會風氣開放,日本不少青春少艾甚至會主動走上AV事務所面試,希望走捷徑搵快錢。多年來日本AV曾捧紅過不少國際知名的AV女優,但隨住近年AV事務所改變策略,要拍AV成為亞洲知名巨星,幾乎已成為絕響。

就如早前馬國明在訪問中說過,有邊個男人未上過網睇鹹片。的確,隨住科技進步,香港人由以往鬼鬼祟祟上樓買寫住「歡樂今宵」的鹹帶,到去信和買「四樓有四仔」的VCD,再到現在安坐家中上網慢慢揀,揀咗先下載的BT年代,AV影響香港人的生活習慣,絕不比兩個「是是但但電視台」遜色。

3週刊 第733期:杜汶澤:萬二分尊重AV女優 馬國明:我最欣賞蒼井空!

修身做男優

香港人熟悉AV,因此不時有電影會找日本知名的AV女優來港演出,增加吸引力。就像近日正在熱拍中的《豪情2》,貴為男主角,在片中將會一人大戰過百女優的杜汶澤,就率先效法張家輝瘋狂操肌,由圓咕碌的「肥佬」極速修身成有胸又有腹的型男,就是為了要做一個「有型又有款」的AV男優。

「為呢套戲,我每日要做一個鐘帶氧運動,一個星期要有三至四日去舉重,但講真只有三成係靠舉重同運動,淨低七成就要靠食,控制飲食先至係關鍵。每一日都要攝取足夠蛋白質,又要少食多餐,過晏晝就唔食澱粉質,重要戒絕油同糖,真係少心機都唔得,我重要同大家講,唔好相信任何秘方,只可以相信自己決心同紀律。」

尊重AV女優

對於杜汶澤初演AV男優,能夠與一眾AV女優「埋身肉搏」,叫不少男士都趨之若鶩羨慕不已,但當事人杜汶澤卻笑言是有苦自己知,「好多人都羨慕我同咁多AV女優,好似香港人好熟悉夕樹舞子拍戲,但呢個真係一個好大同好嚴重嘅誤會,真係有苦自己知呀……就好似去食飯咁,有前菜但無主菜食,哈哈。喂,我又唔係拍四級片,齋做戲無過程,所以心理同生理都要有轉變,休息時間真係唔想再見到女人嘅身材呀!不過好認真咁講,AV女優係絕對值得尊重,因為佢哋唔係大家想像中咁樣,鏡頭之後佢都係普通女仔一個,大家都有辛酸嘅一面。之前有冇睇過AV?我話冇你都唔信啦,今次開機前都要睇好多AV,但就係研究AV係點拍,等自己可以更加投入。」

馬國明:「我最欣賞蒼井空!」

曾經在本刊訪問中直認上過鹹網的馬國明,就表示非常尊重這類型的演員,除了日本的AV女優外,對於港台的三級片女星,就更加佩服到五體投地。「我一直都好欣賞蒼井空,佢由一個AV女優,可以成功轉型做演員,做歌手,就連大陸都有市場,重要係正經發展嗰種,真係好唔簡單;另外飯島愛都係我好欣賞嘅女星,佢可以出書做才女,都係好唔簡單。其實唔淨止日本AV女優,港台好多拍三級片女星都好值得我哋欣賞,好似葉玉卿、舒淇、李麗珍都一樣拍過三級片,都係好需要勇氣,都係好成功咁轉型。你叫我除衫拍戲……我諗幾多錢我都冇本事去賺。」