3週刊 第737期

儘管近日TVB因為免費電視牌照風波而成為眾矢之的，連帶《法外風雲》亦被批評劇情與現實有很大出入，不過正所謂「又要鬧又要睇」，《法》仍然錄得不俗收視，而在劇中飾演二世祖大奸狗的王浩信，越近結局就越乞人憎，而早前他在劇中前前後後被母親謝雪心連摑帶打近50巴，再加早前在《名媛望族》中硬食劉松仁13巴，被網友稱為「兜巴信」的王浩信人氣越打越高。據本刊收到可靠消息，指下月舉行的《萬千星輝頒獎典禮》，「兜巴信」奪得「最佳男配角」呼聲甚高。只是人氣急升，但他卻因為太過入戲而嚇親老婆陳自瑤，上位代價不菲。

雖然近年TVB劇集飽受批評，但在別無選擇之下，黃金時間煲劇仍是大眾市民每晚的主要節目，就像本週進入結局篇的《法外風雲》，雖然集兩大視帝陳豪和黎耀祥演出，不過焦點卻落在大奸狗王浩信身上，令這位前兩年都是「飛躍進步男藝人」大熱門的他，今年有機會升呢贏「最佳男配角」，上位在望。

與阿姐言談甚歡

本週一（18日），貴為TVB力捧之星的王浩信，有份出席《萬千星輝賀台慶》的拜神儀式，可見他備受重視的程度。當日所見，王浩信到場之後就即時找助理編導了解流程，之後就與企定定與「阿姐」汪明荃傾偈，雖然「兜巴信」近日人氣急升，但面對份量十足的阿姐，全程大部分時間都是垂手聆聽阿姐訓示，非常謙虛，沒有因為人氣急升而變得自滿。而阿姐亦似乎非常眷顧這位上位中的後輩，一老一少似乎言談甚歡。

爆紅各大討論區

據本刊收到可靠消息，由於近年王浩信表現不俗，他在《法外風雲》角色雖然犯眾憎，但卻令他人氣急升，加上劇中其中的一幕戲已經硬食謝雪心23巴掌，令他一夜間在各大討論區爆紅，間接令《法》成為熱話，而且近年王浩信演技有明顯進步，加上外型高大，屬可造之材，所以眾高層傾向將於下月中舉行的《萬千星輝頒獎典禮》，向他頒發「最佳男配角」。

「今年爆出劇集唔算太多，對上一套已經係年頭《老表，你好嘢！》，不過始終相隔咁耐，唔夠《法》咁新鮮滾熱辣。本來『最佳男配角』應該係《老表》阿Bob同《巨輪》阮兆祥之爭，不過佢兩個始終唔係親生仔（經理人合約），角色talking point又好似唔夠王浩信咁勁，《On Call 2》又冇想像中咁爆，依家係睇《My盛Lady》會唔會有角色爆出，如果冇的話，『最佳男配角』王浩信都應該走唔甩。」一名知情者表示。

對於一度被視為大熱，Bob在電話中表示如果有得提名已經非常開心，「嘩，有得提名已經夠開心啦，真係冇諗過，有獎當然高興，冇亦代表我要繼續努力，總之多謝大家賞面」。至於另一位大熱門阮兆祥，亦表示沒有想過再奪獎，「真係冇諗過，對我講，有戲做有得發揮先至係最重要」。

同老婆分房煲劇

對於被視為本年「最佳男配角」大熱之選，日前王浩信出席完台慶拜神儀式後，在電視城接受本刊訪問，更大爆自己的變態演出，要同老婆陳自瑤分房睇。

3：3週刊　　王：王浩信

3：之前拍心姐狂摑23巴，有咩感覺？

王：其實拍呢場戲，我同心姐總共拍咗3個take，因為心姐個人好慈悲，佢一直唔想認真打我，但對於我嚟講，之前同松哥合作《名媛望族》俾佢打嗰13巴掌，我相信觀眾會有比較，所以我同心姐講唔好介意，可以再狠少少摑。第二take佢都係落唔到手，因為佢太錫我喇，我就同心姐講話放心摑，我有經驗頂得住，之後第三take就成就呢場戲出嚟。當時拍緊計唔到幾多巴，因為我喺角色情緒入面，係驚緊、避緊，大家之後數咗廿幾巴，加埋打pat pat又話多咗幾吓，我覺得除咗focus幾多下之外，希望大家擺多啲時間同專注力喺場戲本身。」

3：咁今年有冇信心拎「最佳男配角」？

王：其實我之前競逐過「飛躍」，曾經好有信心、好希望會到獎，但最終都係失望而回，所以今年唔好諗咁多啦，有就當bonus啦。

3：你太太同囡囡有冇睇《法外風雲》？

王：囡囡我冇俾佢睇呀，驚嚇親佢。太太就當然有啦，不過我哋要分開睇，我喺房睇、佢廳睇，因為我覺得同佢一齊睇，有一種好唔自在嘅感覺，好唔知點咁，因為好似要老婆睇住我有幾變態咁，我有少少唔係幾忍心。

3：即係強姦戲都分開睇？

王：係呀，因為佢睇我都會focus番我做成點，我都會問佢意見，因為佢都鍾意做戲，佢有好多獨到嘅睇法，會同我分享……但一齊睇就唔好啦。

3：返到屋企有冇抽離唔到角色？

王：其實嗰段時間精神壓力幾大，我第一次演大反派，我對要求幾緊張，所以返到屋企重喺run緊頭先場戲，唔係點到覺，有啲辛苦，加上個角色去到後面會越嚟越黐線，行為因為食藥而令佢行得好扭曲，呢個禮拜個角色會進入最極端，因為我要做好多壞事去帶起壓力嗰樣嘢，所以拍嗰段時間，尤其係食藥場口，我會飲少少威士忌去幫我進入彎彎哋嘅狀態，呢個方法係有少少唔健康，但咁先會令我眼神散渙。

樂壇失意拍劇得意

原名王昊的王浩信，在TVB當演員幾年，但原來他是歌手出身。當時生於小康之家的他家道中落，家中由幾呎千豪宅變幾百呎蝸居，起初家人反對他入行，後來屋企破產，於是他在05年簽約Neway集團旗下唱片公司Neway Star入行，於06年推出其首張個人專輯。雖然他自小喜歡唱歌，由於他當歌手成績平平，約滿後就加入無電視，主要拍劇，當三線小生。