3週刊 第738期
免費電視發牌風波,牽連甚廣,連被無綫視為每年盛事的台慶,亦成為網民攻擊對象,更呼籲觀眾熄電視贈興,而陳百祥(阿叻)護主心切,不惜向網民挑機,更以「收視得2、3點,即跪番屋企」,其後再加碼表示「真係咁低收視,我死咗去」,向全港網民挑機,囂張言論令阿叻成為眾矢之的。
阿叻寸嘴形象深入民心,而表面長袖善舞、相識滿天下的他,其實早已辣㷫不少圈中人,而且平日說話亦不時作大,像早前出席台慶記招時,便聲稱自己一年騷錢達300萬元,據知阿叻其實只簽無綫1年1騷,而以阿姐汪明荃級數騷錢亦只是貼近5位數,明顯阿叻吹水唔抹嘴。另外,口花花的阿叻,於24年前張學友和羅美薇初次分手時,曾向當時失戀的阿May關心安慰,其後學友、阿May復合,更於96年註冊結婚,但當年阿叻撩阿May,至今仍是學友心中一根刺。
現年62歲的陳百祥(阿叻),在近日的台慶風波中,成為焦點人物,護主心切的他,曾向網民挑機,揚言「收視得2、3點,即跪番屋企」、「真係咁低收視,我死去」,句句有骨,么心么肺,雖然最終無綫仍獲得平均29點收視,但阿叻已經是一額汗。阿叻雖然執番身彩不用「找數」,在商台節目《在晴朗的一天出發》中,自辯早前言論只是「引人注意」及「為公司壯烈犧牲是我的使命」,但他的寸爆言行,已經辣㷫全城。
自稱騷錢多過阿姐
阿叻出名牙擦認叻,不時吹水車大砲,近日他公開揚言自己接20個騷就有300萬,換言之他是15萬一個騷。若此價屬實,相信阿叻的騷價在港星中肯定排名第一,「Liza姐(汪明荃)騷錢都係貼住5位數字,嘟姐(鄭裕玲)都貼住Liza姐,但比佢少啲啲,阿叻一年簽一個騷之嘛,點可能一個騷錢就15萬?所以公司啲人見到阿叻咁講都O晒嘴,會唔會吹得離譜啲呀?」有無綫中人對本刊說。
周一,阿叻到將軍澳出席TVB台慶慶功宴,期間他幾杯到肚,心情相當high,記者上前向阿叻求證15萬一騷傳聞,最終阿叻都間接承認之前言論有吹水之嫌;但當問到是否與學友積怨,他卻兩度避談。
叻:阿叻 3:《3週刊》
3:阿叻,你啲騷錢係咪全台之冠,15萬一個?
叻:其實呢個係商業秘密,不過你問到我就答你啦,其實我全年只係得一個騷!
3:咁咪成300萬一個騷?
叻:哈哈!你自己諗吓啦。
3:你騷錢高過嘟姐同汪阿姐?
叻:人哋嘅嘢,我唔知。
記者再問阿叻現時有否與學友聯絡?他聞言馬上抬頭,搭一搭記者膊頭說,「今日係開心事,唔講啦。」記者會後,記者於停車場又等候阿叻,他一見記者便故作輕鬆。
叻:仲係你?你未走呀?
3:想問吓你以後嘅言論會唔會謹慎啲,唔好咁太激進?怕唔怕又引起網民熱話?
叻:你覺得呢啲係激進咩?呢啲唔係台詞咩!
3:傳你同學友積怨,話你撩過阿May?
此時阿叻已登車,向記者拜拜後即離開。
忠心耿耿的阿叻,其實不止一次為無綫開火護航,於去年的港姐競選,阿叻便公開大讚港姐水平高,但導演王晶旋即在微博留言狂踩,更揶揄阿叻「我猜他是說水、平、糕,水皮個水,波平如鏡個平,糟糕個糕!」,而阿叻則反擊指「王晶年紀大,有白內障」,阿叻不惜為無綫與好友王晶反面,二人自此交惡。
著泳褲做司儀似小丑
曾為無綫主持多個大騷的阿叻,更是港姐競選的司儀鐵腳,而自恃得寵的阿叻,於03年港姐總決賽當晚,便穿上一條Gucci彩藍色泳褲上陣擔當司儀,不但惹來觀眾投訴,名嘴鄭經翰便在電台節目中指阿叻「都唔知係小丑定係乜?著衫著到古靈精怪」,而查小欣亦在另一個電台節目中,指阿叻「品味低俗,破壞晒港姐一路以來高貴大方嘅感覺。」阿叻隨即反擊二人「食古不化」,「兩個人都一樣,我諗係因為我個電台節目收聽率高過佢哋,所以懷恨在心,等我做騷,搵機會踩我啦」,事件最後不了了之,但阿叻態度依然故我,至07年的港姐決賽,阿叻再以緊身熱褲配人字拖擔任司儀,繼續浮誇。
阿叻表面上相識滿天下,但他私底下亦貫徹牙擦擦形象。據知在88年3月,張學友和羅美薇的戀情亮起紅燈,阿May更在公開場合,邊喊邊宣佈和學友分手。當時學友分別和劉美君及林憶蓮傳出緋聞,而受盡情傷的阿May,不時到夜店借酒消愁,麻醉自己,當年和學友老友鬼鬼的阿叻,便主動作和事佬同時撩阿May。不過,同年12月學友再次向阿May展開追求,二人復合後,至96年於英國註冊結婚,先後誕下長女瑤華及瑤菁,至今夫妻感情更勝從前,但有說學友和阿叻因有積怨,二人在共同好友志偉的壽宴及志偉兒子婚宴中雖有碰面,但已鮮有交流。
本週日(23日),早上10時許,學友駕車接載幼女瑤菁往學校出席校內活動,至12時許再折返接回女兒,而學友母親亦在校門外等候,其後學友一行三人,再驅車至學友母親位於渣甸山的寓所。當學友駕車離開母家時,記者即上前詢問學友近況,(有冇睇台慶?)「我冇睇台慶呀。」言畢即想開車離去,(我唔係想問你同女助手單……)學友聽罷更有意加快車速,(依家重有冇同阿叻聯絡?)學友回應,即邊揮手邊絕塵而去。
學友MayMay 風雨同路28載
張學友和羅美薇由1985年拍拖到現在,已經一起走過了28年,難得經歷不少風雨,依然恩愛。
1985年 合作電影《痴心的我》撻著
1986年 公開戀情
1988年 羅美薇在一公開場合突然哭泣,宣佈和學友分手
1989年 被發現同遊日本,有傳兩人發展地下情
1993年 學友兄長張學智好賭,多年來欠債千萬,學友忍無可忍,表明不會再為他還錢
1996年 兩人在倫敦註冊結婚,成為夫婦
2000年 羅美薇為張學友誕下長女張瑤華
2002年 傳出羅美薇患有嚴重潔癖
2005年 羅美薇為張學友誕下次女兒張瑤萱
2006年 張學友發現當時的菲傭偷了他和家人的照片及私人信賣給傳媒,於是報警求助,事後法官判菲傭監禁3個月
2007年 香法菲傭月刊《Filipino Globe》報道,張學友在3年內換了21個菲傭,故將他列入僱主黑名單,不再讓他請菲傭
2008年 當年發生金融海嘯,張學友因投資雷曼迷債,損失慘重,有傳他蝕了4000萬港元,故要復出賺錢