男人四十 馬國明

訪問前夕,被視為本屆視帝大熱之一的馬國明,率先在台慶得到一眾藝人同事的支持,獲選為「藝員同事眼中的視帝」,雖然不是正式的視帝寶座,但認受性卻隨時比真正的視帝更與有榮焉。

「真係冇諗過,我都係去到現場先知有呢個投票,我自己都唔記得投票,去到現場收到表格,就俾同事捉咗去係咁做訪問,到開騷之後我先至記得自己冇投票。有呢個獎當然開心,原來咁多同事都咁錫我、撐我。今年拎視帝信心就一定有,但冇亦都冇所謂啦,下年再努力啲囉!」

明年馬國明就踏入男人四十的新階段,對馬國明來說,男人四十不是戇居居,而是買新居。就像他早前就返內地拍電影,首次登大銀幕、首次賺人民幣,對他來說,虛榮的銜頭並不實際,最重要還是搵到錢,實現他的換樓大計。

「好似舊年我拎『我最喜愛電視男角色』,事前真係少少都冇諗過,一心都係諗住去撐同事場,所以我每一年都唔會俾壓力自己,最緊要係長做長有,一年俾我返大陸拍一、兩套劇,等我可以快換到樓。」

男人四十,願望還是與磚頭掛最實際。

男人四十 馬國明

去年《On Call 36小時》為馬國明奪得了「我最喜愛電視男角色」,今年再接再厲,《On Call II》成為台慶劇,可見高層對這套劇的重視程度,只是在「電視台發牌風雲」的影響下,《On Call II》同樣飽受批評,口碑、成績暫時未見突出。

「其實今次拍《On Call II》係有一定難度,始終係沿用上一集角色,唔可以有太多個人創作,所以我都係盡量唔去諗太多,繼續好似上集咁好隨意咁去演。拍咗咁多年劇,呢套係我第一套拍續集嘅電視劇,壓力又唔會話因為上一集咁好收視而大咗,我只係希望可以保持到水準,唔好俾人睇死續集一定唔夠第一集好睇,唔好整衰《On Call》呢個名,我已經心滿意足。

「其實今次拍第二集,好多地方都已經好小心,例如講我個角色有少少焦慮症,大家都要處理得好小心,因為現實中醫生如果有焦慮症係一定唔可以繼續行醫,所以我哋要處理得好小心,我亦唔可以做得太過火。

「其實坊間咁多批評,我都覺得係一件好事,至少真係有人留意套劇,至於俾人話劇入面咁多錯漏,我會覺得係唔同人有唔同角度,即係唔同醫生對唔同病症都有自己睇法,咁係咪一定係是但一個錯?有可能係兩個都冇錯,只不過觀點唔同咁解,所以我又冇因為套劇俾人去挑剔而唔開心。」

男人四十 馬國明

視帝機會均等

去年的《On Call 36小時》無論收視口碑都非常理想,令馬國明初嘗「我最喜愛電視男角色」的滋味,與視帝只是一步之隔。對於今年能否再下一城勇奪視帝,馬國明就明確地表示自己信心一定有,但有信心並不代表一切。

「講真,今年自己都叫做有少少信心可以去爭(視帝),但唔會因為台慶當晚拎咗『藝員同事眼中的視帝』而信心大咗,始終係兩個唔同機制。同事眼中覺得好,唔代表觀眾都覺得好,亦唔代表評審覺得好。拍咗咁多年劇,都試過有唔少落差出現。你覺得呢套劇好得好掂,出街之後一定好爆,但偏偏觀眾反應只係一般;到你覺得呢套劇只係一般,觀眾反應又大到出乎意料之外,所以真係冇得去估。

「只不過今年真係冇咩劇話特別好受歡迎,以前幾年都有一套劇好爆,例如黎耀祥嘅柴九、陳豪嘅得得地等等,基本上大家都認定係佢,但今年暫時冇一套劇集係大家都覺得一定係佢,所以我先至覺得今年自己有機會去爭。

「獎有邊個會嫌多?自己又未拎過,只不過一直都唔會太刻意去想,有獎咪當係一個bonus、一個獎勵,冇獎亦唔需要失望,我只要重有劇拍,我仍然有呢個機會,今年唔得,咪下年囉!」

拍電影賺人仔

訪問過馬國明多次,他已不是第一次跟我說過,最想就是返國內拍劇賺人仔,理由很簡單,回國內拍一套電視劇,酬勞隨時是TVB的三倍、四倍,試問有誰會跟錢鬥氣?而早前馬國明終於有這個機會,返回國內參演成龍監製的電影,雖然只是第二男主角,但已叫馬國明心滿意足。

「以前返大陸拍劇,都係上去拍外景,急急腳咁拍完就要走。今次去拍電影,真係見識到國內電影人嘅專業,無論燈光、走位都完全唔同,而且拍攝手法亦好唔同,拍電視劇係我自己做主導,通常都係我做完,導演覺得OK就收貨;但拍電影就唔同,導演會叫我做好多個表情俾佢睇,做到有一個佢收貨先至OK,好多場口其實導演心目中已經有打算,我只係跟導演要求去演,所以同拍電視劇好唔同,不過滿足感就差好遠。

「今次拍電影都叫做舒服,可能因為公司一早已經講明我中間有邊幾日要返香港做,所以我一上到去就幾乎日日都有工開,最多都係試過有一日半日冇我份,咁我就自己落酒店健身室跑步,或者喺房入面睇電視。

「好多朋友都問我大陸女仔咁熱情有冇艷遇?我都想有……但真係冇,我同戲入面班女演員唔算太熟,加上佢哋好多都住上海,拍完就會自己車返屋企休息,唔會留喺片場,拍咁耐戲大家一齊食飯,都唔知有冇五次,點會有豔遇吖!

「不過今次上去拍戲,就真係見識到拍戲雞同鴨講,因為部戲會搵專人配音,所以我好多場口都係講廣東話,後來我同其中一個演員傾偈,佢話呢個情況好常見,佢話試過對手講韓文、講日文,就連講鄉下話都有,跟本唔知對方講乜,只不過大家都背熟劇本,所以知道佢講到邊自己就會去接,我聽完之後覺得真係好厲害。」

男人四十 馬國明

緣份隨遇而安

男人四十,代表已到了適婚年齡,而自從馬國明自爆與胡定欣分手後,戀情生活暫時行人止步未有新進展。雖然馬國明是家中獨子,不過家人卻未有向他催婚,而他亦樂得逍遙自在,繼續享受單身快樂。

「拍拖又真係冇急過,可能我個人真係比較悶,反正呢幾年都係不停開工,休息時間少之又少,根本冇時間去諗呢個問題。爹哋媽咪都冇催過我,真係連提都冇提過,可能佢哋知我性格啦,連女朋友都冇,點催都冇用啦,而且我大家姐都未結婚,要急都係佢急先啦,哈哈。

「反而我身邊朋友就比我重著急,成日話要介紹女仔俾我識,連李詩韻、陳敏之都話要介紹女仔俾我識。咁我本身都唔抗拒嘅,但唔好搞到好似相睇咁囉,你話如果一大班朋友出嚟聚會,我當識多個朋友都唔係壞事吖,但如果一出嚟就只係兩個人,成件事會好尷尬,咁就唔係咁好啦!」

後記 準視帝眼中的視帝

訪問過後,與馬國明及他的經理人齊齊午膳,席間談到台慶當晚,馬國明因為忙於訪問而未有投票,於是我要他繼續投票,硬要他說出自己眼中的視帝人選。

馬國明想了很久很久,才吐出了以下的答案。

「我又真係冇諗過喎……嗱,視后我一定選楊怡啦,話晒佢做我老婆喎,哈哈。至於視帝……我應該會選鎮宇哥,同佢合作完《衝上雲霄II》真係獲益良多,佢真係袋咗好多錢落我袋。」

我再問:「咁你自己呢?」

馬國明:「希望啦……希望啦!」

我就希望見到馬國明的「天然呆」再次出現。

男人四十 馬國明

(3週刊 第739期)