3週刊 第740期

上星期在《My盛Lady》做「馬明」做到神憎鬼厭，但又叫觀眾笑爆嘴的林盛斌（Bob），近年人氣急升，工作更是接二連三，電台開咪、活動或晚宴司儀、電視、電影、廣告，簡直可以用豬籠入水來形容。從其社交網誌中可見到他幾乎日日都做足18小時，他亦不時對外說：「一家大細靠佢一個養，依家唔搏幾時搏！」

正所謂「財多身子弱」，據知幾乎全年無休的他，身體已出現了警號，早前他更在facebook中上載一張去睇醫生的照片，身體明顯出了毛病。日前記者就發現他公私兩忙，連食藥都要在附近的快餐店匆匆了事。面對記者追訪，Bob終於承認自己身體出現了毛病，用聲過度的他，更自爆已出現聲帶癌的初期徵兆！

上週六（7日）上午11時左右，記者發現人氣急升的Bob與孻女在何文田出現，當日他先後帶兩名愛女到學校面試，為了女兒的前途頻撲，父愛爆棚。之後又要到海洋公園及為《歡樂滿東華》表演，真正的公私兩忙。

星級爸爸家長注目

當日所見，Bob手抱沒精打采的孻女在何文田培正小學出現，當日Bob與女兒到該校的幼稚園進行入學面試。當Bob與女兒入到學校內排隊時候，曾引起一場小哄動，不少家長對這位「星級爸爸」的出現非常感興趣，引人注目。但未知是否因為時候仍早的關係，加上現場人數眾多及等候需時，令Bob不時目光呆滯及當眾「放蚊」，不過偶然遇上有其他家長上前打招呼，Bob亦禮貌地點頭微笑回應，亦有閒談數句，盡力在女兒面前做個好榜樣。

大約一小時後，與女兒面試完的Bob雙雙走出學校，兩父女齊齊到附近的快餐店用膳。大約半小時後，Bob嫂與大女兒到達快餐店，只見Bob嫂先行遞上一杯水，之後連同孻女，三母女先行離開，此時Bob就拿出一大袋藥極速食藥。之後就返回停在附近的白色平治，開車前往油麻地，只見Bob嫂手抱孻女自行下車走入一間診所，Bob就與大女兒就留在車內等候，原來當日Bob的孻女生病，因此Bob嫂需要帶女兒去看醫生。

帶女面試當眾放蚊

孻女看完醫生後，Bob就先送母女二人返回旺角寓所，之後與大女兒前往九龍城的宣道小學面試。同樣地學校門前有大批家長在等候，Bob唯有與大女兒排隊等候，女兒自己睇學校的宣傳單張，倦極的Bob就繼續當眾「放蚊」，或者偶然與同樣在排隊的家長交流心得。

大約半小時後，Bob的大女兒自行進入校內面試，Bob就鬼祟地走出學校，到學校對面另一條街抽煙，之後再極速走回學校等候女兒。大約一小時後，Bob接過面試完畢的女兒後，齊齊返回旺角寓所，此時Bob發現有記者離遠拍照，Bob似是有點不滿，望了望記者，便與女兒走回車上返回寓所。

「呢排身體有毛病」

大約一小時後，Bob再次步出寓所，記者上前欲進行訪問，Bob只是說：「影晒相啦，重有咩好問唔好意思，趕時間！」之後就開車前往海洋公園工作。完成工作之後就再走入電視城為《歡樂滿東華》演出。

翌日本刊致電Bob希望進行採訪，怒氣已消的他終於肯接受電話訪問。

B：Bob　3：3週刊

B：幫我同你啲手足講聲唔好意思，尋日語氣重咗，下次叫班手足影之前講聲，唔好咁突然，嚇親小朋友就唔好啦！

3：見你facebook成日話自己病，又upload睇醫生相，係咪財多身子弱呀？
B：唔係，有幾多財吖，都係搵餐晏仔啫……呢排身體有啲毛病咁囉。

3：見你日日都好多嘢做，真係由朝開到晚，係咪好辛苦？
B：又唔好咁講，都唔係好辛苦，只不過係可能因為用聲過度，條聲帶出現問題啫！

3：係咪聲帶生繭呀？要唔要做手術？
B：生繭都係小事，醫生話我之前成日用聲，又唔識點用，吓吓擘大喉嚨講嘢，加上又食得煙多，搞到條聲帶好傷，佢之前同我照內窺鏡，話條聲帶傷得好厲害，有聲帶癌初期嘅徵兆。

3：聲帶癌？咁咪好嚴重？
B：唔係，唔係……你哋千祈唔好寫到好嚴重呀，醫生只不過話用到條聲帶好傷，好容易會變成聲帶癌咁啫。依家好咗好多喇，準時食藥又準時覆診，我又搵咗個老師教我點樣發聲唔傷聲帶，早幾日覆診醫生都話我好咗好多，應該睇多次就唔使覆診。煙仔就已經食少好多，但俾啲時間我慢慢戒啦！

3：見你忙到要喺快餐店食藥，好慘咁囉！
B：其實係我唔想喺兩個女面前食藥，佢哋見親我食藥就唔開心，係咁問我：「爸爸你係咪病病呀？」，次次都聽到我好心痛，所以我盡量都唔會喺兩個女面前食藥！

3：有冇諗過減少工作呀？
B：話冇你都唔信啦，不過諗吓就得。大佬……我連埋工人姐姐一家五口等我養，唔做邊得掂呀……講真吖，出面大把人才，人家搵得我即係俾面我，你估真係冇咗我唔得咩，所以有job我有期通常都會接。不過經過今次之後，我會俾自己多啲休息時間，希望可以做到揀job咁啦，點都好……錢係重要，但健康更加重要，搵到錢冇命享，有鬼用咩！」

3：咁有冇做埋身體檢查呀？
B：邊有時間吖，遲啲啦……遲有時間就會去做，呢排個人好易攰，又成日冇精神，我估都應該有唔妥，有心喇大佬！都係嗰句，幫我同你手足講聲唔好意思，唔該晒，真係唔好意思。」

工作不斷年賺千萬

自從本年初Bob演出《老表，你好嘢！》之後即時人氣急升，除了主持《兄弟幫》之外，還多了不少活動司儀及晚宴司儀工作。據知他就算大幅增加費用至最少收費5萬，仍然其門如市。除了活動及晚宴司儀外，廣告亦大大增加，就像乳膠漆、電力公司、遊戲機公司、商品說明條例、內地購物網等等。本年4月，Bob成為《玩王》的整古目標，節目播出後反應理想，Bob的鎮定表現大獲好評，不少新人及公司都指定要找他擔任晚宴司儀，令他工作量及收入都大增，最近甚至有海味店以七位數字找他擔任代言人，連胸圍生產商及整容公司都找他拍廣告，但卻因為過不了自己而推卻，再加上電影及電視，保守估計他本年收入達千萬元。但卻因為工作太過頻密而休息時間不足，令他健康變差，名副其實的「財多身子弱」！

聲帶癌須頸項開洞呼吸

耳鼻喉專科丁顯顒醫生表示，聲帶癌起因與多用聲帶無關，他說：「患者多數係長期吸煙及飲酒所引起，而初期病徵有聲沙、口水有血絲、頸起淋巴核、食嘢容易哽親等等，而發病初可以用電療或做手術醫治，但如果再嚴重啲則要成個咽喉出嚟，喺條頸到開窿呼吸。」